Охирги сонда



Кўп ўқилган мақолалар



Долзарб мавзу



Мақолалар архиви

«    Noyabr 2018   
Du Se Cho Pa Ju Sha Ya
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2
01.10.2014

ЮРТ ШАЪНИНИ УЛУҒЛАЁТГАНЛАР

Инчеон (Жанубий Корея)да ўтказилаётган XVII ёзги Осиё ўйинларида мамлакатимиз спортчилари ҳозиргача жами олтита олтин, еттита кумуш ва ўн тўртта бронза медалини қўлга киритди.

Мусобақа дастуридан жой олган спорт гимнастикаси бўйича  Оксана Чусовитина ҳамда Абдулла Азимовларнинг шоҳсупанинг иккинчи поғонасига кўтарилганлигини хабар қилгандик. Баҳсларнинг навбатдаги кунида яна бир иқтидорли спортчимиз, Пекин олимпиадаси бронза медали совриндори Антон Фокин ҳам мутахассис ва мухлислар ишончини оқлади. Ҳамюртимиз брусда мураккаб машқларни муваффақиятли бажариб, 15.475 балл тўплади ва кумуш медаль билан
тақдирланди.

Эркин курашчиларимиз бу галги Осиё ўйинларида ҳам муваффақиятли қатнашишди.

Жумладан, жаҳон чемпионати сов­риндори Бекзод Абдураҳмонов (70 кг) дастлаб Сомиршо Воҳидов (Тожикистон)ни катта устунлик билан енгди. Сўнгра ҳамюртимиз чорак финалда хитойлик курашчига ҳеч қандай имконият қолдирмади. Бекзод финал йўлланмаси учун япониялик Такафуми Кожимани очколар ҳисобида мағлубиятга учратди. Ҳал қилувчи беллашувда чинакам маҳорат кўрсатган полвонимиз мезбонлар вакили Хо Манхо устидан ишончли ғалаба қозониб, XVII ёзги Осиё ўйинларининг илк олтин медалига сазовор бўлди.

Шунингдек, эркин курашчиларимиздан Ихтиёр Наврўзов (65 кг) мусобақада фахрли учинчи ўринни эгаллади.

Ҳамюртимиз бронза медали учун кечган беллашувда япониялик Ишидо Томотсугу устидан ғалаба қозонди. 

Оғир атлетика мусобақасининг даст­лабки кунги баҳсларида вакилларимиздан Маҳлиё Тоғаева (48 кг) ҳамда Улуғбек Алимов (85 кг)лар бронза медалини қўлга киритишганди. Беллашувларнинг охирги кунида яна бир полвонимиз йигирма бир ёшли Сардорбек Дўсмуродов (105 кг) ўзини кўрсатди. У даст кўтаришда 170, силтаб кўтаришда 221, жами 391 кг тош кўтариб, терма жамоамиз ҳисобига навбатдаги бронза медалини келтирди.

Байдарка ва каноэда эшкак эшиш бўйича ҳам спортчиларимиз Инчеонга энг сара таркиб билан йўл олишганди. Ўзбекистон спорт делегацияси ҳисобига нав­батдаги олтин медалларни айнан эшкакчиларимиз туҳфа қилганлиги қувонарлидир.

Байдаркада эшкак эшиш бўйича саралаш баҳсларини муваффақиятли якунлаган терма жамоамиз аъзоси Алексей Мочалов 1000 метр масофага эшкак эшиш бўйича финал баҳсида марра чизиғини биринчи бўлиб кесиб ўтди — 3.39.878.

Каноэда эшкак эшиш бўйича Осиё ва жаҳон чемпиони Вадим Меньков Инчеонда ҳам яна бир бор ўзининг тенг­сизлигини исботлади. Каноэда 1000 метр масофани 3 дақиқаю 57.403 сонияда босиб ўтган ҳамюртимиз маррага биринчи бўлиб етиб келди ва шоҳсупанинг энг юқори поғонасига кўтарилди.

Каноэда эшкак эшиш бўйича 1000 метр масофага ўтказилган жуфтлик баҳсларида Серик Мирбеков ва Герасим Кочнев бронза медалига сазовор бўлишди.

Шунингдек, байдаркада эшкак эшишнинг тўртлик баҳсларида ҳам вакилларимиз совриндорлар қаторидан жой олдилар. Мусобақада 1000 метр масофага эшкак эшиш бўйича Сергей Борзов, Вячеслав Горн, Алексей Мочалов, Александр Тропин «квартети» 3 дақиқаю 01.819 сония билан марра чизиғини учинчи бўлиб кесиб ўтди. 

Яна бир вакилимиз Эрнест Ирназаров байдаркада эшкак эшиш бўйича 200 метр масофага ўтказилган яккалик баҳсларида кумуш медалини қўлга киритди. Моҳир спортчимиз (36.531) марра чизиғини иккинчи бўлиб босиб ўтди. 

Терма жамоамиз жамғармаси учун тўртинчи олтин медални енгил атлетикачимиз Екатерина Воронина тақдим этди. У еттикураш баҳсларида жами 5912 очко жамғариб, шоҳсупанинг энг юқори поғонасидан жой олди. Ушбу йўналишда майдонга чиққан яна бир ҳамюртимиз Юлия Тарасова (5482) эса бронза медали билан кифояланди.

Навбатдаги беллашувларда эркин кураш усталаримиз яна мухлисларни қувонтирдилар. Жумладан, ҳамюртимиз Рашид Қурбонов (74 кг) олтин медаль учун кечган беллашувда эронлик Иззатулло Акбаризаринколаини енгиб, шоҳсупанинг энг юқори поғонасига кўтарилди.

Яна бир полвонимиз Умиджон Исманов (86 кг) покистонлик Муҳаммад Иномни мағлубиятга учратиб, бронза медалига сазовор бўлди.

ГАЗЕТА САҲИФАЛАНАЁТГАНДА: Кеча мамлакатимиз спортчилари қўл тўпи, регби, таэквондо (WTF), юнон-рум кураши, ўқ отиш турлари бўйича майдонга тушдилар.

Таэквондо бўйича дастлаб Никита Рафалович (74 кг) барча рақибларини мағлубиятга учратиб, финалга йўлланма олди. Олтин медаль учун кечган жанг­да у эронлик спортчига очколар ҳисобида кичик фарқ билан ютқазиб, кумуш медалга сазовор бўлди.

Яна бир моҳир таэквондочимиз Жасур Бойқўзиев (87 кг) эса Ўзбекистон терма жамоаси ғазнасига навбатдаги олтин медални туҳфа қилди. У финалда хитойлик Ченг Линг Лонгни енгиб, шоҳсупанинг юқори поғонасига кўтарилди.

Шунингдек, кеча юнон-рум кураши усталари беллашувларни бошлашди. Унда ҳамюртимиз Дилшоджон Турдиев (71 кг) кумуш медаль билан тақдирланган бўлса, Аҳмаджон Маҳмудов (59 кг), Бесики Солдадзе (80 кг)лар шоҳсупанинг фахрли учинчи поғонасидан жой олдилар.

Шундай қилиб, Ўзбекистон спортчилари Осиё ўйинларида бугунгача жами 27 (6 та олтин, 7 та кумуш ва 14 та бронза) медални қўлга киритган ҳолда қирқ беш давлат вакиллари ўртасида 12-поғонани банд этиб турибдилар.

 

Эркин ХОЛБОБО,

«Ўзбекистон овози» мухбири.



DB query error.
Please try later.