24.01.2015

ГОЛ УРМАСДАН ҒАЛАБА ҚОЗОНИБ БЎЛМАЙДИ

Австралияда давом этаётган Осиё чемпионати ярим финалчилари маълум бўлди

«Осиё кубоги — 2015» баҳсларининг дастлабки ярим финалчиси номи Ўзбекистон — Жанубий Корея терма жамоалари учрашувида аниқланди.

Мусобақанинг «В» гуруҳи ўйинларини муваффақиятли якунлаган футболчиларимиздан аксарият мухлисларимиз чорак финалда ҳам ғалаба кутган эди. Учрашув шиддатли ва муросасиз кечди. Асосий вақт­да ҳар икки жамоа аъзолари ўз дарвозалари дахлсизлигини сақлаб қолди — 0:0. Аммо қўшимча бўлимларда жамоамиз ҳимоясида йўл қўйилган хатолардан рақиблар унумли фойдаланишди — 0:2.

Афсуски, бизнинг жамоа кўплаб имкониятлардан фойдалана олмади.

— Жанубий Корея терма жамоасига қарши ўйин жуда шиддатли ва қизиқарли кечди, — деди учрашувдан сўнг терма жамоамиз бош мураббийи Миржалол Қосимов. — Буни финалга қиёсласа ҳам бўлади. Бу — футбол! Унда эса ғалаба ва мағлубият ёнма-ён юради. Биз мағлубиятга муносиб эмасдик. Бугун омад биздан очиқчасига юз ўгирди. Австралияга келиб, бизни қўллаб-қувватлаган ва мамлакатимиздаги мухлисларимизга катта миннатдорлик билдираман.

Менимча, ҳозирги таркиб билан бемалол жаҳон чемпио­нати саралаш баҳсларига киришса бўлади. Осиё чемпионати Игорь Сергеев, Сардор Рашидов, Шуҳрат Муҳаммадиев, Жамшид Искандеров каби ёшларимиз учун катта тажриба мактаби вазифасини ўтаб берди.

Дарҳақиқат, Ўзбекистон миллий терма жамоаси бундан тўрт йил муқаддам Қатарда ўтказилган Осиё чемпионатида кучли тўртликдан жой олганди. Афсуски, бу гал Австралияда ҳамюртларимиз учун мусобақанинг чорак финал учрашуви сўнгги «бекат» бўлди...

Хўш, терма жамоамизнинг сов­ринли ўринлар учун курашишига нима халал берди? Нега халқимиз ва кўпсонли мухлислар ишончи оқланмади?

Бу ҳақда мамлакатимиз футбол мутахассислари фикр­лари билан қизиқдик.

Биродар АБДУРАИМОВ, Ўзбекистонда хизмат кўрсатган мураббий:

— Футболда гол урмасдан ғалаба қозониб бўлмайди. Бунга Жанубий Корея терма жамоасига қарши ўтган ўйинда ҳам гувоҳ бўлдик. Умуман олганда, футболчиларимиз қитъамизнинг кучли терма жамоасига қарши ўйинда ёмон таассурот қолдирмади. Афсуски, юзага келган имкониятлар кўкка совурилгани ачинарлидир.

Бош мураббий Миржалол Қосимов ва унинг ёрдамчилари кучли рақибга қарши танлаган таркибини тушуна олмадим. Бундай муҳим учрашувда тажрибали Темур Копадзега ишонч билдирилган экан, нега Сервер Жепаровнинг захирада қолдирилганига ҳайронман?! Саудия Арабистони терма жамоаси билан ўйинда Жамшид Искандеровнинг ҳали анча тажрибасизлигини оддий мухлис ҳам ўз кўзи билан кўрганди. Аммо мураббийлар штаби бундан тўғри хулоса чиқармасдан учрашувда маҳоратли ўйинчига зарурат пайдо бўлганида яна Искандеровни майдонга туширганини тушуниб бўлмайди. Ёки ярим ҳимоячи Жасур Ҳасановнинг муҳим ўйин чоғида захирада қолдирилиши ҳам якунда терма жамоамиз учун қимматга тушди, деб ўйлайман.

Афсуски, қулай вазиятларда терма жамоа учун маҳоратли ижрочилар етишмади. Биринчи ўйинда КХДР дарвозасига гол урган бўлса-да, ҳужумчи Игорь Сергеевнинг ҳали бу каби йирик мусобақа учун руҳан тайёр эмаслиги билиниб қолди...

Бир сўз билан айтганда, Ўзбекистон Осиёда футболи жадал ривожланиб бораётган мамлакатлардан саналади. Бу каби мусобақаларда футболчиларимиз аллақачон ўзини кўрсатадиган фурсат келди. Муҳим учрашувларда эса оддий хатолар ҳам қимматга тушиши мумкинлигини Осиё чемпионати яна бир бор тасдиқлаб берди.

Тоҳир КОПАДЗЕ, «Неф­тчи»  профессионал футбол клуби раиси:

— Терма жамоамиздан умидимиз катта эди. Афсуски, футболчиларимизнинг ярим финал остонасида мағлубиятга учрагани аламли бўлди.

Гарчи, вакилларимиз мусобақани барвақт якунлаган бўлса-да, уларнинг кучли рақибга қарши чиройли ўйин намойиш этганлиги менда илиқ таассурот қолдирди. Аслида терма жамоамиз совринли ўринлар учун курашишга муносиб эди. Вақт ўтгани сайин футбол ҳам жадаллик билан ривожланиб бормоқда. Бош мураббий Миржалол Қосимовнинг нуфузли мусобақада қўрқмасдан бир қатор ёшларга ишонч билдирганлиги менга ёқди.

Жанубий Корея терма жамоасига қарши ўтган ўйин ҳақида тўхталадиган бўлсам, унда тажриба барибир ўз сўзини айтди. Бутун учрашув давомида тер тўккан футболчиларимизнинг айримларига ҳал қилувчи вазиятларда маҳорат етишмади. Агар ўйинда дуранг қайд этилиб, ғолиб пенальтилар сериясида аниқланганида ҳам бунчалик алам қилмасди.

Афсуски, вақтни ортга қайтариб бўлмайди. Бу каби мағлубиятлардан фожиа ясаш эмас, аксинча зарур хулосаларни чиқариш лозим. Осиё чемпионати учрашувлари юртимизда кўплаб янги истеъдодлар борлигини кўрсатиб берди. Асосийси, ана шу иқтидорли футболчиларни тўғри тарбиялаб, уларга кўпроқ имконият бериш керак. Чунки ҳадемай бошланадиган жаҳон чемпионати саралаш учрашувларида айнан улар Ватанимиз шарафини ҳимоя қилади. Австралияда қайд этилган натижалар келгусида муҳим мусобақалар олдидан жиддий сабоқ бўлади, деб ўйлайман.

Чорак финалнинг қолган учрашувларида қуйидаги натижалар қайд этилди: Хитой — Австралия — 0:2, Эрон — Ироқ — 3:3 (пенальтилар бўйича — 6:7), Япония — БАА — 1:1 (п.б — 4:5).

Мусобақа тақвимига кўра, 26 январь куни дастлабки ярим финал учрашуви ўтказилади. Унда Жанубий Корея — Ироқ терма жамоалари ўзаро куч синашади. Иккинчи финалчи номи эса 27 январда бўладиган Австралия — БАА жуфтлиги баҳсидан сўнг аниқланади.

 

Эркин ХОЛБОБО,

«Ўзбекистон овози» мухбири.




DB query error.
Please try later.