Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
11.10.2014

НАВБАТ — ПАРАОСИЁ ЎЙИНЛАРИГА

Шу йилнинг 18-24 октябрь кунлари Жанубий Кореянинг Инчеон шаҳрида ПараОсиё ўйинлари бўлиб ўтади

Қитъамизнинг мазкур нуфузли мусобақасида 42 мамлакатдан тўрт минг нафардан зиёд спортчи ғолиблик учун баҳслашади. Ушбу йирик спорт анжуманида 27 нафар ҳамюртимиз енгил атлетика, дзюдо, сузиш ва ўқ отиш турлари бўйича мусобақаларда Ватанимиз шарафини ҳимоя қилади. 

Куни кеча Ўзбекистон Миллий олимпия қўмитасида паралимпиячиларимизни кузатишга бағишланган тадбир ўтказилди. Унда сўзга чиққан Ўзбекистон Миллий Олимпия қўмитаси президенти М.Усмонов, Маданият ва спорт ишлари вазирининг биринчи ўринбосари М.Алиев ва бошқалар Президентимиз Ислом Каримов раҳнамолигида мамлакатимизда олимпия ҳаракатини ривожлантиришга қаратилаётган юксак эътибор самарасида жисмоний имконияти чекланган фуқаролар ўртасида спортга қизиқиш тобора ортиб бораётганини алоҳида таъкидлашди.

Давлатимиз раҳбарининг 2013 йил 25 февралдаги «Ўзбекистон спортчиларини 2016 йилда Рио-де-Жанейро шаҳрида (Бразилия) бўлиб ўтадиган XXXI ёзги Олимпия ва XV Паралимпия ўйинларига тайёрлаш тўғрисида»ги қарори паралимпиячиларимизнинг замонавий меъёрлар асосида ўқув-машғулот йиғинларини ўтказиши, халқаро мусобақаларга пухта тайёргарлик кўриши ва муносиб иштирок этиши учун қулай шарт-шароит яратишда муҳим дастуриламал бўлмоқда. Бунинг натижасида паралимпиячиларимиз жаҳон ва қитъа чемпионатларида, ПараОсиё ва Паралимпия ўйинларида муваффақиятли иштирок этиб келаётир. 

Жумладан, шу йилнинг сентябрь ойида АҚШнинг Колорадо-Спрингс шаҳрида дзюдо бўйича паралимпиячилар ўртасида ўтказилган жаҳон чемпионатида Ватанимиз шарафини ҳимоя қилган 15 нафар дзюдочимизнинг 8 нафари ғолиб ва совриндор бўлди.

— Ушбу йирик мусобақада дунёнинг саксондан ортиқ давлатидан 500 нафардан зиёд дзюдочи совринли ўринлар ҳамда 2016 йили Бразилиянинг Рио-де-Жанейро шаҳрида бўладиган XV ёзги Паралимпия ўйинларига йўлланма берувчи рейтинг очколари учун беллашди, — дейди жаҳон чемпиони Одилжон Тулендибоев. — Унда қўлга киритган ғалабам шарафига Ватанимиз байроғи баланд кўтарилиб, давлатимиз мад­ҳияси янграганда, кўксим ғурур-ифтихорга тўлди. Бу ютуқ, аввало мамлакатимизда Президентимиз раҳнамолигида биз каби ёшларга қаратилаётган юксак эътибор, ўз салоҳиятимизни рўёбга чиқаришга яратилган шарт-шароитлар туфайлидир. Мақсадим яна бир неча кундан сўнг, Жанубий Кореянинг Инчеон шаҳрида бошланадиган ПараОсиё ўйинларида ҳам муваффа­қиятли иштирок этишдир. 

— Бу йил паралимпиячиларимиз учун ютуқларга бой бўлмоқда, — дейди Ўзбекис­тон Миллий паралимпия ассоциацияси раиси ўринбосари Умид Аҳмаджонов. — Спортчиларимиз Бирлашган Араб Амирликлари, Тунис, АҚШ каби давлатларда ўтказилган жаҳон ва қитъа миқ­ё­сидаги мусобақаларда муносиб қатнашиб, навбатдаги ПараОсиё ўйинларига пухта ҳозирлик кўрдилар. Бундан тўрт йил аввал Хитойнинг Гуанчжоу шаҳрида бўлиб ўтган ПараОсиё ўйинларида ҳамюртларимиз 1 олтин, 2 кумуш ва 3 бронза медални қўлга киритган эди. Бу галги мусобақалар қатнашчилари орасида Лондон Паралимпиаси совриндори Шариф Халилов, жаҳон чемпиони Одилжон Тулендибоев, жаҳон чемпионати совриндорлари Ширин Шарипов, Шуҳрат Бобоев, Шерзод Намозов, Нурбек Бердиёров ва Феруз Сайидов, Дониёр Солиев, Осиё рекордчилари Фахриддин Ҳамроев ва Ёқутхон Холбекова, қатор нуфузли турнирлар ғолиб ва совриндорлари Миран Сахатов, Ҳусниддин Норбеков, Убайдулла Имом­қулов, Мавлонбек Ҳайдаров сингари тажрибали спортчилар борлиги ютуқларимиз салмоғи янада ортишига замин яратиши табиий. 

Эслатиб ўтамиз, Ўзбекистон спорт делегацияси аъзолари 12 октябрь куни Инчеон шаҳрига йўл олади. 14 октябрда эса маҳаллий вақт билан соат 16:00 (Тошкент вақти билан соат 12:00)да Олимпия шаҳарчасида давлатимиз байроғининг кўтарилишига бағишланган тантанали маросим бўлиб ўтади.

ПараОсиё ўйинларининг тантанали очилиш маросими 18 октябрь куни ўтказилади. Мазкур мусобақада 2016 йили Рио-де-Жанейро (Бразилия)да бўладиган VI ёзги Паралимпия ўйинларининг йўлланмалари ўйналади. 

 

Эркин ХОЛБОБО,

«Ўзбекистон овози» мухбири.



DB query error.
Please try later.