05.03.2015

«МЕНИНГ ТАНЛОВИМ АҲАМИЯТГА ЭГА»

«Ўзбекистон Республикаси Президенти сайлови тўғрисида»ги Қонунга мувофиқ, фуқаролар Президент сайловини умумий, тенг ва тўғридан-тўғри сайлов ҳуқуқи асосида яширин овоз бериш йўли билан амалга оширади. Ҳар бир фуқаро ўзи истаган номзодга овоз бериш ҳуқуқига эга.

Шу ўринда савол туғилади. Муносиб номзодни танлашда сайловчилар айнан қайси жиҳатларга эътибор беради? Давлат раҳбари қандай хислатларга эга бўлиши лозим?

Санжар АБДУҚУДДУСОВ, Тошкент шаҳридаги 5-сон болалар шифохонаси шифокори:

– Яқинда сайлов билан боғлиқ қонунлар ва ҳуқуқий адабиётлар билан танишиб чиқдим. Ўзимга тегишли хулосалар чиқариб олдим. Тушиндимки, мустақил сайлов тизими жамият ҳаётини эркинлаштиришнинг муҳим асоси экан. Шунинг учун мамлакатимизда демократик ислоҳотларни янада чуқурлаштириш ва кучли фуқаролик жамиятини қарор топтиришда сайлов институтини кучайтириш масаласи бош вазифа этиб белгиланган. Энг муҳими, шу орқали ҳар биримизнинг конс­титуциявий ҳуқуқларимиз ҳимоя қилинмоқда, бизнинг овозимиз, муносабатимиз юзага чиқиши учун шароит яратилмоқда.

Шу боис аввало, кимга ва нима учун овоз беришимизни тўғри англаб, тушуниб олишимиз керак. Ўйлашимча, ҳар биримиз Президент кимлиги, ҳаётимизда унинг ўрни, аҳамияти ҳақида тасаввур қилиб, чуқур ўйлаб кўрмоғимиз лозим.

Президент халқ манфаатини кўзлаб иш тутадиган, ҳар томонлама етук, юксак салоҳиятли, эл-юрт фаровонлиги учун куйиб-ёнадиган комил инсон бўлиши керак, деб ўйлайман. Эртага ким мамлакат раҳбари, ким хал­қимизга бош бўлади? Сайловда халқимиз ана шу саволга жавоб беради. Мен бунинг аҳамияти ва масъулиятини сайлов яқинлашгани сари чуқур ҳис қиляпман. Номзодлар ва уларнинг дастурлари билан танишиб ­чиқяпман. Чунки сайлов куни ўзим муносиб кўрган номзодга ишонч билан овоз беришим керак.

Азиза ЗОКИРОВА, Тошкент шаҳридаги 1-республика тиббиёт коллежи ўқувчиси:

 – Биз ёшларнинг таълим-тарбия олишимиз, эртанги тақдиримиз давлат раҳбарининг олиб борадиган сиёсатига боғлиқ. Шу боис Президентликка номзодлар ҳақида тўлиқ тасаввурга, кенг маълумотга эга бўлишимиз зарур, деб ўйлайман.

Мен ҳам ҳар куни ўқув машғулотларига қатнаш жараёнида шаҳар кўчаларидаги Президентликка номзодларнинг сайловолди тар­ғиботи акс этган воситаларни кузатиб бораман. Имкон қадар ишончли вакилларнинг сайловчилар билан учрашувларида иштирок этишга ҳаракат қиляпман. Бу ўзимга маъқул ва ўзим ишонган номзодни танлашим, тўғри хулоса чиқаришимга асос бўлади.

Замира МИРЗАҚУЛОВА,  Тошкент вилояти Қибрай туманидаги «Тузель» қишлоқ фуқаролар йиғини, уй бекаси:

— Айни вақтда мамлакатимизнинг барча ҳудудларида Ўзбекистон Республикаси ­Президенти сайловига қизғин тайёргарлик ишлари кетмоқда. Мен уй бекаси бўлсам ҳам сайловга оид барча жараёнларни диққат билан кузатиб боряпман. Албатта, бу муҳим сиёсий жараёнда фуқаро сифатида фаол иштирок этиб, ўз вазифамни бажармоқчиман. Бунинг учун сиёсий-ҳуқуқий билимим ва тасаввуримни бойитишга ҳаракат қиляпман. Яқинда ўзимни қизиқтирган саволларга жавоб топиш учун ҳудудимиздаги участка сайлов комиссиясига бордим. У ердаги шароит, берилган маълумотлардан хурсанд бўлдим. Сайлов куни ўзим ишонган ва хайрихоҳ бўлган номзодга овоз бераман.

 

Юлдуз ҲАЙДАРОВА

ёзиб олди.


Фикр ва мулохазалар

Защита от автоматических сообщений

Сўнгги янгиликлар: