16.09.2014

ЎЗБЕКИСТОН ТИНЧЛИК ВА БАРҚАРОРЛИК ТАРАФДОРИ

Комила КАРОМОВА, Олий Мажлис Қонунчилик палатасидаги ЎзХДП фракцияси аъзоси.

Ҳозирги вақтда дунёда тинчликни сақлаш, давлатлар ўртасида ўзаро ҳамкорликни мустаҳкамлаш масаласи ҳар қачонгидан ҳам муҳим аҳамият касб этмоқда.

Шу сабабли Президентимиз Ислом Каримов ўзининг ҳар бир чиқишида дунёда тинчлик ўрнатиш масаласига жиддий эътибор қаратмоқда. Бу борада дунё ҳамжамияти эътиборини ўта муҳим ҳаётий масалаларга тортмоқда.

Ўзбекистон Республикаси Президентининг Шанхай Ҳамкорлик Ташкилотига аъзо мамлакатлар давлат раҳбарлари Кенгашининг кенгайтирилган мажлисидаги нутқида ҳам бу борада минтақамизда ва дун­ёда долзарб бўлиб турган муаммолар, уларни ҳал этиш йўллари ҳақида ҳаётий асосларга эга фикр-мулоҳазалар билдирилди.

Дарҳақиқат, бугун Афғо­нис­­тонда юзага келаётган сурункали беқарорлик янада кескин тус олиш тенденциясига эга бўлмоқда. Ҳарбий йўл билан эса Афғонис­тонда ҳеч қачон тинч­ликка эришиб бўлмайди. Бу борада Президентимиз кўп йиллардан бери илгари суриб келаётган позиция бугунги кунга келиб ўзининг чуқур ҳаётий исботини топди.

ЎзХДП Афғонистонда тинч­ликка эришиш ва халқларимиз ўртасида дўстона ҳамкорлик муносабатларини мус­таҳкамлаш борасида Президентимиз юритаётган сиёсатни ҳар томонлама қўл­лаб-қувватлайди.

Жорий йилнинг июнь ойида Афғонистонда ўтказилган президент сайлови бу мамлакатда тинч, мустақил ва демократик давлат барпо этиш имкони борлигини кўрсатди. Энг муҳими, тўх­товсиз қон тўкиш ва зўравонликдан, кўп йиллик қашшоқлик, вайронагарчиликдан чарчаган афғон халқи шуни истамоқда.

Бундай шароитда Ўзбекис­тон томонидан илгари суриб келинаётган тинчликпарвар, тенг ҳуқуқли ҳамкорлик ва ўзаро ҳурматга асосланган сиёсат бугун ҳар қачонгидан ҳам муҳим ўрин тутмоқда.

Ислом Каримов таъкидлаганидек, айни пайтда сайловчиларнинг овозини қайтадан санаш ва Афғонис­тон президентлигига сайлов натижаларини эълон қилиш, давлатнинг янги раҳбарининг ўз вазифасини бажаришга расман киришиш жараёни чўзилаётгани мамлакатда келгусида барқарорликка эришиш борасида кучли хавотир уйғотмоқда. Бу ҳолатда хавфсизликка кўмаклашувчи халқаро кучларнинг Афғонистондан олиб чиқиб кетилиши вазиятни янада мураккаблаштириши аниқ.

Тарихнинг ўзи гувоҳ, Ўзбекистон халқи кеча ҳам, бугун ҳам Афғонистон халқи билан барқарор дўстона муносабатларни ривожлантириш тарафдори бўлиб келмоқда. Миллий манфаатлардан келиб чиқиб, икки томонлама ҳамкорликни кучайтириш позициясида турибди.

Президентимиз Ўзбекистон бундан кейин ҳам шундай йўл тутишини, афғон халқининг ўзи сайлайдиган ҳукуматни қўллаб-қувватлашини яна бир бор маълум қилди. Бутун Ўзбекистон халқининг кўнглида шу ният жо бўлган, десак, айни ҳақиқатни айтган бўламиз. Чунки биз аф­ғон халқи билан бир дарёдан сув ичиб, яхши қўшни бўлиб, тинч-тотув яшаб келганмиз. Халқларимиз ўртасидаги ҳурмат ва ҳамкорлик янада кучайиши дўстона ришталар тобора мустаҳкам бўлишини таъминлайди.



DB query error.
Please try later.