28.10.2014

ЮКСАК ҒАМХЎРЛИК ВА ЭЪТИБОР

туфайли мамлакатимиз паралимпиячилари Инчеонда ўтказилган ёзги ПараОсиё ўйинларида ёрқин ғалабаларни қўлга киритишди

Шу йилнинг 18 — 24 октябрь кунлари Жанубий Кореянинг Инчеон шаҳрида жисмоний имконияти чекланган ва ногирон спортчилар ўртасида ўтказилган ёзги ПараОсиё ўйинларида Ватанимиз шарафини муносиб ҳимоя қилган спортчиларимиз юртимизга қайтиб келди. Улар Тошкент халқаро аэропортида Ўзбекистон Миллий паралимпия ассоциацияси вакиллари, кенг спорт жамоа­т­чилиги, ота-оналар, мухлислар ва журналистлар томонидан тантанали кутиб олинди.

ПараОсиё ўйинларида йигирма етти нафар ҳамюртимиз иштирок этиб, жами 31 (22 олтин, 5 кумуш ва 4 бронза) та медални қўлга киритди. Умумжамоа ҳисобида вакилларимиз қирқ бир давлат орасида бешинчи ўринни эгаллади. Яна бир диққатга сазовор жиҳати, паралимпиячиларимиз мусобақа давомида ўн икки маротаба Осиё рекордларини янгилашга муваффақ бўлдилар.

— Давлатимиз раҳбарининг 2013 йил 25 февралда қабул қилинган Ўзбекистон спортчиларини 2016 йилда Рио-де-Жанейро (Бразилия)да бўлиб ўтадиган ХХХI ёзги Олимпия ва XV Паралимпия ўйинларига тайёрлашга оид қарори ушбу ғалабалар омили бўлди, — дейди Ўзбекистон Миллий паралимпия ассоциацияси бош котиби Омон Ғафуров. — Қарорга мувофиқ спортчиларимизнинг замонавий ўқув-машғулот йиғинларини ўтказиши, тажриба ва маҳоратини ошириши, нуфузли мусобақаларга муносиб тайёрланиши учун барча шарт-шароитлар яратилди. Инчеонда ўтказилган баҳсларга тўхталадиган бўлсак, ғолиб ва совриндорларга медаллар билан биргаликда 2016 йили Рио-де-Жанейрода бўладиган навбатдаги Паралимпия ўйинларига йўлланмаларнинг тақдим этилиши ҳар бир учрашувнинг муросасиз ва шиддатли кечишини таъминлади.

ПараОсиё ўйинларида иштирок этган ҳамюртларимиз чинакам ирода ва матонат намойиш этдилар. Жумладан, сузиш бўйича вакилларимиздан Кирилл Паньков тўртта, Дмитрий Хорлин учта, енгил атлетика бўйича Фахриддин Ҳамроев тўрттадан олтин медаль билан тақдирланганлигини алоҳида эътироф этиш лозим.

— Ушбу ғалабаларимиз мамлакатимизда ҳар бир инсоннинг иқтидор ва салоҳиятини намоён этиши учун яратилган кенг имкониятлар натижаси, деб биламан, — дейди ПараОсиё ўйинлари ғолиби Фахриддин Ҳамроев. — Шундай Ватанда туғилиб вояга етаётганимдан, жаҳон ареналарида мамлакатимиз шарафини муносиб ҳимоя қилаётганимдан бахтиёрман. Ниятим эса 2016 йили Бразилияда бўладиган Паралимпия ўйинларида давлатимиз байроғини баланд кўтариб, юртимиз шуҳратига шуҳрат қўшишдир.

ПараОсиё ўйинлари дастуридан жой олган дзюдо беллашувларида гиламга чиққан ҳамюртларимизнинг деярли барчаси ғолиб ва совриндорлар сафидан жой олганликлари қувонарлидир. Дзюдочиларимиз турли вазн тоифалари бўйича 7 та олтин ва биттадан кумуш ҳамда бронза медали билан тақдирландилар.

— Инчеонда ўтган беллашувларда Президентимиз ва халқимизнинг юксак эътибори ва ишончини доимо ҳис этиб, фақат ғалаба учун гиламга чиқдик, — дейди дзюдо бўйича  ПараОсиё ўйинлари ғолиби Севинч Салаева. — Бу бизга  катта куч ва ғайрат бағишлади. Оила аъзоларимга мусобақадан олтин медаль билан қайтишга сўз бергандим. Берган ваъдамни устидан чиққанимдан бахтиёрман. Энди бор эътиборимни — Бразилияда бўладиган XV ёзги Паралимпия ўйинларига пухта ҳозирлик кўришга қаратаман.

Спортчиларимизни тантанали кутиб олиш маросимида Ўзбекистон Ресубликаси Бош вазири ўринбосари Адхам Икрамов иштирок этди.

 

Эркин ХОЛБОБО,

«Ўзбекистон овози» мухбири.

 




DB query error.
Please try later.