24.06.2014

ЎзХДП ГУРУҲИ АЪЗОЛАРИНИНГ ДОИМИЙ КОМИССИЯЛАРДАГИ ФАОЛИЯТИ

Алижон МАМАРАСУЛОВ, халқ депутатлари Сирдарё вилоят кенгашининг ёшлар сиёсати ва соғлом авлод масалалари бўйича доимий комиссияси раиси:

— Ҳозирда вилоятимиз аҳо­­лисининг қарийб 62 фоизини ёшлар ташкил қилади. Бугунги кунда уларни билим олиши, касб ўрганиши учун зарур шарт-шароитлар яратилмоқда. Шунингдек, мамлакатимизда кечаётган ижтимоий-сиёсий жараёнлардаги иштирокини янада кенгайтириш борасида бир қатор чора-тадбирлар белгиланмоқда.

Президентимизнинг Ўзбекистон Республикасида ёшларга оид давлат сиёсатини амалга оширишга қаратилган қарори эса бу борада дасту­руламал бўлиб хизмат қилмоқда.

Сирдарёлик ёшларни ҳар томонлама баркамол этиб тарбия­лаш, улар қалбида Ватан тақдирига дахлдорлик туйғусини қарор топтириш, сиёсий фаоллигини оширишда доимий комиссиямизни ҳам ўз ўрни бор.

Бугунги кунда «Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида»ги қарор асосида халқ депутатлари Сирдарё вилоят Кенгашининг Ёшлар сиёсати ва соғлом авлодни тарбиялаш масалалари бўйича доимий комиссия­си 2014 йилдаги иш режасини белгилаб олган.

Доимий комиссия ўтган даврдаги йиғилишларида «Таълим тўғрисида»ги қонун, «Кадрлар тайёрлаш миллий дастури», «Ўзбекистон Республикасида ёшларга оид давлат сиёсатининг асослари тўғрисида»ги қонун ижроси муҳокама этилди. Шунингдек, вилоятдаги касб-ҳунар коллежлари битирувчиларини ишга жойлаштириш, маҳаллий ҳокимликлар ҳузуридаги вояга етмаганлар билан ишлаш доимий комиссияси томонидан олиб борилаётган ишлар кўриб чиқилиб, қабул қилинган қарорлар тегишли ташкилотларга юборилди.

Шуни алоҳида таъкидлаш керакки, 2013/2014 ўқув йилида вилоятдаги 301 умумтаълим мактабини жами 13014 нафар ўқувчи тамомлади. Бугунги кунда вилоятдаги 4 академик лицей ва 47 касб-ҳунар коллежида умумтаълим мактабларининг 9-синф битирувчиларини ўқишга қабул қилиш бўйича консультатив марказлар фаолияти йўлга қўйилди.

Мазкур йўналишдаги ишлар самарадорлигини ошириш мақсадида доимий равишда тадбирлар ўтказиб келинмоқда. Бу ўқувчиларнинг ўзига маъқул келган йўналишни танлаши, касб-ҳунар коллежини битираётган йигит-қизларнинг мутахассислиги бўйича ишга жойлашишига кўмаклашади.

Шунингдек, вояга етмаганлар ўртасидаги никоҳнинг олдини олиш мақсадида бир гуруҳ меҳнат фахрийларининг ҳамда вилоят ҳокимлиги ҳузуридаги вояга етмаганлар ишлари бўйича комиссиянинг ота-оналарга мурожаати қабул қилинди.

Мазкур мурожаатнома «Оила-мактаб-маҳалла» ҳамкорлиги доирасида вилоятдаги барча хонадонларга тарқатилди. Бундан ташқари, умумий ўрта таълим мактабларида ота-оналар йиғилишларида унинг мазмун-моҳияти тушунтирилди.

Шунингдек, қизларни оилавий ҳаётга тайёрлаш, балоғат ёшига етмасдан турмуш қуришининг олдини олиш, ноқонуний никоҳга йўл қўймаслик каби долзарб масалалар ўртага ташланди.

Бундан ташқари, «Ёш оила қурувчилар мактаби» фаолияти самарадорлигини ошириш мақсадида жойлардаги ФҲДЁ, ҳуқуқ-тартибот идоралари, соғлиқни сақлаш муассасалари ходимларидан иборат тарғибот гуруҳлари шакллантирилди. Улар томонидан «Оила» кодекси, ҳуқуқий саводхонлик, тиббий маданият, соғ­лом турмуш тарзи тарғиб этилмоқда.

Бугунги кунда вилоятда касб-ҳунар коллежи битирувчиларини иш билан таъминлаш, оилавий тадбиркорликка жалб этиш мақсадида муҳим ишлар бажарилмоқда.

Биргина ўтган йили кичик бизнес ва оилавий тадбиркорлик билан шуғулланишни ният қилган 430 нафар битирувчига тижорат банклари томонидан 1 миллиард 590 миллион сўм миқдорида имтиёзли кредитлар ажратилди.

Доимий комиссиямиз кўмагида барча таълим муассасаларида иқтидорли ўқувчилар учун қизиқишларига қараб умумтаълим ва касбий фанлардан тўгараклар ташкил қилинган. Вилоят ўрта махсус, касб-ҳунар таълими бош­қармаси тасарруфидаги таълим муассасаларида касбий йўналишдаги тўгараклар сони 281, умумтаълим фанлар йўналишидаги тўгараклар сони 536 тани ташкил этади.

Ёшлар келажагимиз. Уларнинг ҳаётда ўз ўрнини топиши, билимли, кучли, доно бўлиб камол топиши барчамиздан улкан масъулият талаб этади.

«Ўзбекистон овози» мухбири

Нурали ОРИПОВ тайёрлади.



DB query error.
Please try later.