12.08.2014

БУТУНЖАҲОН ШОҲМОТ ОЛИМПИАДАСИ ҲАЛ ҚИЛУВЧИ ПАЛЛАГА КИРДИ

Норвегиянинг Тромсе шаҳрида ўтказилаётган Бутунжаҳон шоҳмот Олимпиадасида кеча 9-тур учрашувлари бўлиб ўтди. Бу ҳақда Миллий олимпия қўмитаси расмий сайти хабар бермоқда.

Саккизинчи турда австралиялик шоҳмотчилар билан баҳс юритган Ўзбекистон эркаклар терма жамоаси 3:1 ҳисобида ғалабага эришди. Ушбу учрашувда Рустам Қосимжонов ва Улуғбек Тиллаев рақибларини мағлуб этишган бўлса, Антон Филиппов ҳамда Марат Жумаев дуранг натижани қайд этишди.

Эслатиб ўтамиз, шу кунга қадар ўтказилган баҳсларда эркаклар терма жамоамиз Кипр (3,5:0,5), Дания (2,5:1,5), Бразилия (3,5:0,5), Украина (2,5:1,5), Австралия (3:1) терма жамоаларини мағлуб этиб, Германия термаси билан 2:2 ҳисобида дуранг натижани қайд этдилар. Россия (1,5:2,5) ва АҚШ (0,5:3,5) терма жамоалари билан кечган баҳсда имкониятни бой бердилар.

Бугун ўтказиладиган тўққизинчи турда ҳамюртларимиз финляндиялик шоҳмотчиларга қарши дона сурадилар. 8 тур якунларига кўра, эркаклар терма жамоамиз 177 давлат орасида 23-ўринни эгаллаб турибди.

Саккизинчи турда эркаклар терма жамоамиздан фарқли равишда аёллар терма жамоамиз мағлубиятга учради. Испания термаси билан кечган баҳсда вакилларимиз 1:3 ҳисобида имкониятни бой бердилар. Ирина Геворгян ва Севара Боймуродова рақиблари билан дуранг ўйнашган бўлса, Сарвиноз Қурбонбоева ва Ольга Собирова бу сафар ютқазиб қўйди.

Бугунга қадар ўтказилган баҳсларда аёллар терма жамоамиз Гондурас (4:0), Бразилия (3,5:0,5), Уэльс (3:1), Боливия (4:0) терма жамоаларини мағлуб этиб, Латвия (2:2), Шотландия (2:2) термалари билан дуранг натижани қайд этишди. Сербия (1:3) ва Испания (1:3) терма жамоалари билан кечган баҳсда имкониятни бой берди.

Бугун аёллар терма жамоамиз кубалик шоҳмотчиларга қарши дона суради. Тўққизинчи тур олдидан Ўзбекистон аёллар терма жамоаси 136 жамоа орасида 29-ўринни эгаллаб турибди.

 

Нозима МУЯССАРОВА,

ЎзМУ талабаси.



DB query error.
Please try later.