01.07.2014

ЯГОНА ПОРТАЛНИНГ КЕНГ ИМКОНИЯТЛАРИ

Алоқа тарихи музейида Ўзбекистон Республикаси Алоқа, ахборотлаштириш ва телекоммуникация технологиялари Давлат қўмитаси ташаббуси билан Ягона интерактив давлат хизматлари портали фаолиятининг бир йиллиги муносабати билан «Аҳоли ва давлат органлари муносабатларида Ягона порталнинг роли» мавзуида матбуот анжумани бўлиб ўтди.

Тадбирда таъкидланганидек, ­Президентимизнинг Тадбиркорлик фаолиятини йўлга қўйиш ва давлат хизматларини кўрсатиш билан боғлиқ тарғиботларни янада такомиллаштириш чора-тадбирлари тўғрисидаги Қарори ижросини таъминлаш мақсадида ташкил этилган my.gov.uz — Ягона интерактив давлат хизматлари портали, энг аввало, аҳолининг ижро ҳокимияти органлари билан ўзаро онлайн мулоқотга киришишида муҳим қадам бўлди. Хусусан, мазкур портал одамларни ташвишга солаётган турли муаммолар юзасидан тўғридан-тўғри тегишли органга мурожаат қилиш имкониятини яратди.

Сўзга чиққанлар ўтган йил давомида Ягона порталда кенг кўламли, йирик лойиҳалар амалга оширилгани ҳақида алоҳида тўхталишди. Жумладан, унга 500 дан зиёд давлат ва хўжалик бош­қаруви органлари ва жойлардаги маҳаллий ҳокимиятлар улангани, аҳоли учун 200 турдаги хизматлар жорий қи­лингани, шунингдек, давлат органлари раҳбарлари қабулига онлайн ёзилиш, мавжуд бўш иш ўринлари учун маълумотномалар ҳамда биометрик паспорт олиш юзасидан онлайн ариза юбориш каби қатор қулайликлар яратилгани маълум қилинди.

Тадбирда Ягона порталда тадбиркорлар фаолиятини қўллаб-қувватловчи хизматлар жорий қилингани, аҳоли мурожаатлари билан ишлаш ва хизмат кўрсатиш самарадорлиги ошгани эътироф этилди. Анжуман якунида портални замонавий талаблар асосида янада ривожлантириш масалалари муҳокама қилинди.

 

Бобур ЭЛМУРОДОВ,

«Ўзбекистон овози» мухбири.



DB query error.
Please try later.