09.08.2014

ПАРТИЯ ТАШКИЛОТЛАРИ ВА ДЕПУТАТЛИК ТУЗИЛМАЛАРИНИНГ

беш йиллик фаолияти таҳлил этилди

Наманган шаҳар партия ташкилотининг V ҳисобот-сайлов конференциясида ўтган беш йиллик фаолият таҳлил этилди. Олдинда турган муҳим сиёсий жараёнларда муносиб иштирок этиш билан боғлиқ масалалар муҳокама қилинди.

— Бугунги кунда шаҳримиздаги 112 бошланғич партия ташкилотига 3300 нафарга яқин партия аъзоси бирлашган, — деди ЎзХДП Наманган шаҳар кенгаши раиси Маматвали Турғунов. — Уларнинг ҳуқуқий онгини юксалтириш ҳамда сиёсий фаоллигини ошириш мақсадида доимий равишда сиёсий ўқувлар, тарғибот тадбирлари, семинар-тренинглар ўтказяпмиз. Шу боис ўтган давр мобайнида сафимизга кўплаб иқтидорли ёшлар қўшилди.

Ҳозир халқ депутатлари Наманган шаҳар Кенгашидаги партия гуруҳимизда 14 нафар депутат фаолият олиб бормоқда. Улар турли ижтимоий-иқтисодий масалаларни ҳал этиш, ижтимоий ҳимояга муҳтож, жисмоний имконияти чекланган кишилар манфаатларини ҳимоя қилиш, касб-ҳунар коллежлари битирувчилари бандлигини таъминлаш бўйича ташаббусларни изчил илгари суряпти. Мисол учун 2013 йилда халқ депутатлари туман Кенгаши сессиясида партия гуруҳимиз ташаббуси билан икки масала муҳокама этилди.

Депутатларимиз аралашуви билан 200 дан ортиқ ижтимоий аҳамиятга эга масала жойида ҳал этилди.

Ҳисобот маърузасидан сўнг тафтиш комиссияси раиси Олимжон Жакбаровнинг ҳисоботи эшитилди. Шунингдек, халқ депутатлари Наманган шаҳар Кенгашидаги пар­тия гуруҳи раҳбари Олимжон Ҳасанов, «Тў­қувчи» МФЙ раиси ­Сабоҳат ­Шокирова, «Истиқбол» ёш­лар қаноти етакчиси Маҳмуджон Довудхонов ва бошқалар сўзга чиқиб, амалга оширилган ишлар, навбатдаги вазифалар юзасидан ўз фикр- мулоҳазаларини баён этди.

Конференцияда ташкилий масала кўрилди. ЎзХДП Наманган шаҳар кенгаши ва ижроия қўмитасининг янги таркиби тасдиқланди.

Тадбирда Наманган вилоят партия кенгаши ­раиси Дилором Абдураҳимова сўзга чиқиб, партия ташкилотларининг галдаги вазифалари, сайловларга муносиб тайёргарлик кўриш билан боғлиқ долзарб масалалар юзасидан таклиф-мулоҳазаларини билдирди.

ЎзХДП Наманган туман ташкилотининг ҳисобот-сайлов конференцияси ҳам қилинган ишларга танқидий ёндашув асосида ўтди. ­Наманган туман партия кенгаши раиси Умиджон ­Солиев эришилган ютуқ ва йўл қўйилган камчиликларга тўхталди. Шунингдек, у асосий эътиборни сайловларга тайёргарлик, сайлов қонунчилигига киритилган ўзгартиш ва қўшимчалар ҳамда халқаро тажриба хусусида фикр юритди. 41 бошланғич партия ташкилоти, 2900 нафардан зиёд партия аъзосининг куч ва имкониятларидан самарали фойдаланиш зарурлигини таъкидлади.

Конференцияда Наманган вилоят партия ташкилоти конференциясига делегатлар сайланди. Анжуман якунида 15 нафар ёш йигит-қизга партияга аъзолик гувоҳномалари топширилди.

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.