02.08.2014

БОЛАЛАР СПОРТИ РИВОЖИ — ДОИМИЙ ЭЪТИБОР ТАЛАБ ЭТАДИГАН МАСАЛА

Сиз ота-она сифатида фарзандингиз мактабда қайси спорт тури билан шуғулланиши, у ерда яратилган шарт-шароитлар қандай экани билан қизиқасизми? Жисмоний тарбия дарсларида ўтилаётган маш­ғулотлар сифати сизни қониқтирадими?..

Тўғриси, бу каби саволлар кўпчилик ота-оналарни унчалик қизиқтирмаслиги мумкин. Халқ депутатлари Жиззах вилояти Янгиобод туман Кенгашидаги ЎзХДП гуруҳи эса бу муҳим масалани ўрганиб чиқди.

Чунки партия гуруҳининг «Соғ­­лом бола йили» учун мўлжалланган иш режасига тумандаги мактабларда спорт моддий-техник базаси, жисмоний тарбия дарсларининг аҳволини ўрганиш масаласи киритилган эди.

Партия гуруҳи туман халқ таълими бўлими тизимидаги муассасаларда спорт билан шуғулланиш учун яратилган шароитлар қай даражадалигини ўрганиб, таҳлил қилди. Туманда бу борада ибратли ишлар оз эмаслиги эътироф этилди. Аммо айрим мактабларда маш­ғулотлар сифати талабга жавоб бермаслиги, мутахассис кадрлар етишмаслиги, болаларни оммавий спортга жалб қилиш бўйича камчиликларга йўл қўйилаётгани маълум бўлди. Партия гуруҳи йиғилиши ва ­доимий комиссия мажлисида депутатлар камчиликларни бартараф этиш юзасидан аниқ таклифлар билдирди.

— «Соғлом бола йили» Давлат дастурида кўзда тутилган қатор масалалар кўп жиҳатдан таълим тизимида жисмоний тарбия ва спорт ишлари қандай йўлга қўйилганлигига боғлиқ, — дейди халқ депутатлари Янгиобод туман Кенгашидаги ЎзХДП гуруҳи аъзоси Сулаймонқул Хидиров. — Бугунги кунда туман халқ таълими бўлимига қарашли умумтаълим мактабининг 12 тасида спорт заллари мавжуд. Битта мактабда бадиий гимнастика, олтитасида эса жисмоний тарбия ва спорт тўгаракларининг фаолият кўрсатиши учун шароит яратилган. Бундан таш­қари, 16 футбол, 17 волейбол, 11 баскетбол, 17 қўл тўпи майдончалари ташкил этилган.

Бироқ 6 та умумтаълим мактабида спорт заллари мавжуд эмас. Бу эса жисмоний тарбия машғулотларининг сифатли ўтилишига салбий таъсир кўрсатади. Тумандаги мавжуд 18 та мактабда 15 нафар спорт мураббийи бор. Бундан ташқари, ёш, иқтидорли спортчиларни етиштиришда ҳам баъзи муаммолар аниқланди.

Масалани халқ депутатлари туман Кенгаши сессиясига киритишдан олдин ота-оналар, жамоатчилик фикри ҳам ўрганилди.

Сессияда дастлаб туман маданият ва спорт ишлари бўлими раҳбари Э. Мухторов ҳамда бошқа масъул идоралар раҳбарларининг ҳисоботлари тинг­ланди. Таъкидландики, машғулотлар умумий ўрта таълим муассасалари спорт зали ва майдончалари ҳамда спорт турларига ихтисослаштирилган мажмуаларда олиб борилади.

Халқ таълими бўлимига қа­рашли болалар ва ўсмирлар спорт мактабида 324 нафар бола ўз маҳоратини оширмоқда.

Ҳисоботлар эшитилгач, халқ депутатлари Янгиобод туман Кенгашидаги ЎзХДП гуруҳи ҳамда Ёшлар сиёсати ва соғ­лом авлодни тарбиялаш масалалари бўйича доимий комиссияси томонидан ўтказилган ўрганиш натижалари муҳокама этилди. Сессияда халқ депутатлари туман Кенгашидаги ЎзХДП гуруҳи аъзолари ва бош­қа депутатлар, мутахассислар таҳлиллари асосида камчиликларни бартараф этиш ҳамда бу борадаги ишларни янада жонлантиришга қаратилган қарор қабул қилинди.

Унда халқ таълими тизимидаги муассасаларда ўтилаётган жисмоний тарбия машғулотларининг сифати, мутахассислар билан таъминланиш даражасини янада ошириш лозимлиги қайд этилди. Шунинг­дек, туманда болалар спортини ривожлантириш, йигит-қизларнинг турли мусобақаларга тайёргарлик кўришини таъминлаш борасида олиб борилаётган ишлар қониқарли эмас, деб топилди. Шу асосда маданият ва спорт ишлари бўлими ҳамда халқ таълими бўлимига тегишли ташкилотлар билан ҳамкорликда спортни оммалаштириш ва ривожлантириш борасидаги камчиликларни бартараф этиш вазифаси юклатилди.

Шунингдек, сессияда депутатлар томонидан ҳар ойнинг охирги шанбасини «Спорт куни» деб эълон қилиш тўғрисида берилган таклиф маъ­қулланди. Бунинг учун мактаб ҳамда ота-оналар ҳамкорлигини кучайтириш зарурлиги белгиланди.

Ҳозир мазкур қарор ижроси юзасидан ЎзХДП гуруҳи томонидан назорат ўрнатилган.

Бугун сиёсий партия жамиятда юз бераётган ҳар бир жараёнга ўз муносабатини билдириши, жойларда учраётган муаммоларга ечим излаши керак. Халқ депутатлари Янги­обод туман Кенгашидаги ЎзХДП гуруҳи томонидан сессия муҳокамасига киритилган масала эса энг эзгу мақсадларимиздан бири — соғлом ва баркамол авлодни тарбиялашга хизмат қилиши билан аҳамиятлидир.

 

Нурали ОРИПОВ,

«Ўзбекистон овози» мухбири.



DB query error.
Please try later.