05.03.2015

«КЕКСАЛАРИМИЗНИНГ ФАРОВОН ҲАЁТИ УЧУН МАСЪУЛМИЗ»

Мазкур лойиҳа доирасида ЎзХДП ташкилотлари турли тадбирлар ўтказмоқда

Одам ёши ўтган сари меҳрга, эътиборга кўпроқ эҳтиёж сеза боради. Ҳаётда кўриб-кузатганлари, чиқарган сабоқ ва хулосаларини ёшларга айтгиси келади. Ёши улуғ кишиларнинг сўзида, фикрида эса ҳикмат бўлади. Шунинг учун улардан ўрганиш, уларни эшитиш ёшлар учун фақат фойдадир.

Ўзбекистон ХДП Марказий Кенгаши ҳамда Тошкент вилоят кенгаши ҳамкорлигида ­Чиноз туманида ўтказилган тадбирда нуроний отахону онахонлар, партия фаоллари, ёшлар ўзаро суҳбат қуришди.

Айни кунда Тошкент вилоятида 353 нафар Иккинчи жаҳон уруши қатнашчиси, 5361 нафар фронт ортида меҳнат қилган фахрийлар борлигини алоҳида таъкидлаш лозим.

— Яқинда «Кексаларни эъзозлаш йили» Давлат дастури тўғрисида қарор қабул қилинди, — дейди Олий Мажлис Қонунчилик палатаси депутати, ЎзХДП фрак­цияси аъзоси  Акмал Умаралиев. — Унда кексалар, 1941-1945 йиллардаги уруш ва меҳнат фронти фахрийларини манзилли ижтимоий ҳимоя қилиш ва қўллаб-қувватлашни кучайтириш, ёши улуғ инсонлар, биринчи навбатда, ёлғиз қариялар ва ногиронларга кўрсатиладиган ижтимоий ва маиший хизматлар рўйхатини кенгайтириш масалаларига алоҳида эътибор қаратилган. Хусусан, фахрийлар ва ёши улуғ инсонларга тиббий ва ижтимоий хизмат кўрсатиш даражаси ва сифатини ошириш, уларни тизимли асосда соғломлаштиришни ташкил этиш, профилактика тадбирларини кўпайтириш, кексалар ва ногиронларни ёрдамчи ҳамда техник реабилитация воситалари билан имтиёзли асосда таъминлаш, кексаларга хизмат кўрсатишга ихтисослаштирилган санаторий-соғ­ломлаштириш ва ижтимоий хизмат кўрсатиш муассасаларининг моддий-техник базасини янада мустаҳкамлаш вазифалари белгиланди.

Хўш, бу вазифалар йил давомида қандай ижро этилади? Бу имконият ва имтиёзлардан ёши улуғ кексаларимиз қай даражада фойдаланишади? Бундай саволлар доим партиямиз ташкилотлари ва депутатлар эътиборида турмоғи керак, деб ўйлайман. Негаки, нуроний кишилар асосан бизнинг электоратимиз вакиллари ҳисобланишади. Давлат дастурининг самарали ижроси юзасидан жамоатчилик ва депутатлик назоратини ўрнатиш муҳим аҳамиятга эга. Бундан ташқари, ёлғиз кексалар, пенсионерларни ўйлантираётган ижтимоий-иқтисодий масалаларни ўрганиш, уларни мутасадди ташкилотлар вакиллари билан ҳамкорликда ижобий ҳал этиш, лозим бўлса, мазкур масалалар юзасидан маҳаллий давлат органлари раҳбарларининг халқ депутатлари маҳаллий Кенгашлари сессияларида ҳисоботларини эшитиш зарур.

Халқ депутатлари маҳаллий Кенгашларидаги партия гуруҳлари томонидан ёлғиз кексалар, пенсионерларни ўйлантираётган масалалар бўйича ишлаб чиқилган таклифлар фракциямиз фаолиятида муҳим аҳамиятга эга бўлади.

— Биз бу тадбирларни «Кексаларимизнинг фаровон ҳаёти учун масъулмиз» лойиҳаси доирасида ўтказяпмиз. Партиямиз давлат ва жамият томонидан манзилли ижтимоий ҳимоя ҳамда ижтимоий қўллаб-қувватлашга эҳтиёжманд аҳоли қатламлари, жумладан, пенсионерлар манфаатларини ҳимоя қилишни мақсад қилиб қўйган, — дейди Ўзбекистон ХДП Тошкент вилоят кенгаши раиси Сирожиддин Аъзамов. — Шундан келиб чиқиб, Тошкент вилоятининг барча шаҳар ва туманларида кексаларга эҳтиром кўрсатиш, уларни моддий ва маънавий рағбатлантириш мақсадида бугунгидай тадбирлар ўтказиб келинмоқда. Бундан ташқари, кексаларни ҳар томонлама ҳимоя қилиш борасидаги қонун ва қонун ости ҳужжатларининг ижросини таъминлаш бўйича депутатлик назорати амалга оширилмоқда. Бу жараёнда вилоят Кенгашининг 16 нафар, шаҳар ва туман Кенгашларининг 201 нафар депутати бизга яқин кўмакчи бўляпти.

— Умрини ҳалол меҳнат, эл-юрт фаровонлигига бағишлаган одамга муносиб ҳурмат ва эътибор кўрсатилиши керак. Ижтимоий адолат тамойили шуни тақозо қилади, — дейди Молия вазирлиги ҳузуридаги бюджетдан ташқари Пенсия жамғармаси Тошкент вилояти бошқармаси бўлим мудири Алишер Расулов. — Бугунги кунда вилоятда пенсия ва ижтимоий нафақалар олувчилар 285 минг нафарга яқин. Шундан 266 минг нафардан ортиғини пенсионер ва 18 минг нафардан ортиғини ижтимоий нафақа олувчилар ташкил қилади. Пенсионерларга қўшимча қулайлик яратиш мақсадида мобиль телефонлари ёрдамида SMS сўрови орқали пенсия миқдори ва муддатини аниқлаш тизими яратилди. Бунда пенсия иши рақамини мобиль телефондан 10711 рақамига SMS тарзида юборишнинг ўзи кифоя. Натижада ҳар ойда фуқаролар пенсияларини олиш вақти ҳақида аввалдан хабардор бўлиб туради.

— Бугунги кўраётган кунларимдан мамнунман, — дейди Чиноз тумани Амир Темур маҳалласида истиқомат қилаётган 95 ёшли Мўминжон Ғаниев. — Бу йил бизнинг йилимиз бўлди. Партия фаоллари, депутатлар билан суҳбат борлигини эшитиб келдим. Бугунги гаплар, фикрларни тинглаб, бир нарсани сездим, одамларнинг қалбида меҳр-оқибат кучли...

Давра суҳбатида «Кексаларни эъзозлаш йили» Давлат дастурининг мазмун-моҳиятини аҳоли орасида кенг тушунтириш, ёлғиз кексалар ва пенсионерларнинг манфаатларини ҳимоя қилиш, бу борада жамоатчилик ва депутатлик назоратини кучайтириш масалалари юзасидан қатор таклифлар билдирилди.

 

Меҳрож ДАРХОН.



DB query error.
Please try later.