11.09.2014

ПОЛВОНИМИЗ ЖАҲОН ЧЕМПИОНАТИ СОВРИНДОРИ

Эркин, юнон-рум ва аёллар кураши бўйича Тошкент­да илк маротаба ўтказилаётган жаҳон чемпионати беллашувларида ҳар бир учрашув муросасиз ва шиддатли кечмоқда.

Мусобақанинг дастлабки икки кунида эркин кураш бўйича саккиз вазн тоифасида ғолиб ва совриндорлар номи маълум бўлди. Дунёнинг юздан зиёд давлати полвонлари иштирок этаётган жаҳон чемпионатининг мазкур йўналишида Ўзбекистон терма жамоаси битта бронза медали билан кифояланди.

Ўз вазн тоифасида Бекзод Абдураҳмонов (70 кг) шоҳсупанинг учинчи поғонасига кўтарилди.

— Жаҳон чемпионатида илк маротаба қатнашдим, — дейди полвонимиз Бекзод Абдураҳмонов. — Мусобақага мураббийим Музаффар Абдураҳмонов қўл остида пухта тайёргарлик кўргандик. Ярим финалда туркиялик моҳир курашчи Якуб Горга биргина хато эвазига ютқазиб қўйганим роса алам қилди. Бу кейинги беллашувлар олдидан мен учун катта сабоқ бўлади. Келаси йилдан бошланадиган нав­батдаги ёзги Олимпия ўйинларига йўлланма берадиган мусобақаларга тайёргарлик кўраман. Тошкентда ўтаётган жаҳон чемпионати мен каби ёш полвонлар учун ўзига хос тажриба ва синов мактаби вазифасини бажаргани шуб­ҳасиз.

Эркин кураш бўйича якунланган мусобақаларда 5 олтин ва 1 бронза медалига сазовор бўлган Россия терма жамоаси 62 очко жамғариб, умумжамоа ҳисобида биринчи ўринни банд этди. Эрон (45 очко) ва Туркия (42 очко) вакиллари иккинчи ҳамда учинчи ўринни эгаллади. Беллашувлар якунида жами 14 давлат вакиллари жумладан, республикамиз полвони сов­риндорлар қаторидан жой олди.

— Жаҳон чемпионатида терма жамоамиз деярли тўлиқ янгиланган таркибда майдонга чиқди, — дейди эркин кураш бўйича Ўзбекистон терма жамоаси бош мураббийи Александр Недорезов. — 2016 йилда Рио-де-Жанейрода бўладиган XXXI ёзги Олимпия ўйинлари саралаш мусобақалари бошланади. Гарчи, курашчиларимиз Тошкент гиламларида ягона бронза медални қўлга киритган бўлса-да, муҳим мусобақалар олдидан ёш спортчиларимиз учун жаҳон чемпионати катта тажриба мактаби вазифасини ўтаб бергани шуб­ҳасиз. Қолаверса, яна бир неча кундан сўнг, Инчеон (Жанубий Корея)да навбатдаги ёзги Осиё ўйинлари бошланади.

Кеча мусобақа дастуридан жой олган аёллар кураши беллашувлари бошланди. Унда тўртта (48, 55, 60, 69 кг.) вазн тоифасида курашчилар медаллар учун майдонга чиқди. Мазкур беллашувларда Ватанимиз шарафини Даулетбике Якшимуратова (48 кг), Севара Эшмуродова (55 кг), Саломат Кучимова (60 кг) ва Азиза Султонмуродова (69 кг) ҳимоя қилдилар.

Бугун қолган яна тўртта вазн тоифасида учрашувлар давом эттирилади. Уларда курашчиларимиздан Зуҳра Мустанова (53 кг), Асем Сейдаметова (58 кг), Холбозор Норбоева (63 кг), Гулмира Исматова (75 кг) лар ўз маҳоратини намойиш этади.

Эркин ХОЛБОБО,

«Ўзбекистон овози» мухбири.



DB query error.
Please try later.