24.01.2015

КАСБГА САДОҚАТ

Ватанга меҳр, эл-юртга муҳаббатдан бошланади...

Дунёда шундай инсонлар бўладики, касб-корини ардоқлаб, ундан фахрланиб, уни ҳаётининг мазмуни деб билади.

Рейимбой Ешимбетов — Қорақалпоғистоннинг Хўжайли туманида туғилган. У 85 йиллик умрининг 60 йилини журналистика соҳасига, шундан 55 йилини эса, «Ўзбекистон овози» газетаси ривожига бағишлаган. Фидойи устоз ҳозир ҳам ўзининг кенг қамровли, кишини ўйлантирадиган ўткир мавзулардаги мақолалари билан тез-тез чиқиш қилади.

У бу йиллар давомида қанчадан-қанча фидойи инсонлар меҳнатини газета саҳифаларида ёритмади, қанчадан-қанча муаммоли масалаларни кўтариб чиқмади, қанчадан-қанча хаста дилларнинг кўнглига малҳам бўлмади, дейсиз. Айниқса, истиқлол шарофати боис, Рейимбой Ешимбетовнинг иккинчи фаол ҳаёти бошланди. Энди у юрагидаги гапларни, жамиятдаги  ўзгаришлар моҳиятини  атрофлича ёрита бошлади. Рейимбой Ешимбетов Қорақалпоғистон журналистлари орасида ўзига хос мактаб яратган жонкуяр, фидойи, ҳассос ижодкорлардан ҳисобланади.  Бу давр мобайнида унга кўпгина юқори мансабларга таклифлар бўл­ди, бироқ Рейимбой оға, ўз севган касбини ташлаб кетмади, унга бир умр содиқ қолди.    

ЎзХДП Қорақалпоғистон Республика Кенгаши раиси Қуатбай Қурбанбаев мақоламиз қаҳрамони ҳақида шундай илиқ фикрларни билдиради: — Рейимбой Ешимбетов адолатпарвар, жасур журналист, тиниб-тинчимайдиган кишилар тоифасидан. У партия­мизнинг фидойи аъзоси ҳисобланади. Рейимбой оға мана неча йилдирки, ўзининг таҳлилий, публицистик мақолалари орқали партиямиз ғояларини элимизга содда, оддий, халқчил тарзда тушунтириб келади. Биз у кишининг серунум ҳаётига ҳавас қиламиз.

— Устозим Рейимбой Ешимбетов жуда ҳам меҳнатсевар, оддий, жонкуяр ва самимий инсон, — дейди «Ўзбекистон овози» газетасининг Қорақалпоғистон Республикаси бўйича мухбири Мнажатдин Қутлимурадов. — У ҳар томонлама ибрат олишга арзигулик инсон. Устознинг фазилатлари жуда кўп, шулардан бири ҳалоллик, иккинчиси қатъиятлилик. Шу ўринда, бир воқеа ҳеч ёдимдан чиқмайди.

Бундан анча йиллар илгари Рейимбой оға билан чекка туманлардан бирида жойлашган Меҳрибонлик уйига, тарбияланувчиларнинг аҳволидан хабар олгани боргандик. Қиш мавсуми эмасми, хоналар бироз совуқ, газ босими ҳам паст экан.  Устоз ўша ернинг ўзида дар­ҳол керакли идораларга қўнғироқ қила бошлади. Лекин айни пайтда муаммони ечишнинг имкони бўлмади. Устознинг уйига етиб келиб хонадонига кирганимизданоқ, у варақлари сарғайиб кетган ён дафтаридан тегишли рақамларни топиб, тинмай қўнғироқ қила бошлади. Афсуски, ўша куни масала тўлиғича ҳал бўлмади. Биз эртасига саҳардан Меҳрибонлик уйига қараб йўл олдик. Яна ўша телефон, яна кимларгадир тушунтиришлар, хуллас кечга бориб, муаммо ўз ечимини топди. Хоналар керакли даражада иситилди, газ босими кўтарилди. Тарбияланувчиларнинг чеҳрасидаги шодликни кўрган Рейимбой оғанинг ўзи ҳам худди ёш боладек  қувонди. Улар билан қўшилишиб, айрим қўшиқларни биргаликда хиргойи ҳам қилди...

Дарҳақиқат, Рейимбой Ешимбетовнинг фидойиларча меҳнати давлатимиз, халқимиз томонидан ўз қадр ва қимматини топган. У Қорақалпоғистонда хизмат кўрсатган маданият ходими. Энг муҳими, устоз қанчадан-қанча одамларнинг самимий тилакларию дуоларини олишга му­я­ссар бўлган, бўлаётган Ҳазрати инсон...

Қуйида Рейимбой оғанинг ҳикматлар жавоҳиридан бир шингил келтирамиз:

Касбга садоқат — Ватанга меҳр, эл-юртга муҳаббатдан пайдо бўлади.

Ҳа, касбни муқаддас билиб, уни ардоқлаган киши эл-юрт ҳурматига, меҳрига сазовор бўлади. Бунга Рейимбой Ешимбетовнинг ҳаёт йўли ёрқин мисолдир. Қорақалпоғистонда энг шогирди кўп, энг машҳур журналист Рейимбой оға ҳисобланади.

Касбга садоқат, ҳалолликда ҳам ҳеч муболағасиз уни ибрат қилиб кўрсатишади. Биз эса ана шундай мухбиримиз, устозимиз борлигидан фахрланамиз. Устоздан ҳали газетхонларни мамнун этадиган кўп мақолалар кутамиз.

 

Обиддин МАҲМУДОВ,

«Ўзбекистон овози» мухбири.



DB query error.
Please try later.