27.01.2015

ФУҚАРОЛИК ПОЗИЦИЯСИ МУСТАҲКАМЛАНИШИ

биз ўтказаётган тадбирларнинг сифати, таъсирчанлигига боғлиқ

Ўтган ҳафтада Марказий сайлов комиссияси қарорига кўра, сиёсий партияларга Ўзбекистон Республикаси Президенти сайловида иштирок этиш учун ижозат берилди. Айни пайт­да партиялар бу борада қатор вазифаларни белгилаб олди. Шу кунларда ЎзХДПнинг ҳудудий ташкилотлари ўз пленумларида сайловда партиянинг муносиб иштирокини таъминлаш билан боғлиқ масалаларни кенг муҳокама қилмоқда.

ЎзХДП Сирдарё вилоят кенгашининг III пленумида сайлов кампания­си даврида партиянинг туман, шаҳар ташкилотлари, халқ депутатлари маҳаллий Кенгашларидаги гуруҳлари, «Фаол аёллар» ва «Истиқбол» ёшлар қанотларининг олдида турган вазифалар бўйича фикр алмашилди.

Дастлаб партия ташкилотлари, халқ депутатлари маҳаллий Кенгашларидаги партия гуруҳлари томонидан 2014 йилда амалга оширилган ишлар, ютуқ ва камчиликлар таҳлил этилди, партия ташкилотлари фаолиятини кучайтириш бўйича таклифлар билдирилди. Олий Мажлис Қонунчилик палатасига ҳамда халқ депутатлари маҳаллий Кенгашларига сайлов юксак савияда, умумэътироф этилган демократик меъёрларга мувофиқ ўтгани таъкидланди.

Сайловда Сирдарё вилоят партия кенгаши томонидан кўрсатилган номзодларнинг 11 нафари халқ депутатлари вилоят Кенгаши, 107 нафари халқ депутатлари туман ва шаҳар Кенгашлари депутатлигига сайлангани ва уларнинг аксарияти партиямизнинг доимий фаоллари экани қайд этилди.

– Сайлов кампанияси даврида барча сиёсий партияларга тенг шароит, кенг имкониятлар яратилди,  – деди вилоят партия кенгаши раиси Алишер Тошматов. – Олдинда турган муҳим вазифамиз – Ўзбекистон Республикаси Президенти сайловида муносиб иштирок этиш. Сайлов кампанияси даврида партиямизнинг барча ташкилотларидан вилоят пар­тия кенгашидан то бошлан­ғич ташкилотларимизгача ишчанлик, талабчанликни юксак даражага кўтариш тақазо этилади. ЎзХДП вилоят, туман ва шаҳар кенгашлари, бош­лан­ғич ташкилотлар аҳоли, электорат вакилларининг фуқаролик позициясини мустахкамлаш, сиёсий-ҳуқуқий дунёқарашини кенгайтиришга хизмат қиладиган тарғибот ишларини фаол олиб боришимиз лозим бўлади.

Пленум сўнгида тегишли қарорлар қабул қилинди.

 

Ўктам АБДУЛЛАЕВ,

«Ўзбекистон овози» мухбири.




DB query error.
Please try later.