10.07.2014

«ЮРТИМ, ХАЛҚИМ ҲАҚИДА КУЙЛАШ МЕНГА ҒУРУР БАҒИШЛАЙДИ»

— дейди «Ниҳол» мукофоти соҳибаси Малика Эгамбердиева

«Шукур қил», «Ўрик гуллаганда», «Қошима», «Ял­ла-ялла» каби қўшиқлари билан элга танилган Малика Эгамбердиева 1990 йил 10 июнь куни Наманган вилоятида туғилган. Ўзбекис­тон давлат консерватория­сининг анъанавий хонандалик факультетини тамомлаган.

Санъаткор қандай фазилатларга эга бўл­моғи керак, деб ўйлайсиз?

— Мусиқа, куй-қўшиқ шундай хилқатки, сиз унинг сеҳрида яшайсиз, кимнинг­дир дардига малҳам бўласиз. Ижодкорлар оиласида туғилганим боис эсимни таниганимдан бери куйлашга қизиқаман. Бу йўлни танлаганлар машаққатларни енгиб ўтиши керак. Санъаткор сабрли, иродали, туғма қобилиятга эга бўлиши зарур. Яхши санъаткорни одамларнинг ўзи саралаб олаверади.

Юртимизда санъаткорларни, умуман ижод аҳлини ҳар томонлама қўллаб-қувватлаш учун турли танловлар ўтказилади. Сиз уларнинг аксарияти иштирокчисисиз!..   

— Мамлакатимизда ёш­ларга, ҳар бир касб эгаларига яратилаётган шарт-шароитларни кўриб очиғи шу юртда туғилганимдан фахрланаман. Шу пайтгача «Ягонасан, муқаддас Ватан!» танловида учинчи ўринни олдим, «Ниҳол» мукофотига лойиқ кўрилдим. «Эътироф — 2013» кўрик танловида иштирок этдим. Айниқса, тақдирлаш маросими менда катта таассурот қолдирди. Унда нафақат санъаткорлар, балки Ўзбекистонни дунёга танитаётган спортчилар ҳам муносиб рағбатлантирилди. Чет элларда турли танловларда қатнашганман. Аммо бунақа баланд руҳда ўтган маросимни биринчи бор кўришим. Барча танловлар санъат аҳлини қўллаб-қувватлашга қаратилган ва биз санъаткорларни янада кўпроқ ижод қилишга ундайди. 

— Ўзбек мусиқа санъатининг ўзига хос жиҳатлари ҳақида тўхталсангиз?

— Куй ва қўшиқ дунё халқ­ларини боғлаб туради. Лекин бизнинг санъатимиз бош­қалардан бутунлай фарқ қилади. Масалан, хорижий қўшиқларни биз бир ой ёки икки ой давомида маромига етказиб куйлашимиз мумкин. Лекин ўз­бе­кис­тонлик бўлмаган санъ­аткорлар бизнинг шашмақомларимизни юракдан чиқариб куйлаб беролмайди. Ўзбек санъати тарихи асрларга тенг ва мен ўтмишимизни унутмаган ҳолда миллий йўналишда ижод қиляпман. Бизнинг менталитет чет давлатдагиларга ўхшаган енгил ва мазмунсиз мусиқа ва клиплар яралишига йўл қўймайди.

— Асл санъаткор қандай бўлиши керак?

— Нафақат санъаткор, балки бошқалар ҳам инсонийликни унутмаслиги зарур. Санъат игна билан қудуқ қазишдек гап. У халқ назарида бўлади, шунинг учун одоб, маданият ва самимийликни йўқотмаслиги керак. Устоз санъаткорлар саҳнани муқаддас билган, унга ҳурмат ва эъзозда бўлган. Биз ҳам устозлар анъанасини давом эттиришимиз керак.

— Мустақиллик, Наврўз каби байрамлар тадбирларида куйлаш бахти сизга насиб этди...

— Катта саҳналарга чиқиб халқ назарида юришни ҳар бир санъаткор орзу қилади. Ҳар байрам чиққанимда Юртбошимиз ва халқимиз ишончини оқ­лашга ҳаракат қиламан. Аслида, бу каби юқори даражадаги тадбирларда саҳнанинг салобати ва масъ­улия­ти кишини ҳая­жонга солади. Чунки давлат миқёсидаги тантаналарга, энг аввало, элимиз ардоғидаги санъаткорлар таклиф қилинади. Улар қаторида бўлиш шараф. Шунга арзийдиган қўшиқлар яратиш бизнинг Ватан ва халқ олдидаги бурчимиздир. Санъаткор, аввало, уни шу даражага кўтарган Ватани ва мухлисларидан қарздорлигини ҳеч қачон унутмаслиги керак. Юртим ва халқим ҳақида куйлаш менга ғурур бағишлайди.

Тенгдошларингиз рекламага катта урғу бераётган бир пайтда сиз телеканалларда камнамосиз?

— Ҳозирда қўшиқларим фақат «Ёшлар» телеканалида намойиш этиляпти. Насиб этса, янада кўпроқ ишлаб, яхши ижод намуналарини яратиш, бошқа каналларда ҳам клипларимни намойиш этиш ниятим бор. Янги қўшиқлар устида кўпроқ ишлаяпман. Мен санъат йўлида ўзимга ва ота-онамга ишонаман. Уларнинг дуоси ва эътибори мен учун муҳим. Ҳар бир қўшиқ устида узоқ ишлашга одатланганман. Шошма-шошарлик қилиш маъқул эмас. Санъаткор шундай куй, ашула яратиши керакки, у халқнинг юрагида қолсин.

— Келажакдаги режаларингиз?

— Режаларим катта. Ўзбек санъатини бутун дун­ёга танитишга ҳисса қўш­сам, дейман. Мухлисларим учун яккахон концерт дастурини тайёрлаш ниятим бор. Концерт учун ўн бешта янги қўшиқ устида ишлаяпмиз. У хал­қимизга ёқади, деган умиддаман.

 

ЎзМУ талабаси

Малика РЎЗИЕВА суҳбатлашди.



DB query error.
Please try later.