26.06.2014

ИНВЕСТИЦИЯ

эркин ҳаракат қилиши керак

Дунёда иқтисодий муносабатлар жадал ривожланаяпти. Техника, маҳсулот ёки хизмат сифатига бўлган талаб ва меъёрлар ошиб бораётир. Бугун бир маҳсулот харидоргир бўлса, эртага ундан зўри чиқаяпти. Молиявий манбаларни самарали бошқариш тараққиётнинг асосий омилларидан бирига айланди. Ҳозир ишчи кучи ёки ишлаб чиқариш билан боғлиқ ресурслар қанчалик фойда келтириши ҳам молиявий ресурсларни тўғри йўналтиришга боғлиқ.

Бундай замонда тараққиёт қои­даларига мослаша олмаган, ил­ғор тажрибаларни ўзлаштира олмаган иқтисодиёт орқада қолиб кетади. Инвестиция (фойда олиш мақсадида бирон мақсадга йўналтириладиган капитал) билан боғлиқ муносабатларни такомиллаштириш бу ўринда долзарб масалалардан ҳисобланади.

Олий Мажлис Қонунчилик палатасидаги ЎзХДП фракциясининг тегишли ишчи гуруҳи «Инвестиция фаолияти тўғрисида»ги Ўзбекистон Республикаси Қонунига ўзгартиш ва қўшим­чалар киритиш ҳақида»ги қо­нун лойиҳасини иккинчи ўқишга тайёрлаш олдидан яна бир бор кўриб чиқди. Унда фракция аъзолари қонун лойиҳаси бўйича шакл­лантирилган таклифларни меъёрига етказиш юзасидан фикр алмашишди.

Қонун лойиҳаси инвестиция жараёнларида хўжалик юритувчи субъектлар ва фуқароларнинг иштирокини янада кенгайтириш, модернизациялашга инвестиция киритиш учун қўшимча шароит яратиш, инвесторларнинг ҳуқуқлари ва мулкини ҳимоя қилиш масалаларини назарда тутади. Бу аҳолининг ижтимоий-иқтисодий фаоллиги ошишида, инвестиция оқими кўпайиб, маҳсулот ва хизматлар кўлами кенгайишида, демакки, турмуш фаровонлиги юксалишида муҳим аҳамият касб этади. Шуларни ҳисобга олиб, ЎзХДП фракцияси қонун лойиҳасини биринчи ўқишда қўллаб-қувватлаган эди.

Ҳозирда қонун лойиҳасини иккинчи ўқишга тайёрлаш жараёнида фракция таклифларини шакллантириш бўйича ишчи гуруҳи муайян ишларни амалга оширмоқда.

Ишчи гуруҳи йиғилишида қонун лойиҳасини ишлаб чиқишда «Норматив-ҳуқуқий ҳужжатлар тўғрисида»ги, «Рақобат тўғрисида»ги қо­нунлар, Ер кодекси ҳамда бош­қа қатор қонун ҳужжатлари талабла­ри ҳисобга олинган. Бундан ташқа­ри, ўзгартириш ва қўшимчаларни ишлаб чиқиш жараёнида инвестиция фаолиятига алоқадор халқаро шартномалар ва конвенция­лар, хорижий давлатларнинг қо­нунчилиги чуқур ўрганиб чиқилган.

Депутатлар қонун лойиҳасида назарда тутилган меъёрларни янада аниқлаштиришга қаратилган бир қатор таклифларни муҳокама этди.

Мастура САЙФИДДИНОВА, Олий Мажлис Қонунчилик палатасидаги ЎзХДП фрак­цияси аъзоси:

— «Инвестиция фаолияти тўғ­рисида»ги қонунга киритилаётган ўзгартириш ва қўшимчалар мамлакатимиз иқтисодиётига инвес­тициялар кириб келишини рағбатлантиришга хизмат қилади.

Қонун лойиҳасининг концепция­сида келтирилган мақсад вазифаларни тўлиқ акс эттириш учун инвестиция фаолиятини амал­га ошириш билан боғлиқ асосий тушунчалар рўйхатини қайтадан танқидий кўриб чиқишимиз керак. Инвестиция жараёнларига қўйилаётган замонавий талаблар муносабати билан қонунда мавжуд тушунчаларни янада аниқлаштириш зарурати бор.

Инвестицияларни амалга ошириш шакллари қаторига интеллектуал мулк объектларига эгалик қилиш ҳуқуқи қўшилишини жуда муҳим, деб ҳисоблаймиз. Қонун лойиҳасида бу ҳақда тегишли меъёр акс этиши зарур.

Инвесторлар, буюртмачилар, лойиҳа ишлаб чиқувчилар, пудратчилар ва таъминотчиларнинг ҳуқуқ ҳамда мажбуриятларини кафолатлаш бўйича фракциямиз таклифлари шакллантирилаяпти.

Ишчи гуруҳи электорат ман­фаат­ларига қаратилган так­лифларни кенг муҳокама қилиш мақсадида қонун лойиҳасини фракция­нинг кенгайтирилган мажлисида кўриб чиқиш лозим, деган хулосага келди.

Тўлқин ТЎРАХОНОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: