11.10.2014

ҲУРМАТ ВА ЭЪЗОЗ ФИДОЙИЛИККА УНДАЙДИ

Ҳаёт шиддат билан ўзгариб бормоқда, биз кутган, кутмаган синовларни олдимизга қўймоқда. Жамият эртага қанақа бўлади, инсоният қандай яшайди, тараққиёт тезлашадими, сустлашадими?.. Тарих тажрибасидан маълумки, таълим тизимининг ривожланиши бу жараёнда ҳал қилувчи аҳамиятга эгадир. Шунинг учун мамлакатимизда ёш авлод таълим-тарбияси, кадрлар тайёрлаш тизимига қаратилаётган эътибор давлат сиёсати даражасига кўтарилган ва бу ҳар кунги ҳаётимизда ўзининг самарасини намоён этмоқда.

Ҳақиқатдан ҳам, жамиятнинг бугуни ва эртаси таълим тараққиётига, бугун тарбияланаётган ёшларнинг билим ва истеъдодига бевосита боғлиқ. Айниқса, инсоннинг қалби ва онгини эгаллаш, ёшларнинг маънавий дунёсини издан чиқаришга қаратилган турли хавф-хатарлар тобора кучайиб бораётган ҳозирги шароитда ўғил-қизларни она-юртга муҳаббат ва садоқат руҳида тарбиялаш ғоятда муҳим аҳамиятга эга. Бу юксак вазифалар ўқитувчи ва мураббийлар зиммасидадир.

Президентимиз мамлакатимиз ўқитувчи ва мураббийларига йўллаган байрам табригида ҳам бу масалага алоҳида эътибор қаратди. Ғоят масъулиятли ишни адо этиб келаётган устоз ва мураббийларнинг ҳеч нарса билан ўлчаб, қиёслаб бўлмайдиган олижаноб меҳнатини ҳақиқий фидойилик намунаси, деб эътироф этди. Ўз навбатида, бу масъулиятли ва шарафли касб эгалари меҳнати қадрланмоқда.

Табрикда биргина сўнгги беш йилда ойлик иш ҳақи халқ таълими муассасаларида 2,9 баробар, ўрта махсус, касб-ҳунар таълими тизимида қарийб 4 марта, олий таълим соҳасида 3,6 карра оширилгани, минглаб устоз ва мураббийлар, профессор-ўқитувчиларимиз Ватанимизнинг юксак унвонлари, орден ва медаллари билан тақдирлангани алоҳида таъкидланди.

Бу юртимизда соҳа ходимларига кўрсатилаётган чуқур ҳурмат ва эҳтиромнинг намунаси, албатта. Энг муҳими, ушбу эътибор ўқитувчи ва мураббийларга янада жонкуярлик билан меҳнат қилиш, ёш авлод камоли йўлида тинимсиз изланиши учун ил­ҳом беради.

ЎзХДП дастурида мустақил ҳаётга қадам қўяётган ёшлар учун таълим олиш, касб танлаш, адолатли, ҳамма учун тенг ва ижтимоий мақбул шароитлар яратиш, ўқув юртларини битириб чиққандан сўнг уларни ишсизликдан ишончли кафолатлаш, шунингдек, педагог ходимлар меҳнатига ҳақ тўлашни босқичма-босқич ошириб бориш ва маошлар миқдорини ушбу касбнинг анъанавий нуфузига мос даражага етказиш учун зарур имкониятлар излаб топиш масалаларига эътибор қаратилган. Ватанимиз келажаги йўлида фидойи бўлиб меҳнат қилаётган ўқитувчи ва мураббийлар меҳнатини қадр­лаш, уларни ижтимоий ҳимоя қилиш партия­мизнинг дастурий вазифаларидан ҳисобланади.

Шу ўринда таъкидлаш керакки, ҳозирги тезкор давр, тобора ривожланиб бораётган ахборот замонида таълим-тарбия масаласи кундан-кун долзарб аҳамият касб этяпти. Таълим тизимини замонавий ахборот технологияларига, илғор стандартларга уйғун тарзда такомиллаштириб бориш тақозо қилиняпти. Мамлакатимизда бу масалалар бўйича керакли ишлар амалга ошириляпти ва улар янада изчил тус олади, албатта. Чунки жамият тақдири ҳар доим таълим соҳасига чамбарчас боғлиқ бўлади.

Гулноза ЭРНАЗАРОВА,

Олий Мажлис Қонунчилик палатаси депутати,

ЎзХДП фракцияси аъзоси.



DB query error.
Please try later.