14.03.2015

ДЕПУТАТЛАР СИЁСИЙ ПАРТИЯЛАРНИНГ ҲИСОБОТЛАРИНИ ЭШИТДИ

13 март куни Ўзбекистон Республикаси Олий Мажлиси Қонунчилик палатасининг навбатдаги мажлиси бўлиб ўтди.

Конституциявий ваколатларга кўра, депутатлар сиёсий партияларнинг 2014 йилдаги фаолиятини молиялаштириш манбалари тўғрисидаги ҳисоботларини эшитдилар. Мазкур масала бўйича мамлакатимиздаги барча сиёсий партияларнинг раҳбарлари хусусан, Ўзбекистон Халқ демократик партия­си Марказий Кенгаши раиси Ҳ.Кетмонов сўзга чиқди.

Мажлисда сўнгги йилларда муҳим давлат, Ўзбекистон Республикаси парламенти фаолиятига доир масалаларни ҳал этишда сиё­сий партия­ларнинг роли ва таъсири сезиларли даражада кучайганлиги таъкидланди. Сиёсий партияларни ривожлантиришнинг умумқабул қилинган демократик стандартларга ва мавжуд халқаро нормаларга тўла мос бўлган ишончли ҳуқуқий негизи барпо этилди. Олий Мажлис Қонунчилик палатаси, халқ депутатлари вилоят, туман ва шаҳар Кенгашларига бўлиб ўтган сайловлар сиёсий партиялар ўз дас­турий мақсадларини илгари суриш ва амалга ошириш, электорат манфаатларини ҳимоя қилиш учун барча имкониятларга эга эканлигини яна бир бор намоён этди. Сайлов кампаниясининг барча босқичларида сиёсий партиялар учун тенг шарт-шароитлар яратилди.

«Сиёсий партияларни молия­лаштириш тўғрисида»ги қонунга кўра, ҳар бир партия, агар парламент сайлови якунларига кўра Олий Мажлис Қонунчилик палатасида ўз фракциясини шакл­лантириш учун зарур миқдордаги депутатлик ўринларини қўлга киритса, ўз устав фаолиятини молиялаштириш учун давлат маблағларини олиш ҳуқуқига эга. Давлат маблағларининг ҳажми Қонунчилик палатасига бўлиб ўтган сайлов натижасига кўра белгиланиб, маблағлар уларни олиш ҳуқуқига эга бўлган сиёсий партиялар ўртасида Қонунчилик палатасида қўлга киритган депутатлик ўринлари сонига мутаносиб равишда тақсимланди.

Мамлакатимизда сиёсий партияларни молиялаштириш қонунийлик, очиқлик, ошкоралик ва сиёсий партияларнинг тенг ҳуқуқлилиги принциплари асосида амалга оширилди. Қонунга кўра, барча сиёсий партиялар ўз фаолиятларини молиялаштириш ҳажми ва манбалари тўғрисидаги ахборотни ўз вақтида эълон қилиши шарт бўлиб, шунга асосан барча сиёсий партиялар фаолиятини молиялаштириш манбалари тўғрисидаги ахборотдан ўз аъзолари ва жамоатчилик фойдаланиши учун имкониятни таъминлаб берди.

Мажлисда Ўзбекистондаги барча сиёсий партиялар молия­вий ҳисоботни қонун ҳужжатларида белгиланган тартибда ва муддатларда тақдим этганликлари ҳам қайд этилди.

Депутатлар фикрича, сиёсий партияларнинг моддий-молиявий, ташкилий кадрлар ресурслари ўз дастурий мақсад ва вазифаларини амалга оширишда катта аҳамият касб этади. Шу сабабли, бу ресурсларнинг ошкоралиги ва қонунийлиги, доимо жамоатчилик назорати остида бўлиши жуда муҳимдир.

Депутатлар муҳокама чоғида билдирилган фикр-мулоҳазаларни инобатга олган ҳолда сиёсий партияларнинг 2014 йилдаги фаолиятини молиялаштириш манбалари тўғрисидаги ҳисоботларни маълумот учун қабул қилди.

 

Олий Мажлис Қонунчилик палатаси

Ахборот хизмати маълумоти асосида тайёрланди.



DB query error.
Please try later.