19.07.2014

МУСТАҚИЛ ЮРТ ҒАЛЛАСИ — ОБОД ТУРМУШ ВА ФАРОВОНЛИК ГАРОВИ

Давлатимиз раҳбари Ислом Каримовнинг ­Ўзбекистон ғаллакорларига йўл­лаган табригида айтилган фикрлар, келтирилган маълумотлар барчамизда фахр-ифтихор туйғусини уйғотди, ўтган кунларни яна бир бор ёдга олиб, бугунги имкониятлар билан таққослашга, ўйлаб, хулоса чиқаришга даъват этди.

Юртимизда таъминланаётган тинчлик ва осойишталик туфайли деҳқон ва фермерларимиз, барча дала меҳнаткашларимизнинг фидокорона меҳнати эвазига бунёд этилган 8 миллион 50 минг тонналик юксак ғалла хирмони ҳар қанча мақтовга, эътирофга муносиб, албатта. Ўзбекистон қишлоқ хўжалиги тарихида биринчи бор мана шундай мисли кўрилмаган кўрсатгич амалда қайд этилди. Бу миллий иқтисодиётимизга қўшилган улкан ҳисса, мамлакатимиз иқтисодиётини мустаҳкамлашдаги яна бир улкан қадамдир. Бу дастурхонларимиз тўкинлиги оилаларимиз хотиржамлиги, обод турмуш ва фаровонлик гаровидир...

Ўзбекистон эндигина мустақилликка эришган ўтган асрнинг 90-йиллар бошларида республикамиз олдида жуда кўп муаммолар кўндаланг турарди. Энг муҳим масалалардан бири — аҳолини озиқ-овқат маҳсулотлари билан узлуксиз таъминлашдан иборат эди. Маълумки, Собиқ Иттифоқнинг пахта базасига айланиб қолган Ўзбекистонга кўплаб турдаги озиқ-овқат маҳсулотлари бошқа жойлардан олиб келинар эди. Ана шундай бир шароитда қишлоқ хўжалик маҳсулотларининг асосий турларини ўзимизда етиштиришни йўлга қўйиш бошқа мамлакатларга нафақат иқтисодий қарам бўлиб қолмаслик, балки сиёсий мус­тақилликни таъминловчи муҳим омиллардан бири эди.

Бундан 23 йил олдин 21 миллиондан зиёд аҳолимиз эҳтиёжи учун зарур бўлган 5 миллион тоннага яқин ғалла четдан келтирилар эди. Собиқ марказ бизнинг тонна-тонна пахтамиз эвазига ғаллани юбориб турар эди. Иттифоқ таназзулга юз тутгач, ана шу ғаллани четдан ўзимиз сотиб олишимизга тўғри келди. Бунинг учун, биринчи нав­батда валюта керак эди. Баъзи ғалла сотувчи давлатлар эса ўзларининг сиёсий манфаатларини ҳам орага тиқиштиришга уринарди. Қолаверса, сотиб олинган ғаллани юртимизга етказиб келиш учун катта миқдорда йўл харажатлари ҳам талаб қилинар эди. Ана шундай бир мураккаб шароитда мамлакатимиз Президенти Ислом Каримов ҳукумат озиқ-овқат таъминотида узилишлар юз бермаслиги учун барча чора-тадбирларни кўрди. Мамлакат аҳолисини ўзимизда етиштирилган дон билан таъминлаш юзасидан махсус дастур ишлаб чиқилди. Уни босқичма-бос­қич амалга ошириб борилиши натижасида биринчидан, аҳо­лини кафолатланган тарзда дон маҳсулотлари билан тўлиқ таъминлашга эришилди, четдан ғалла олиб келиш учун сарф­ланадиган валюта тежаб қолинди. Иккинчидан, деҳ­қонларимиз учун янги-янги иш жойлари ва қўшимча даромад манбаи яратилди, учинчидан, пахта майдонлари қисқартирилиб, бу майдонларга ғалла экилиши ҳисобига экинларни алмашлаб экиш ва тупроқ унумдорлигини сақлаб қолиш имконияти яратилди.

Шунингдек, ғалладан бў­шаган ерларга такрорий экин экиш ҳисобига сабзавот етиштириш ҳажми кў­пайди ва бу ҳам деҳқонларга қўшимча даромад олиб келиш имконини берди.

Энг муҳими, дон ва дон маҳсулотлари бў­йича ўзга давлатларга қа­рам­ликдан қутилдик. Ўзбекистон ғалла мус­тақиллигига узил-кесил эришди. Бугунги кунда
31 миллиондан ортиқ аҳолимизни ўз донимиз ва ўз беминнат нонимиз билан таъминламоқдамиз. Сифатли дон маҳсулотларини қўшни давлатларга экспорт ҳам қилмоқдамиз.

Шу ўринда яна бир масалани алоҳида таъкидлаш ­лозим. Республикамизда етиштирилган жами дон ҳосилининг, агар 2013 йилда қарийб 50 фоизи ёки
3 миллион 524 минг тоннаси фермер хўжаликлари ихтиё­рида қолдирилган бўлса, бу йил Президентимиз табригида таъкидланганидек, ғалла ҳосилининг 5 миллион 117 минг тоннаси, яъни 60 фоизи деҳқон ва фермерларимиз, аҳолимиз ихтиёрида қолдирилди. Бу деҳ­қон­ларимиз, фермерларимиз омборлари донга, рўзғорлари қут-баракага тўлиб бораётгани, улар ўз меҳнатларидан катта манфаат кўраётгани, машаққатли меҳнати муносиб қадр топаётганининг ёрқин тасдиғидир.

Бу йил барпо этилган улкан ғалла хирмонини ўтган асрнинг
90-йилларидаги ҳолат билан қиёслаб кўрадиган бўл­сак, Президентимиз ­Ислом Каримов раҳнамолигида мам­лакатимиз тарихан қисқа тараққиёт дав­­рида тасаввур қилишнинг ўзи қи­йин бўлган буюк йўлни босиб ўтгани, эришилган ютуқлар юртимиз учун нақадар қадр­ли эканини чуқур англаш мумкин.

 

Шариф ҚОБИЛОВ,

Ўзбекистон Республикаси ИИВ Академияси

Ижтимоий-гуманитар фанлар кафедралари

илмий-методик кенгаши раиси,

доцент, иқтисод фанлари номзоди.



DB query error.
Please try later.