29.11.2014

УЧ КАРРА ЖАҲОН ЧЕМПИОНЛАРИ

Эртага Мексиканинг Кулиакан шаҳрида футбол бўйича жисмоний имконияти чекланганлар ўртасида навбатдаги жаҳон чемпионати бошланади.

Ҳар икки йилда ўтказиладиган мазкур мусобақада дунёнинг йигирма икки давлати вакиллари ғолиблик учун майдонга тушади.

Унда амалдаги жаҳон чемпиони — Ўзбекистон ампутантлар терма жамоаси аъзолари юртимиз шарафини ҳимоя қилади. Мавзур Умархўжаев бош мураббийлик қилаётган футболчиларимиз мусобақанинг «А» гуруҳидан жой олган. Ҳамюрт­ларимиз 30 ноябрда дастлабки учрашувни Украина терма жамоаси билан ўтказади. Орадан бир кун ўтиб, Ирландия, сўнгра 2 декабрда бразилияликлар билан учрашади.

— Жамоамизни олдинда жуда муҳим ва масъулиятли учрашувлар кутиб турибди, — дейди жамоа сардори, «Ўзбекистон ифтихори» фахрий унвони соҳиби Абдужамил Шукуров. Чемпионликни қўлга киритиш қанчалик юксак шараф бўлса, уни сақлаб қолиш шу қадар машаққатлидир. Биз фақат ғалаба қозониш учун майдонга тушишга одатланганмиз. Зоҳид Тошхўжаев, Қудрат Худойқулов, Нуриддин Турсунов, Ҳакимжон Ҳасанов, Азиз Азимов, Муҳаммадазиз Арабов, Ҳайдарали Турсунбоев сингари футболчилар билан анчадан бери биргаликда ўйнаб келаётганлигимиз туфайли майдонда тез тил топишамиз. Жамоамизнинг аҳил ва иноқлиги ғалабалар учун пойдевор бўлади. Бу гал ҳам фақат олтин медаль учун курашишга бел боғлаганмиз.

Жаҳон чемпионати олдидан Россияда ўтказилган халқаро турнирда қатнашиб, биринчи ўринни эгалладик. Бу жамоамиз учун ўзига хос синов вазифасини ўтади. Сўнгра, шу ой бошидан пойтахтимиздаги «Чиғатой» олий футбол маҳорат мактаби яшил майдонларида икки босқичда ўқув-машғулот йиғинларини ташкил этдик. Бизни ҳар томонлама қўллаб-қувватлаган, барча шарт-шароитларни яратиб берган Ўзбекистон футбол федерациясига миннатдорлик билдирамиз.

Шунингдек, жаҳон чемпионатида халқаро тоифадаги ҳакамларимиздан Олег Рубаков (Тошкент) ҳам иштирок этади.

 

Эркин ХОЛБОБО,

«Ўзбекистон овози» мухбири.



DB query error.
Please try later.