Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
07.02.2015

«ЎЗ ИШИМНИ ЙЎЛГА ҚЎЙГАНИМДАН ХУРСАНДМАН»

Бу – Зомин ижтимоий-иқтисодиёт касб-ҳунар коллежи битирувчиси, ЎзХДП аъзоси Дилбар Толипованинг фикри

У Зомин тумани марказидаги «Каттабоғ» маҳалласида яшайди. Касб-ҳунар коллежини битираётганда мустақил равишда иш бошлашга қарор қилди. Шу мақсадда ўзи ўқиётган коллеж раҳбариятига имтиёзли микрокредит олиш учун ёрдам сўраб мурожаат этди.

Айни ўша кунларда туманда Ўзбекистон Халқ демократик партияси Марказий Кенгаши, Республика Марказий банки ва бошқа тижорат банклари ҳамкорлигида «Оилавий тадбиркорлик ва касаначиликни ривожлантириш орқали янги иш ўринлари ташкил этиш имкониятлари» мавзусида иқтисодий форум ҳамда меҳнат ярмаркаси ўтказилди. Дилбар бир гуруҳ тенгдошлари билан шу форумда қатнашди ва ўз бизнес ғояси ҳақида сўзлаб берди. Натижада «Агробанк»дан 5 миллион сўм имтиёзли кредит олишни кафолатловчи сертификатга эга бўлди.

— Коллежни битирганимдан сўнг кредитни олдим ва паррандачиликни йўлга қўйишга киришдим, — дейди у. — Албатта, осон бўлгани йўқ. Лекин чинакам ­хоҳиш-истак, интилиш билан ҳар қандай қийинчиликларни енгиб ўтиш мумкин экан. Икки йил ­олдин иш бошлаган бўлсам, бугунга келиб тухум ва парҳез гўшт етиштиришга ихтисослаштирилган кичик корхонамизда 8 нафар қишлоқ ёшлари меҳнат қилишаяпти. Оила аъзоларимнинг ҳам ёрдами катта бўляпти. Икки йил ичида анча оёққа туриб олдик. Даромадимиз ёмон эмас. Ўз ишимни йўлга қўйишда менга кўмак берган, йўл-йўриқ кўрсатган ЎзХДП туман кенгашидан миннатдорман.

Зомин туманида ўтказилган мазкур иқтисодий форумда партиямиз электорати вакилларидан 50 нафарига мустақил равишда иш бошлаши учун имтиёзли микрокредит олишни ­ка­­фолатловчи банк сертификатлари топширилган эди. Шулардан 27 нафари касб-ҳунар коллежлари битирувчиларидир. ­Форум якунида ташкил этилган Меҳнат ярмаркасида ишга жойлашиш учун йўлланма берилган 68 нафар фуқародан 42 нафари коллеж битирувчилари бўлди.

— Бундай иқтисодий форумлар партия дастурий мақсадларини амалга оширишга бевосита хизмат қилади, — дейди ЎзХДП Зафаробод туман кенгаши раиси Холмурод Ереженов. — Шунингдек партиямиз электорати, хусусан, касб-ҳунар коллежларини битираётган ёшлар учун ҳам фойдали.

Шу ўринда бир фикрни айтишни хоҳлардим. Мустақил иш бошлаган ёшларга халқ депутатлари маҳаллий Кенгашлари депутатлари эътибори чуқурроқ қаратишни ўйлаб кўриш керак. Чунки айрим қийинчиликлар, мураккабликларга дуч келинганда, депутатнинг ёрдами жуда керак бўлади. Бундай амалиёт яхши натижа беради, деб ўйлайман.

— Партиямизнинг янги ­Ҳаракат дастурида меҳнатга лаёқатли аҳолининг муносиб ҳақ тўланадиган иш топишга интилишини қўллаб-қувватлаш, уларнинг шахсий ташаббускорлиги ва тадбиркорлигини ҳар томонлама рағбатлантириш кўзда тутилган, — дейди халқ депутатлари Жиззах шаҳар Кенгашидаги ЎзХДП гуруҳи раҳбари Солижон ­Қобилов. — Шунинг учун депутатлик фаолиятимизда бу масалаларга алоҳида эътибор қаратишимиз, ўз ишини очиш ниятида юрган ёшларга ёрдам беришимиз керак.

— Қизим Дилфуза туманимиздаги маиший хизмат кўрсатиш касб-ҳунар коллежини тамомлади, — дейди Зарбдор туманида истиқомат қилувчи Зулхумор ­Суюнова. — Банкдан 5 миллион сўм имтиёзли кредит олиб, тикувчилик цехи очди. Ҳозирча 4 нафар хотин-қизни иш билан таъминлади. Яқинда биринчи маошини берганида, очиғи, қизимнинг қўлидан иш келаётгани, оила даромадига улуш қўшаётганидан жуда мамнун бўлдим.

Бу йил вилоятдаги 75 та касб-ҳунар коллежини 19 минг нафарга яқин йигит-қиз битиряпти. Уларнинг аксарияти ҳозирнинг ўзида мутахассисликлари бўйича қаерга бориб иш бошлашини билади. Жойларда «коллеж-корхона» ҳамкорлиги яхши йўлга қўйилган. Албатта, битирувчилар орасида мустақил ҳолда ишлашни, тадбиркорлик билан шуғулланишни истовчилар ҳам бор. ЎзХДП ташкилотлари ва депутатлик гуруҳлари бундай ёш­ларни ҳар томонлама қўл­лаб-қувватлаш, уларга ҳу­қуқий ва амалий ёрдам кўрсатишни ўз зиммасига олган. Партия ташкилотлари ва депутатлик гуруҳлари бу масалада қатъият билан изчил иш олиб боришлари керак бўлади.

 

Иброҳим ЖОНУЗОҚОВ,

«Ўзбекистон овози» мухбири. 

 




DB query error.
Please try later.