21.10.2014

БАНДЛИК ДАСТУРИ ЛОЙИҲАСИ МАЪҚУЛЛАНДИ

Бугунги кунда дунёнинг қатор давлатлари ишсизликни бартараф этиш йўллари ҳақида ҳамон бош қотирмоқда. Европа Иттифоқига аъзо давлатлар раҳбарлари тобора кучайиб бораётган ишсизликка қарши курашиш бўйича ягона ечим, ишончли йўл тополмаяпти.

Ана шундай шароитда мамлакатимизда бир неча йилдан бери қабул қилинаётган иш ўринлари ташкил этиш ва аҳоли банд­лигини таъминлаш дастури муваффақиятли амалга ошириб келинмоқда. Бугун эса ушбу дастур самарадорлигини кўтариш, ижро масъулияти ва маданиятини ошириш учун нима қилиш керак, деган саволнинг ечими устида иш олиб борилмоқда. Олий Мажлис Қонунчилик палатасидаги ЎзХДП фракцияси томонидан 2015 йилда иш ўринлари ташкил этиш ва аҳоли бандлигини таъминлаш дас­тури лойиҳаси муҳокама қилиниб, масала юзасидан фикр алмашилди.

Меҳнат ва аҳолини ижтимоий муҳофаза қилиш вазирининг биринчи ўринбосари Ботир Алимуҳамедов берган маълумотга кўра, дастур ло­йиҳасида келгуси йил 987,5 мингдан ортиқ иш ўрни ташкил этиш режалаштирилган. Хусусан, касб-ҳунар коллежларининг 487 минг нафар битирувчиси, хориждан қайтаётган 400 минг нафардан ортиқ фуқарони ишга жойлаштириш чоралари кўзда тутилган.

Дастур лойиҳасини ишлаб чиқишда ҳудудлар ва тармоқларнинг ривожланиш хусусиятлари, иш ўринларига бўлган эҳтиёж ва имкониятлар ҳар томонлама ҳисобга олинган. Умуман, дастур ло­йиҳаси аввалги йиллар мобайнида тўпланган тажриба асосида янада такомиллашган.

Ўрта махсус касб-ҳунар таълими марказининг битирувчиларни ишга жойлаштириш бош­қармаси бошлиғи ­Абдухалил Раҳмоновнинг таъкидлашича, битирувчиларни ишга жойлаштириш масалаларини асосан йилнинг даст­лабки икки чорагида ҳал этиш кўзда тутилмоқда. Хусусан, уч томонлама шартномаларни ўз вақтида расмийлаштириш, битирувчиларнинг амалиёт ўташ жараёнини юқори даражада ташкил этиш зарур.

Ҳудудлар ва тармоқларнинг ривожланиш хусусиятлари ва эҳтиёжларига қараб, кадрлар тайёрлашни такомиллаштириш мақсадида бу йил яна 30 касб-ҳунар коллежининг таълим йўналишлари ўзгартирилган. Ўз ишини ташкил қилмоқчи бўлаётган битирувчиларнинг иқтисодий кўникмаси ва ҳуқуқий хабардорлигини ошириш бўйича ҳар бир коллежда масъулиятни кучайтириш чоралари кўриляпти.

Маълумки, янги иш ўрни очиш ўз-ўзидан бўладиган жараён эмас. Бунинг учун ишончли иқтисодий асос керак. Акс ҳолда, ҳеч қандай иш ўрни яратилмайди ёки яратилгани ҳам барқарор бўлмайди.

Иқтисодиёт вазирлигининг демография ва меҳнат бозори бўлими бошлиғи Зафар Шарипов берган маълумотларига кўра, дастур лойиҳасидаги иш ўринлари ҳудудлар ва иқтисодиёт тармоқларини ривожлантиришга қаратилган дастурлар билан узвий боғлиқ. Саноат, қишлоқ хўжалиги, хизмат кўрсатиш каби соҳалар бўйича яратилиши кутилаётган иш ўринлари таснифлаб чиқилган. Хусусан, инвестиция дастурига асосан келгуси йил мамлакатимизда 158 та лойиҳани амалга ошириш режалаштирилган. Мазкур лойиҳалар бўйича 6 мингдан ор­тиқ энг қиммат ва замонавий иш жойлари ташкил этилади.

Меҳнат ва аҳолини ижтимоий муҳофаза қилиш, Иқтисодиёт ва­зирликлари дастурлар лойиҳаларини шакллантириш, иш ўринлари ҳақидаги барча маълумотлар очиқлигини таъминлашга алоҳида эътибор бермоқда. Иқтисодий дастурлар ва лойиҳалар, иш ўринлари ҳақидаги батафсил маълумотларни вазирликларнинг расмий сайтларидан олиш мумкин.

Иш ўринлари ташкил этиш ва аҳоли бандлигини таъминлаш дас­тури лойиҳаси хусусида депутатлар ўз фикр-мулоҳазаларини билдирди.

Алишер Содиқов, Олий Мажлис Қонунчилик палатасидаги ЎзХДП фракция­си аъзоси:

Дастур лойиҳасида иш ўринлари ҳақидаги маълумотлар ҳудудлар ва тармоқларнинг ҳозирги ривожланиш ҳолати ва имкониятларидан келиб чиқиб белгиланиши жуда муҳим. Лойиҳага киритилган ҳар бир маълумот ёки кўрсаткич ортида қанчадан-қанча инсонлар, оилалар тақдири турганини унутмаслик лозим.

Сурхондарё вилояти Сари­осиё тумани бўйича ташкил этилиши мўлжалланган иш ўринлари ҳақидаги маълумотлар билан танишиш жараёнида ҳудудлар ва соҳаларнинг имкониятлари янада чуқур таҳлил қилиниши керак, деган хулосага келдим. Ҳаёт ҳар куни ўзгаришда, ҳар куни янги имкониятлар очилади. Иш ўринлари ташкил этиш ва аҳоли банд­лигини таъминлаш бўйича ҳудудлар доирасида манзилли дастурлар шакллантирилиши жараёнида бунга алоҳида эътибор бериш керак бўлади. Халқ депутатлари маҳаллий Кенгашларидаги пар­тия­миз гуруҳлари билан шу масала юзасидан доимий ишлашимиз зарур, деб ҳисоблайман. Шунда дас­турнинг ижроси қийин бўл­майди. Парламент ва депутатлик назоратининг самарадорлиги ошади.

Шуҳрат Турсунбоев, Олий Мажлис Қонунчилик палатасидаги ЎзХДП фракция­си аъзоси:

— Дастурнинг кўлами ва қамрови йилдан-йилга кенгайиб, такомиллашиб боряпти. Ўтган йили дастурга касб-ҳунар коллежлари битирувчиларини ишга жойлаштириш чора-тадбирлари бўйича махсус банд киритилган эди ва бу ўзининг ижобий натижасини бермоқда.

Келгуси йилги дастур лойиҳасида хорижга ишлаш учун кетиб, қайтиб келаётган фуқароларимизни ишга жойлаштириш, уларга қулай шароит яратиш бўйича чоралар ҳам кўзда тутилган. Одамлар яқинлари ва оиласи ёнида бўлиб ишлаши, ўзи истиқомат қилаётган туман ёки шаҳар равнақига ҳисса қўшиши жуда муҳим аҳамиятга эга. Бу масалада комп­лекс чоралар белгиланаётгани дас­турнинг ҳаётийлиги ва дол­зарб­лигини янада оширади.

Фикр-мулоҳазалардан сўнг ЎзХДП фракцияси 2015 йилда иш ўринлари ташкил этиш ва аҳоли бандлигини таъминлаш дастури лойиҳаси бўйича таклифларини билдирди ҳамда унинг қабул қилинишини қўллаб-қувватлади.

Дастур лойиҳаси бугун Олий Мажлис Қонунчилик палатаси ялпи мажлисида муҳокама қилиниши режалаштирилган.

 

Тўлқин ТЎРАХОНОВ,

«Ўзбекистон овози»

мухбири.

 



DB query error.
Please try later.