15.11.2014

КРЕДИТЛАШ ТИЗИМИ ЖАҲОН РЕЙТИНГИДА

юқори поғонага кўтарилди

Республика Марказий банки томонидан Ўзбекистон Савдо-саноат палатаси, Адлия вазирлиги, тижорат банклари раҳбар ходимлари ҳамда Халқаро молия корпорацияси вакиллари иштирокида «Ўзбекистонда кредитлаш тизими жаҳон рейтингида юқори поғонага кўтарилди» мавзусида матбуот анжумани ўтказилди.

Унда таъкидландики, яқинда Жаҳон банки ҳамда Халқаро молия корпорацияси «Бизнесни юритиш — 2015» кўрсаткичи бўйича дунё мамлакатларининг янги рейтингини эълон қилди. Унга кўра, Ўзбекистон қулай ишбилармонлик муҳити кўрсаткичлари бўйича сўнгги бир йилда 8 поғона юқорига кўтарилди. «Кредит олиш» индикатори бўйича рейтинг кўрсаткичлари бундан-да юқори ўсиши таъминланди — ўтган йилдагига нисбатан 26 поғона илгарилади.

— Банк тизимини ислоҳ қилиш борасида амалга оширилаётган изчил чора-тадбирлар мамлакатимиз иқтисодий қудратини юксалтириш, тижорат банк­ларининг молиявий барқарорлигини мустаҳкамлаш, улар фаолиятини хал­қаро стандартлар даражасига олиб чиқишда мустаҳкам замин бўлмоқда, — дейди Республика Марказий банкининг Тижорат банклари инвестиция портфелини мониторинг қилиш департаменти директори Азамат ҚОСИМОВ. — Шунингдек, бу борада Ўзбекистон эришаётган натижалар нуфузли халқаро молия институтлари томонидан ҳам эътироф этилмоқда. Қолаверса, дунёнинг баъзи мамлакатларида иқтисодий ўсиш суръатларининг сезиларли пасайиши, айрим ривожланган давлатлар ва йирик молия институтларининг рейтинг баҳолари тушиши кузатилаётган бир вақтда мамлакатимиз банк тизимининг бундай юқори баҳоланиши соҳада амалга оширилаётган ислоҳотлар самарасидир. Мамлакатимизда банк тизими доимий қўллаб-қувватланиши, Ўзбекистон Республикаси Марказий банки кредит ахбороти алмашинуви ҳамда гаров таъминоти бўйича келишувларни амалга ошириш юзасидан муайян тажриба тўплагани рейтинг баҳосининг ўсишига муҳим замин яратмоқда.

Банк тизими томонидан ўтган йиллар давомида кредитлашнинг тартиб-қоидаларини соддалаштирилганлиги, йиллик фоиз ставкалари пасайтирилганлиги тадбиркорлар ва хорижий инвесторлар учун янада қулай муҳит яратди. Хусусан, бу борада Марказий банкнинг қайта молиялаш ставкаси 2014 йилнинг 1 январидан бошлаб 12 фоиздан 10 фоизга пасайтирилди. Маълумот ўрнида айтиш ўринлики, МДҲ мамлакатларида қайта молиялаш ставкаси нисбатан паст бўлишига қарамасдан, кредит қўйилмаларининг ўсиш кўрсаткичи 3 фоиздан 20 фоиз оралиғида ўзгариб турибди. Ўзбекистонда эса ушбу кўрсаткич 30 фоиздан ортиқроқни ташкил этмоқда.

— Юртимиз банк тизимининг жаҳон андозаларига мос даражада хизмат кўрсатиши банкларимизнинг халқаро майдонда ҳам нуфузини тобора оширмоқда, — дейди Тошкент молия институти Бюджет ҳисоби ва давлат жамғармалари факультети декани Шамсиддин Аллаяров. — Бу эса банк тизимининг шу йилнинг апрель ойида «Мудис» халқаро рейтинг агентлигининг бешинчи бор «бар­қарор» рейтинг баҳосини олишига имкон берган бўлса, орадан кўп вақт ўтмай юртимиз банк тизими яна бир эътиборга молик муваффақиятни қўлга киритди, хусусан, Халқаро молия корпорацияси шу йилнинг октябрь ойида эълон қилган «Бизнесни юритиш — 2015» ҳисоботида давлатларнинг янги рейтингини эълон қилди. Ўзбекистон кредитлаш тизими бўйича янги рейтингга кўра, 26 поғонага кўтарилиб, 104-ўринни эгаллади, «Кредит алмашинуви индекси» бўйича эса 8 балли тизимда 7 баллга баҳоланди. Бу кўрсаткич Иқтисодий ҳамкорлик ва ривожланиш ташкилотига аъзо айрим давлатларнинг рейтингидан анча юқоридир.

— Юртингиз банк тизимининг ишончли ва самарали ишлаётгани халқаро рейтинг кўрсаткичларида ўз ифодасини топмоқда, — дейди  сингапурлик эксперт Бернаро Жефф­ри Моранте. — Бу эса хорижий сармоядорларнинг мамлакатингизга бўлган ишончини янада мустаҳкамлайди.

Ўзбекистонда кредитлаш борасида амалга оширилаётган ишлар эътиборга молик. Шунинг учун ҳам бу соҳанинг жаҳон рейтингида юқори поғонага кўтарилгани тўғри ва ҳақ­қоний берилган рейтинг баҳоси, деб ҳисоблайман.

 

Тоштемир ХУДОЙҚУЛОВ,

«Ўзбекистон овози» мухбири.

 




DB query error.
Please try later.