11.10.2014

УСТОЗНИ ЭЪЗОЗЛАГАН ЮРТ

Ҳар бир мураббий меҳр кўрсатиш ва астойдил ғамхўрлик қилиш билангина ўқувчининг кўнгил дунёсига кириб боради. Шу орқали ёш авлоднинг эътиборини, эътирофини қозониш, инсоний туйғуларини шакллантириш мумкин.

Президентимиз ўқитувчи ва мураббийларга йўл­лаган табригида ...Қанча-қанча янги таълим стандартлари, ўқув дастурлари, қўлланма ва дарсликларни ишлаб чиқиб, амалда жорий этиш, уларни ҳар бир ўқувчи, ҳар бир талабанинг онгу шуурига синг­дириш учун бутун соҳа ходимлари, сиз, ҳурматли, муаллим ва устозлар бу мактабдан аввало ўзингиз ўтганингиз, беминнат хизмат қилиб келаётганингизни ҳақиқий фидойилик намунаси, десак, ҳеч қандай хато бўлмайди, дея камтарин меҳнатимизга юксак баҳо берди.

Ўзим таълим бераётган мактаб мисолида айтадиган бўлсам, ўқувчиларимизнинг қўлга киритган ютуқларидан ҳар қанча фахрлансам арзийди. Бу ерда устозларнинг дарс ўтиши ва ўқувчиларнинг юксак даражада билим олиши учун барча шароитлар яратилган. Масалан, кимё фанидан ўтилаётган дарс жараёнида замонавий лаборатория, энг сўнгги пед-технологиялардан фойдаланаяпмиз. Иккита компьютер синфига эгамиз.

Айни пайтда билим даргоҳимизда 52 нафар педагог 425 нафар ўқувчига таълим-тарбия бермоқда. Мен доимий равишда Абдурашид Очилов, Нодира Исломова, Ҳабиба Тиловова каби тажрибали ўқитувчилар билан ҳамкорлик қиламан. Ўзаро тажриба алмашамиз, фикрлашамиз.

Педагогик жамоамиз учун Ўзбекистон Республикасининг «Таълим тўғрисида»ги Қонуни, «Кадрлар тайёрлаш миллий Дастури» таълим ислоҳотларини чуқурлаштириш ҳамда ҳу­қуқий ва ташкилий педагогик ишларнинг асоси бўлиб хизмат қилмоқда. Президентимизнинг «Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида»ги қарори ҳамда бугунги кунда ҳаётга изчил татбиқ этилаётган «Соғлом бола йили» Давлат дастурининг мазмун-моҳияти, аҳамияти ҳақида ҳар бир ўқитувчи ўқувчиларга батафсил тушунчалар бериб бормоқда.

Ўқувчиларимиз фан олим­­пиадалари, билимлар беллашуви ва яна кўплаб кўрик-танловларда фаол иштирок этиб, фахрли ўринларни эгаллаб келишаяпти. Мактабимиздаги ҳар бир педагог ўз тажриба ва малакаси, касбий маҳорати, тайёргарлик даражаси, касбга бўлган муносабатини ўзгартиришга, тинимсиз изланишга ҳаракат қилади.

Меҳнат фаолиятимга 30 йил тўлаяпти. Ана шу давр­даги камтарона меҳнатларим давлатимиз томонидан юқори баҳоланганидан мамнунман. Бу эътиборни жамоамиз эришаётган ютуқ­ларнинг эътирофи деб биламан. Бундан ке­йин ҳам бор куч ва билимимни баркамол авлод тарбиясига бағишлашга тайёрман.

 

Саида УМРҚУЛОВА,

Оқдарё туманидаги
8-умумтаълим мактабининг кимё фани ўқитувчиси, «Фидокорона хизматлари учун» ордени соҳибаси.



DB query error.
Please try later.