21.02.2015

ХАТОЛАРДАН ТЎҒРИ ХУЛОСА ЧИҚАРИШ

уларни бартараф этишга хизмат қилади

Депутат аҳоли томонидан давлат ҳокимиятининг олий, маҳаллий вакиллик органларига сайланган ишончли вакилдир. Ҳар бир депутат ўзини депутатликка номзод этиб кўрсатган сиёсий партия, сайловчилар билан доимий равишда алоқа боғлаб туради, ваколатлари доирасида вакиллик ҳокимиятида уларнинг манфаатларини ифода этади.

Шундай экан, халқ депутатлари маҳаллий Кенгашларидаги депутатлар ҳудудларда ислоҳотларнинг самарадорлигини таъминлашда асосий масъулиятни зиммасига олиши талаб этилади. Маълумки, ўтган йили декабр ойида халқ депутатлари маҳаллий Кенгашларига ҳам сайлов бўлиб ўтди. Яқинда туман ва шаҳар Кенгашларида партия гуруҳлари тузилди. Шу кунларда улар ўз фаолиятининг муҳим ва устувор йўналишларини белгилаб олмоқда. Бунда олдинги чақириқда фаолият юритган партия гуруҳларининг иш тажрибасини ўрганиш, таҳлил қилиш муҳим ўрин тутмоқда.

Навоий вилоят партия кенгаши ўтказган давра суҳбатида шу масалалар атрофида фикр алмашилди, Олий Мажлис Қонунчилик палатаси ва маҳаллий Кенгашларга бўлиб ўтган сайловларда йўл қўйилган камчиликлар муҳокама этилди.

— Таҳлиллар шуни кўрсатмоқдаки, 2009-2014 йилларда партиямиздан сайланган депутатларнинг ҳаммаси ҳам талаб даражасида фаолият юритмади, — деди  ЎзХДП вилоят Кенгаши раиси ўринбосари Ориф Тошонов. — Айрим депутатлар депутатлик сўровини амалга ошириш ҳамда ҳудудларни ривожлантиришга доир масалаларни сессиялар кун тартибига олиб чиқишда фаол иштирок этмади. Бунинг асосий сабабларидан бири депутатлар лоқайдлиги бўлса, иккинчидан, партия ташкилотлари билан депутатлар ҳамкорлиги мустаҳкам эмаслигида, деб ўйлайман. Биз истиқболдаги вазифаларни белгилаб олишда ана шундай хато ва камчиликларни бартараф этмоғимиз лозим.

Қайд этиш керакки, парламентнинг қуйи палатаси ва маҳаллий Кенгашларга сайловлар очиқ-ошкора, демократик тамойиллар асосида бўлиб ўтди. Сайловда барча сиёсий партиялар учун тенг шароит яратилди. Номзодлар депутатлик учун кескин рақобат олиб боришди. Бизнинг вилоятда ҳам сайлов адолатли кураш остида ўтказилди. Аммо айрим ҳудудларда партиямиз номзодларини қўллаб-қувватлаш, уларнинг сайловолди дастурини кенг тарғиб қилишда сусткашликка йўл қўйилди. Умуман, сайлов жараёнларида шу нарса яна бир бор аниқ бўлдики, одамлар ҳаётий ғояни илгари сурган партия­ни, қатъийлик ва талабчанлик кўрсатган, виждонан ишлайдиган кишиларни қўллаб-қувватлайди, уларга суянади. Ҳар биримиз бутун фаолиятимиз давомида шуни асло эсдан чиқармаслигимиз лозим.

Сайлов якунларига кўра, ЎзХДПдан Олий Мажлис Қонунчилик палатасига 2 нафар, халқ депутатлари вилоят Кенгашига 12 нафар, туман ва шаҳар Кенгашларига эса 72 нафар депутат сайланди. Улар ўзларига билдирилган ишончни оқлаши учун фаол ва ташаббускор бўлиш талаб этилади.

Давра суҳбатида жорий йилнинг 29 мартида бўлиб ўтадиган Ўзбекистон Республикаси Президенти сайловида партия ташкилотларининг муносиб иштирокини таъминлаш, бошланғич партия ташкилотларида ўтказилаётган сиёсий ўқувларда шу масалага жиддий эътибор қаратиш бўйича фикр алмашилиб, тегишли тавсиялар ҳам ишлаб чиқилди.

 

Илҳом  САТТОРОВ,

«Ўзбекистон овози» мухбири.




DB query error.
Please try later.