16.10.2014

ИҚТИСОДИЙ БАРҚАРОРЛИККА ЭРИШИШ

кафолатлари янада мустаҳкамланади

Бугунги кунга келиб қимматли қоғозлар бозорининг иқтисодиётдаги аҳамияти тобора ошиб бормоқда. Таҳлилларга кўра, мамлакатимизда қимматли қоғозлар эгаларининг сони йилдан-йилга кўпаймоқда. Бу бежиз эмас, албатта. Негаки, бозор иқтисодиётининг энг муҳим таркибий қисми бўлган қимматли қоғозлар бозори барқарор молиявий ҳолатга ижобий таъсир кўрсатиб, мамлакат иқтисодий салоҳиятини ва аҳоли фаровонлигини оширишга кенг йўл очади. Хўш, қандай қилиб?

Қимматли қоғозлар бозори узоқ муддатли ресурсларни миллий иқтисодиётимиз, унинг рақобатбардош ва жадал ривожланаётган тармоқларига йўналтириш, ишлаб чиқаришни модернизация қилиш ҳамда техник ва технологик жиҳатдан қайта жиҳозлаш жараёнини инвестиция билан таъминлашга ёрдам беради. Демак, қимматли қоғозлар бозори молия бозорининг муҳим бўғини сифатида инвестиция муҳитини янада ривожлантириш билан бевосита боғлиқ бўлиб, бу орқали барқарор иқтисодий ҳолатга эришилади, ишлаб чиқаришни самарали такомиллаштирилишига кенг йўл очади.

Олий Мажлис Қонунчилик палатасидаги ЎзХДП фракцияси йиғилишида айнан ана шу масалага эътибор қаратилди. Йиғилишда «Ўзбекистон Республикасининг «Қимматли қоғозлар бозори тўғрисида»ги Қонунига ўзгартиш ва қўшимчалар киритиш ҳақида»ги, «Инвестиция ва пай фонд­лари тўғрисида»ги ва «Мамлакатда инвестиция иқлими ва ишбилармонлик муҳитининг янада такомиллаштирилиши муносабати билан Ўзбекистон Республикасининг айрим қонунларига ўзгартиш ва қўшимчалар киритиш ҳақида»ги қонунлар лойиҳалари муҳокама этилди.

Иштирокчилар дастлаб «Ўзбекистон Республикасининг «Қимматли қоғозлар бозори тўғрисида»ги Қонунига ўзгартиш ва қўшимчалар киритиш ҳақида»ги қонун лойиҳасини кўриб чиқишди.

Таъкидландики, қонун лойиҳасида амалда бўлган қонундаги қатор асосий тушунчаларни ўзгартириш билан бир қаторда, қимматли қоғозлар чиқариш, уни давлат рўйхатидан ўтказишни тартибга солиш,  шунингдек, қимматли қоғозлар билан битимлар тузиш ва қимматли қоғозлар бозорида профессионал фаолиятни амалга оширишга доир меъёрларни янада такомиллаштириш назарда тутилмоқда. Бундан ташқари, ахборотларни ошкор қилишни тартибга солиш ва қимматли қоғозлар бозори иштирокчиларининг жавобгарлиги юзасидан Қонунга алоҳида моддалар сифатида ўзгартиш ва қўшимчалар киритилмоқда.

Сайдивали АҲМЕДОВ, Олий Мажлис Қонунчилик палатаси депутати, ЎзХДП фракцияси аъзоси:

 — Қонун лойиҳасининг асосий ғояси қимматли қоғозлар бозорининг республика молия бозоридаги ва умуман иқтисодиётдаги мавқеъини янада ошириш ҳамда рақобатбардошлигини таъминлаш ҳисобланади. Ушбу мақсадга эришиш учун қонун лойиҳаси республика фонд бозорининг замонавий ахборот технологияларига ўтишини таъминлаш ва янги молиявий инструментларни жорий этиш ҳамда қимматли қоғозлар бозорини тартибга солиш бўйича энг илғор халқаро амалиётни мамлакатимизда татбиқ этишни назарда тутиши билан мақсадга мувофиқдир.

Йиғилиш кун тартибига асосан, депутатлар ва мутасадди ташкилотлар вакиллари «Инвестиция ва пай фондлари тўғрисида»ги Ўзбекистон Республикаси қонуни лойиҳасини ҳам муҳокама этишди.

Алоҳида қайд этилдики, бугун ­халқаро амалиётда инвестиция ва пай фондлари тобора ривожланиб, молия бозорининг муҳим институтларидан бирига айланди. Бундай фондлар орқали пул маблағлари ҳамда бошқа активларни самарали бошқариш учун профессионал субъектларга топшириш механизми шаклланади. Бу иқтисодиётда инвестициялар оқимини самарали ташкил этиш, аҳоли маблағларининг айланиши ва самарадорлигини таъминлашда қатор қулайликлар яратади.

Абдуқаҳҳор ЮСУПОВ, Олий Мажлис Қонунчилик палатаси депутати, ЎзХДП фракцияси аъзоси:

Мазкур қонуннинг қабул қилиниши фонд бозори томонидан капиталнинг иқтисодиёт тармоқларига эркин ўтишини таъминлаш, инвесторлар ва аҳолининг кенг қатламига капитал бозорига кириши учун шароит яратиш, шунингдек, ­жамғармаларни шакллантириш ва уларни кўпайтиришга муқобил имкониятлар кўламини кенгайтириш каби вазифаларнинг янада самарали бажарилишига хизмат қилади. Ўз-ўзидан равшанки, бундай шароитда кенг аҳоли қатлами, айниқса, қўлида унча катта маблағи ёки бошқа активлари бўлмаган фуқароларнинг ижтимоий-иқтисодий фаоллиги ортади.

Бундан ташқари, йиғилишда «Мамлакатда инвестиция иқлими ва ишбилармонлик муҳитининг янада такомиллаштирилиши муносабати билан Ўзбекистон Республикасининг айрим қонунларига ўзгартиш ва қўшимчалар киритиш ҳақида»ги қонун лойиҳаси кўриб чиқилди.

Таъкидландики, ушбу қонун лойиҳасининг қабул қилиниши мамлакатимизда инвестициявий иқлим ва ишбилармонлик муҳитининг янада яхшиланишига, тадбиркорлик фаолиятини амалга оширишга қулай шароитлар яратилишига хизмат қилади.

Умуман олганда, фракция йиғилишида кўриб чиқилган барча қонунлар лойиҳалари ЎзХДП дастурий мақсадлари амалга ошишида муҳим ўрин тутади. Шундан келиб чиқиб, ЎзХДП фракция­си аъзолари қонун лойиҳаларига ўз таклифларини билдиришди. Чунки, мазкур қонунларни қабул қилиш орқали хизмат кўрсатиш янада ривожланиб, янги иш ўринлари очилади. Демак, бундан партия электорати манфаат кўради. 

 

Лазиза ШЕРОВА,

«Ўзбекистон овози» мухбири.



DB query error.
Please try later.