19.07.2014

БАЙРАМГА МУНОСИБ ТЎЁНАЛАР

Хоразм вилоятининг Боғот, Шовот ва Хива туманларида янги маданият ва дам олиш марказлари ишга тушди

Қишлоқларда муносиб турмуш шароитини яратиш, аҳоли, айниқса, ёшларимизнинг маънавий оламини янада бойитиш, мазмунли дам олишларини ташкил этиш мақсадида қад ростлаётган гўзал масканлар йилдан йилга кўпаймоқда.

Шундай гўшалардан бир неч­таси яқинда Хоразм вилоятида қад ростлади.

Боғот туманидаги Қулонқорабоғ қишлоғи маркази байрам­она либосга бурканди. Фахрийлар, ёшлар, турли касб-кор эгалари қайта таъмирланиб, янада замонавий ва кўркам ҳолатга келтирилган «Маданият ва аҳоли дам олиш маркази» биносининг тантанали очилишининг гувоҳи бўлишди. Энди бу ерда мунтазам равишда турли кўргазмалар, танловлар, халқ ижодиёти ва томоша санъати фестиваллари ўтказилади. Бу марказлар истеъдодларни аниқлаш, рағбатлантириш ва ютуқларини кенг тар­ғиб қилишда муҳим аҳамият касб этади.

— Қишлоғимиздаги эски, нураб ётган бинони қайта қуриш ишлари бошланганида барчамиз хурсанд бўлдик, —  дейди меҳнат фахрийси Мадраҳим ота ­Худойберганов. — Қаровсиз қолган жойда тез фурсатда замонавий дам олиш маскани бун­ёд этилди. Атроф кўкаламзорлаштирилиб, гўзал масканга айлантирилди. Энди бу ерда юзлаб ўғил-қизлар касб-ҳунар эгаллаши мумкин.

Шу куни Шовот туманидаги Ижтимоят қишлоғида ҳам шундай марказнинг тантанали очилиш маросими бўлиб ўтди.

— Бундай дам олиш масканларининг ташкил қилиниши юрт­дошларимиз кучига куч, ғайратига ғайрат қўшади, янги янги ғалабаларга ундайди, — деди меҳнат фахрийси Раҳимбой ­Тоҳиров. — Биз фахрийлар ҳам шундай дориломон замонада яшаётганимизга шукроналар айтамиз.

Хива туманининг Соёт қишлоғида ҳам ана шундай оромбахш масканнинг очилиши маънавият, маданият, маърифат байрамига айланиб кетди. Карнай-сурнай садолари узоқ-узоқларга таралиб, қадим шаҳар обидалари пештоқларида акс-садо бераётгандай туюлди. Қўшни қишлоқлардан, шаҳар маҳаллаларидан отахонлар, онахонлар, опа-сингиллар, ёшлар катта кошона томон қувонч ва ғурур билан ошиқадилар. Ота-оналари билан келишган жажжи болажонларнинг қувончини изҳор қилишга сўз қани, таъриф қани?!

Атроф гўзал, ораста. Хоразм гужумлари савлат тўкиб турибди. Маскан айланасидаги боғ, хиёбон, гуллар кўнгилларга ҳузур-ҳаловат бағишлайди. Равон йўл бўйида қад ростлаган янги лойиҳа асосидаги уй-жойлар кўрки ўзгача. Маҳалла гузари. Савдо ва маиший хизмат шохобчалари. Болалар спорт майдончалари. Қишлоқ врачлик пункти. Мана, энди «Маданият ва аҳоли дам олиш маркази» қад ростлади.

Мовий ранг лента қирқилгач, меҳмонлар ва тантана иштирокчилари ичкарига таклиф этилди. Аввало, Соёт қишлоғи тарихи музейи томоша қилинди. Шу қишлоқда таваллуд топган буюк сиймо, асл ватанпарвар Нажмиддин Кубро, Ўзбекистон Халқ достончиси Қурбонназар Абдуллаев (Бола бахши) ҳаёти ва фаолиятига бағишланган хоналар аждодларга меҳр-муҳаббат туйғусини оширди. Музейдан жой олган воҳа ўтмиши ва мустақиллик йилларида Хоразмда амалга оширилган ишлар ҳақидаги сурат-кўргазмалар ушбу марказ мазмун-моҳиятини белгилаб турибди. Марказда компьютер саводхонлиги, тўқувчилик, тикиш-бичиш, мусиқа ва спорт тўгараклари ташкил қилинган.

— Қизим Нигинахон тенгқур дўстлари Шоҳруҳ, Адолат, ­Меҳринисолар билан бу ерда ташкил қилинган инглиз тилини ўрганиш тўгарагига аъзо бў­лишган. Бизга шундай шарт-ша­роит­ларни яратиб, юртимизни янада гўзал қилаётган инсонларга таъзим қиламиз! — дейди ­Зарафшон Саъдуллаева.

— Мана шундай маданият ва дам олиш масканларидан бу йил яна ўнтаси фойдаланишга топширилади, — дейди вилоят ҳокимлиги Маданият ва спорт ишлари бошқармаси бошлиғи Шокиржон Мадаминов. — 2018 йилгача 48 та мана шундай ажо­йиб кошоналар вилоятимиз аҳолисига тортиқ қилинади. Шу билан бирга барча шаҳар ва туманларда маданият ва истироҳат боғларининг моддий-техник базаси мустаҳкамланади, хизмат кўрсатиш даражаси оширилади. Мана шу масканларда республикамиз ва вилоятимиздаги таниқли санъаткорлар, бадиий жамоалар иштирокида концертлар, ижодкорлар, турли касб эгалари билан учрашувлар ўтказилади. Ёш истеъдодларни излаб топиш, уларни қўллаб-қувватлаш, «Ягонасан, муқаддас Ватан!», «Ниҳол» каби қатор кўрик-танловлар бос­қичлари ҳам мана шундай кошоналарда ўтказилади.

Тадбирларда Маданият ва спорт ишлари вазири М.Ҳожиматов ҳамда вилоят ҳокими П.Бобожонов қатнашди.

 

Ҳусан СОБИРОВ



DB query error.
Please try later.