17.06.2014

КУЧЛИ ПАРТИЯ — КУЧЛИ БОШЛАНҒИЧ ТАШКИЛОТДАН БОШЛАНАДИ

Акрам АҲМЕДОВ, ҚОРАҚАЛПОҒИСТОН РЕСПУБЛИКАСИ, Бюджетдан ташқари пенсия жамғармаси Амударё туман бўлимидаги ЎзХДП бошланғич ташкилоти етакчиси:

— Бошланғич партия ташкилоти фаолиятини жонлантириш, унинг аъзоларини партия юқори ташкилотлари, Олий Мажлис Қонунчилик палатасидаги фракцияси олиб бораётган ишлар билан яқиндан таништириш жуда муҳим аҳамиятга эга, деб ўйлайман.

Шу боис Ўзбекистон Халқ демократик партияси тизимида бошланғич ташкилотларга Марказий Кенгаш ходимлари, Олий Мажлис Қонунчилик палатаси депутатлари келиши, муҳим масалаларга бағишланган тадбирларни айнан бошланғич ташкилотларда ўтказиши тизимли равишда олиб борилмоқда.

28 май куни бошланғич партия ташкилотимиз иши билан Олий Мажлис Қонунчилик палатасидаги ЎзХДП фракцияси аъзоси Назира Матяқубова яқиндан танишди. Партия аъзолари билан самимий суҳбатлашди. Депутатимиз бошланғич ташкилотимиз фаолиятини янада яхшилаш борасида бир қатор тавсиялар, маслаҳатлар берди. Партия аъзолари ўзларини қизиқтирган саволларга жавоб олишди.

Хусусан, тадбирда Бандлик дастури ижроси, касб-ҳунар коллежлари битирувчиларини иш билан таъминлаш, уларга яратилган имтиёзлар ҳақида сўз борди. Касб-ҳунар коллежлари ўқувчилари амалиётини самарали ташкил этиш, бириктирилган корхоналарда яратилган шарт-шароитларни ўрганиш масалаларида бошланғич ташкилотлар ҳам фаол иштирок этиши зарурлиги таъкидланди.

Менинг назаримда бошланғич партия ташкилотига кўрсатилаётган эътибор партия аъзоларини янада фаоллаштиради. Бошланғич ташкилот ҳамда унинг етакчиси атрофида жипслаштиради. Кучли партия кучли бошланғич ташкилотдан бошланади.

Гулчеҳра РЎЗИЕВА, НАВОИЙ ВИЛОЯТИ, Навоий шаҳридаги ЎзХДП ҳудудий бошланғич ташкилоти етакчиси:

— Муҳим тадбирлар, семинар-тренинглар айнан бошланғич партия ташкилотларида кўпроқ ўтказилиши мақсадга мувофиқ, деб ҳисоблайман. Бу жараёнда юқоридан қуйига эмас, қуйидан юқорига механизми ишлаши керак. Бошланғич партия ташкилоти етакчилари учун махсус ўқувлар ташкил этиш, сиёсатшунослар томонидан тавсиялар ишлаб чиқиш, бу борада жаҳон тажрибасини ўрганиш ғоятда зарур.

Ҳар ойнинг охирги шанба куни бошланғич партия ташкилотимизда долзарб масалаларга бағишланган сиёсий ўқув ва семинар-тренинглар ўтказилиб келинмоқда.

Яқинда бўлиб ўтган семинарда «Соғлом бола йили» Давлат дастури ижросини таъминлашда ЎзХДП ташкилотлари ва депутатлик корпуси олдида турган вазифалар муҳокама этилди.

Мутахассисларнинг аҳоли тиббий маданиятини ошириш, оилаларда соғлом турмуш тарзини тарғиб этиш, ёшларни турли зарарли иллатлардан асрашга бағишланган маърузалари эшитилди.

Бу борада ота-она, мактаб, маҳалла ҳамкорлигини изчил йўлга қўйиш юзасидан партия фаолларининг фикри тингланди. Ана шулардан келиб чиққан ҳолда, тарғибот гуруҳимиз режасига таклиф ва ўзгартиришлар киритилди.

Абдусалим ҚУДРАТОВ, САМАРҚАНД ВИЛОЯТИ, Пахтачи туман «Зарафшон» маҳалла фуқаролар йиғинидаги ЎзХДП бошланғич ташкилоти етакчиси:

— Маҳалла фуқаролар йиғинида 30 дан ортиқ партиямиз аъзолари истиқомат қилади. Бошланғич ташкилотимиз ўз фаолиятида халқ депутатлари туман Кенгашидаги партия гуруҳи билан ҳамкорликка алоҳида эътибор қаратмоқда.

Айниқса, маҳалладошларимизни депутатлар ва ҳамкор ташкилотлар кўмагида оилавий тадбиркорликка жалб қилишга алоҳида эътибор қаратяпмиз. Хусусан, жорий йилда ҳудудимизда касаначилик, паррандачилик, балиқчиликни йўлга қўйиш эвазига 28 янги иш ўрни яратилди.

Шунингдек, бошланғич ташкилотимизда партия гуруҳи билан ҳамкорликда аҳоли мурожаатларини ўрганиш борасида катта тажриба тўпланган. Ўтган давр мобайнида фуқаролардан ички йўлларни таъмирлаш, ичимлик суви таъминотини янада яхшилаш, уй-жой коммунал хўжалиги масалалари юзасидан мурожаатлар тушди.

Мазкур масалаларни ҳал этиш мақсадида давлат ҳокимияти ва бошқаруви органлари раҳбарларига депутатлик сўровлари юборилди. Натижада мурожаатлар қисқа муддатларда ўз ечимини топди. 2014 йилнинг ўтган даври мобайнида ўнлаб километр ички йўллар таъмирланди, 4 маҳаллада ичимлик суви таъминоти яхшиланди.

Демак, бошланғич ташкилот қанчалик кучли, ташаббускор бўлса, юқори партия ташкилотларини, маҳаллий Кенгаш депутатларини ҳаракатга келтиради, фаолликка ундайди. Энг муҳими, аҳолини ўйлантираётган масалалар жойида ўрганилади ва ўз вақтида бартараф қилинади.

«Ўзбекистон овози» мухбири

Нурали ОРИПОВ тайёрлади.



DB query error.
Please try later.