10.02.2015

ЎЗБЕКИСТОН РЕСПУБЛИКАСИ ПРЕЗИДЕНТИ САЙЛОВИ — 2015

СУРХОНДАРЁ

Бугунги кунда Сурхондарё вилоятида Ўзбекистон Республикаси Президенти сайловининг юқори савияда, демократик тамойиллар асосида ўтишини таъминлаш борасидаги ишлар изчил давом этмоқда. Хусусан, яқинда вилоятда округ сайлов комиссияси ва унинг таркиби тасдиқланди.

9-сайлов округ комиссияси учун ажратилган махсус бино ва хоналар зарур жиҳоз ва техникалар билан таъминланди. Сайлов жараёнларини кенг ёритиш учун матбуот маркази ташкил этилган. Бундан ташқари, вилоятдаги 708 та сайлов участкаларида сайловчилар учун барча шароит яратилган.

— Участка сайлов комиссияси аъзолигига эл ҳурматини қозонган, сайлов қонунчилигидан яхши хабардор фуқаролар танлаб олинмоқда, — дейди округ сайлов комиссия раиси ­Абдукарим Аҳмедов. — Ҳар бир сайлов участкасига округ сайлов комиссияси аъзолари бириктирилди. Сайловларда иштирок этаётган ёшларни миллий қонунчилигимиз билан яқиндан таништириб боряпмиз.

ТОШКЕНТ ВИЛОЯТИ

Ўзбекистон Республикаси Президенти сайловини ўтказувчи 10-Тошкент вилоят округ сайлов комиссиясининг нав­батдаги мажлиси бўлиб ўтди. Унда участка сайлов комиссия­лари таркибини тасдиқлаш тўғрисидаги масала кўриб чиқилди.

Қонунчилик талабларига биноан вилоятдаги жами 18 та шаҳар ва туманларда участка сайлов комиссиялари аъзолигига номзодлар муҳокама қилиниб, округ сайлов комиссиясига тавсия қилинди.

Тошкент вилояти бўйича 1 миллион 906 мингга яқин сайловчи 872 та сайлов участкасида овоз беради. Округ сайлов комиссияси мажлисида шаҳар ва туманлар бўйича тавсия этилган номзодлар батафсил кўриб чиқилиб, участка сайлов комиссиялари таркибини тасдиқлаш тўғрисида қарор қабул қилинди.

Округ сайлов комиссияси мажлисидан сўнг оммавий ахборот воситалари вакиллари учун матбуот анжумани ўтказилди.

ФАРҒОНА

Фарғона шаҳар Сайилгоҳ кўчасида жойлашган 11-Фар­ғона округ сайлов комиссиясида шу кунларда иш қизғин. Комиссия учун ажратилган махсус хоналар ва конференция зали барча керакли жиҳозлар, сиёсий адабиётлар ва кўргазмали воситалар билан таъминланди. Бу ердаги мавжуд компьютерлар интернет тармоғига уланган. Бундан ташқари, сайловчиларга қулайлик яратиш мақсадида тиббиёт ва она-бола хоналари ташкил этилган.

— Округ сайлов комиссиясининг асосий эътибори сайлов ­участкалари чегараларини аниқлаш, участка жойлашган бинолар манзилларини белгилашга қаратилган, — дейди округ сайлов комиссияси котиби Тўлқиной Тожиева. — Шу кунгача 2 миллион 342 минг нафар сайловчи рўйхатга олинган бўлиб, улар 947 та сайлов участкасида овоз беришади. Шунингдек, Ўзбекистон Республикаси Президенти сайловида 350 минг нафардан ортиқ фарғоналик ёшлар биринчи бор иштирок этишади.

— Мен биринчи марта Президент сайловида овоз бераман, — дейди Фарғона шаҳар 2-тиббиёт коллежи ўқувчиси Бобур Мусаев. — Олдинлари ота-онам сайловларда иштирок этаётганини кўриб, уларга жуда ҳавасим келарди. Энди ўзим ҳам шундай муҳим сиёсий жараён қатнашчиси эканлигимдан бахтиёрман. Бу мен учун ҳам фахр, ҳам катта масъулиятдир.

 

Аҳмад ЮСУПОВ тайёрлади.


Фикр ва мулохазалар

Защита от автоматических сообщений

Сўнгги янгиликлар: