31.07.2014

ФУҚАРО ҲАЁТИ ЁКИ СОҒЛИҒИГА ЕТКАЗИЛГАН ЗАРАР

биринчи навбатда қопланади...

Яқинда Қонунчилик палатасининг Кенгаши Мувофиқлаштирувчи гуруҳнинг ахборотини эшитиб, «Банкротлик тўғрисида»ги Ўзбекистон Республикаси Қонунига ўзгартиш ва қўшимчалар киритиш ҳақида»ги қонун лойиҳасини дастлабки тарзда кўриб чиқиш учун масъул қўмитани белгилади. Ўша вақтнинг ўзида қонун лойиҳаси унга илова қилинган материаллар билан бирга фракцияларга (депутатлар гуруҳига) топширилди.

Хўш, мазкур қонун лойиҳаси нима мақсадда ишлаб чиқилган? Унинг мазмун-моҳияти, бозор ислоҳотларини чуқурлаштиришдаги аҳамияти нимадан иборат?

Президентимизнинг тегишли Фармони (ПФ – 4455)да корхона банкрот деб топилганда кредиторларнинг талабларини қондириш тартибига ўзгартириш киритиш назарда тутилган. Унга кўра, бюджет ва бюджетдан ташқари жам­ғармалар олдидаги талаблар билан кредиторларнинг гаров билан таъминланмаган талабларини мутаносиб равишда қондириш ҳисобга олинганди. Бундан кўзланган мақсад кредиторлар киритган маблағларни қайтариш кафолатини кучайтиришдан иборатдир. Қонун лойиҳаси ана шу масалани ҳаётга татбиқ этишга қаратилган.

Куни кеча ЎзХДП фракциясининг кенгайтирилган йиғилишида ушбу қонун лойиҳасини Олий Мажлис Қонунчилик палатаси кўриб чиқиши учун қабул қилиш масаласи муҳокама этилди.

Йиғилиш қатнашчилари аввало шуни алоҳида эътироф этишдики, қонун лойиҳаси мамлакатимизда иқтисодий ислоҳотларни янада чуқурлаштиришга, иқтисодиётни либераллаштиришга ва инвестициявий жозибадорликни оширишга хизмат қилади.

— Фракция аъзолари масалага партиямиз Дастури ва электорат манфаатларидан келиб чиққан ҳолда ёндашмоқда,дейди ­Ўз­ХДП фракцияси аъзоси Абдуқаҳҳор Юсупов.Қонун лойиҳасига кўра, иш ҳақи тўлаш учун пул маблағлари берилишини кафолатловчи ўзгартиш таклиф этилаяпти. Унга асосан иш ҳақи тўлаш учун пул маблағлари берилишини назарда тутувчи тўловлар биринчи навбатда қондирилиши таъминланади. Бу эса аҳо­лини ижтимоий ҳимоя қи­лиш кафолатлари мустаҳкамланаётганини англатади. Мазкур меъёр ЎзХДП электорати манфаатлари ҳимоясини таъминлайди.

Бугунги кунда парламент Қонунчилик палатасида қонун лойиҳаларини кўриб чиқиш жараёнида хорижий тажриба чуқур ўрганилиб, қиёсий таҳлил этилмоқда, — дейди Ўз­ХДП фракцияси аъзоси Улуғбек Зокиров. Банкротлик ҳақидаги қонун лойиҳасини дастлабки тарзда кўраётганда ҳам бунга эътибор бердик. Хорижий мамлакатларнинг банкротлик тўғрисидаги қонунчилигини ўрганиш натижалари шуни кўрсатдики, бир қатор давлатларда мажбурий тўловлардан бўл­ган талабларни қондириш учинчи, тўртинчи ва саккизинчи нав­батларда амалга оширилар экан. Масалан, мажбурий тўловлардан бўл­ган талабларни қондириш ­АҚШда саккизинчи навбатда, Германияда тўртинчи нав­батда, айрим МДҲ давлатларида учинчи навбатда амалга оширилади. «Банкротлик тўғрисида»ги қо­нунга киритилаётган ўз­га­р­тишга мувофиқ фуқаролар ҳаёти ёки соғлиғига етказилган зарар ҳам биринчи ўринда қопланиши белгилаб қўйилаяпти. Бу қонунчилигимизда ин­сонпарварлик тамойили юқори қўйилаётганини анг­латади. Биз бундай ёндашувни тўғри, деб ҳисоблаймиз ва қўл­лаб-қувватлаймиз.

Фракция йиғилишида қо­нун лойиҳасини такомиллаштиришда партия дастурий мақсадлари ва электорат манфаатларини акс эттириш бўйича таклифлар тайёрлаш мақсадида ишчи гуруҳ тузилди, унинг вазифалари белгилаб олинди.

Билдирилган фикр-мулоҳазаларга асосланиб, фракция қонун лойиҳасини Олий Мажлис Қонунчилик палатаси кўриб чиқиши учун қабул қилиш мумкин, деган хулосага келди.

 

Тўлқин ТЎРАХОНОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: