Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2019   
Du Se Cho Pa Ju Sha Ya
25 26 27 28 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
13.01.2015

ҚИЙИН, АММО МУҲИМ ҒАЛАБА!

Футбол бўйича Австралияда давом этаётган XVI Осиё чемпионати финал босқичи илк учрашувини ҳамюртимиз, ФИФА рефериси Равшан Эрматов бошқарди... Ўзбекистон миллий терма жамоаси мусобақани ғалаба билан бошлади...

9 январь куни  Мельбурн шаҳридаги «Rectangular Sta­dium»да «А» гуруҳидаги Авс­тралия ва Қувайт терма жамоалари ўртасидаги баҳс билан «Осиё кубоги — 2015» учрашувлари бошланди. Бу спорт байрамининг биз учун қувонарли жиҳатларидан бири шундаки, Осиёнинг беш карра «Энг яхши ҳаками» номинацияси ғолиби, ФИФА рефериси, ҳамюртимиз Равшан Эрматов чемпионатнинг биринчи ўйинини бош­қарди.

Унинг фаолиятига бугун бутун жаҳон спорт жамоатчилиги юксак баҳо бермоқда. Жумладан, яқинда Халқаро футбол тарихи ва статистикаси федерацияси (IFFHS) томонидан эълон қилинган 2014 йилги дунёнинг энг яхши футбол ҳакамлари рўйхатида ҳамюртимиз бешинчи ўринни эгаллади. 

Эрматов ҳакамлик фаолия­ти давомида учинчи бор Осиё кубоги мусобақасида иштирок этмоқда. У 2004 ва 2011 йилги Осиё кубоги мусобақаларида ҳам ҳакамлик қилган. Жумладан, 2011 йили Қатарда бўлиб ўтган мусобақанинг Япония ва Австралия терма жамоалари ўртасидаги финал учрашувини юксак савияда бошқарганди. 

Осиё чемпионати финал босқичининг дастлабки учрашувида Австралия — Қувайт терма жамоалари куч синашди. Ҳисоб — 4:1. Ўйин давомида Равшан Эрматовга ён қанотларда ҳамюртимиз Абдуҳамидулло Расулов ва қирғизистонлик Баҳодир Қўчқоровлар ёрдам берди. 

Шунингдек, мусобақага яна бир ҳамюртимиз, ФИФА рефериси Валентин Коваленко ҳам таклиф қилинган.

Юртимиз футбол мухлисларини ҳаяжонга солган учрашув эса 10 январда ўтказилди. Шу куни дастлаб «А» гуруҳида Жанубий Корея — Уммон терма жамоалари ўзаро куч синашди — 1:0.

Сўнгра майдонга «В» гуруҳидан жой олган Ўзбекистон — КХДР футболчилари чиқди. Ушбу терма жамоалар бунгача беш маротаба ўзаро рўбарў келган. Шулардан учтасида ҳамюртларимиз зафар қучган, қолган икки ўйинда дуранг қайд этилганди. Шу боис ўйин олдидан аксарият мухлислар Миржалол Қосимов бош мураббийлик қилаётган мамлакатимиз футболчилари имкониятини юқори баҳолашаётган эди.

Гарчи учрашувни терма жамоамиз ҳужумкорлик билан бошлаган бўлса-да, рақиб дарвозасини ишғол этиш учун аксарият вазиятларда аниқлик етишмади. Танаффусга қадар ҳар икки жамоа ўз дарвозалари дахлсизлигини сақлаб қолди.

Иккинчи бўлимни ҳамюртларимиз бир мунча фаоллик билан бошлашди. Бу эса 62-дақиқада ўз самарасини берди. Терма жамоамиз сардори Сервер Жепаров қанотдан оширган тўпни Игорь Сергеев узоқ масофадан боши билан рақиб дарвозасига аниқ йўллади — 1:0. Ўйиннинг қолган дақиқаларида дарвозаларга бошқа тўп киритилмади ва Ўзбекистон миллий терма жамоаси Осиё кубогидаги дастлабки муҳим уч очкони ўз ҳисобига ёзиб қўйди.

—   Бугун муҳим ғалабани қўлга киритдик, — деди учрашувдан сўнг бош мураббий Миржалол Қосимов. — Бундай юқори савиядаги мусобақанинг бошланишида албатта, кучли ҳаяжон бўлади. Йигитлар ўзларини кўрсата олишди ва ғалабага эришдик. Ўзбекистондан шунча йўл босиб келган мухлисларимизга ҳам миннатдорлик билдираман. Уларнинг ҳам ғалабада ҳиссалари бор. Гуруҳдаги барча жамоалар кучли. Энди Хитой терма жамоасига қарши бўладиган ўйинга ҳозирлик кўрамиз. Охирги йилларда Хитойда ҳам футбол анча ривожланмоқда. Уларда битта футболчини ажратиб кўрсатиб бўлмайди, хитойликлар жамоавий ўйнашади. Навбатдаги ўйин олдидан футболчиларимиз хатти-ҳаракатларини чуқур таҳлил қиламиз ва фақат ғалаба учун майдонга чиқамиз.

Эътиборлиси, қитъа чемпионати баҳсларини тўрт юз нафарга яқин ўзбекистонлик футбол мухлислари бевосита Австралия стадионларида туриб кузатишмоқда. Мусобақа ташкилотчилари томонидан ўтказилаётган танловда ҳозирча «Энг яхши мухлислар жамоаси» номинациясида ҳам­юртларимизга тенг келадигани топилмаяпти.

Гуруҳнинг Хитой — Саудия Арабистони терма жамоалари ўйинида 1:0 ҳисоби қайд этилди.

Мусобақанинг қолган натижалари билан танишинг: «С» гуруҳи. Бирлашган Араб Амирликлари — Қатар — 4:1, Эрон — Баҳрайн — 2:0. «Д» гуруҳи. Фаластин — Япония — 0:4, Ироқ —  Иордания — 0:1.

Бугун гуруҳ босқичининг иккинчи тур учрашувлари бошланади. Унда Қувайт — Жанубий Корея, Уммон — Австралия терма жамоалари майдонга тушади.

Ҳамюртларимиз эса нав­батдаги ўйинни эртага Хитой вакилларига қарши ўтказади. Шунингдек, мухлислар «В» гуруҳининг иккинчи баҳсида КХДР — Саудия Арабистони жамоалари ўйини гувоҳи бўладилар.

 

Эркин ХОЛБОБО,

«Ўзбекистон овози» мухбири.




DB query error.
Please try later.