21.02.2015

УЧАСТКАЛАР САЙЛОВГА ТАЙЁР

Жиззах вилоятида Ўзбекистон Республикаси Президенти сайловини ўтказувчи 463 сайлов участкаси ташкил этилган. Айни кунларда мазкур участкаларнинг барчасида жорий йилнинг 29 март куни бўлиб ўтадиган сайловга тайёргарлик ишлари қизғин бормоқда.

Бахмал туманида Ўзбекис­тон Республикаси Президенти сайловини ўтказувчи 61 участка сайлов комиссияси тузилган. 57-сайлов участкаси ҳудудига Ўсмат шаҳарчасидаги Мустақиллик, Ҳамид Олимжон кўчалари, Боғтўп, Қаропчи мавзелари киради. Мазкур участкага Бахмал маи­ший хизмат касб-ҳунар коллежидан 4 хона ажратилган ва улар барча зарур жиҳозлар билан тўла таъминланган.  Она ва бола, тиббиёт хоналари ташкил этилган.

— Участкамиз қонун, йўриқнома, қўлланма, зарур адабиёт, номзодларни таништирувчи плакатлар билан таъминланди, — дейди участка сайлов комиссияси раиси Х.Тожиев. — Комиссия аъзолари ўртасида вазифалар тақсимланиб, навбатчилик йўлга қўйилди. Сайловчилар участкада сайловга оид қонунлар, кундалик матбуот нашрлари билан танишиб, ўзларини қизиқтирган саволларга атрофлича жавоб олмоқда.

Бундай тайёргарликни вилоятдаги барча сайлов участ­каларида кўриш мумкин. Сайлов участкалари сайловчиларнинг келишига қулай бўлган замонавий биноларда жойлашган. Участкаларнинг 240 таси симли телефон алоқасига эга. Симли телефон алоқаси етиб бормаган  олис тоғ қишлоқларидаги сайлов участкалари мобиль телефонлар билан таъминланган.

Сайлов участкаларида номзодлар ҳақидаги барча маълумот ва ахборотлар кўринарли жойларга осиб қўйилган. Ҳар бир партиядан кўрсатилган номзоднинг сайловолди ташвиқоти учун тенг шароит яратиб беришда участ­ка сайлов комиссияларига жойларда ташкил этилган кўмаклашувчи гуруҳлар, маҳаллий ўзини ўзини бош­қариш органлари яқиндан ёрдам бермоқда.

Участка сайлов комиссиялари аъзоларининг сайлов қонунчилиги бўйича билимини ошириш мақсадида шаҳар ва туманларда семинарлар ташкил этилмоқда.        

 

Т.БЕКНАЗАРОВ,

ЎзА мухбири



DB query error.
Please try later.