17.06.2014

РАВШАН ЭРМАТОВ ЖАҲОН ЧЕМПИОНАТИНИНГ ЭНГ ЯХШИ ҲАКАМИ

бу — sbnation.com сайти раҳбари Грэм МакЭрининг фикри

Швейцария ва Эквадор терма жамоалари ўртасидаги ўйинни шарҳлар экан sbnation.com сайти раҳбари Грэм МакЭри учрашувни бошқарган ҳамюртимиз Равшан Эрматов шаънига қуйидаги гапларни айтди. «Ҳамма ҳакамлар ҳам Швейцариянинг драматик тарзда ғалаба қозонишига имкон бермаган бўларди.

Раҳмат, Равшан Эрматов!»

«Ҳар қандай пьесанинг қаҳрамони бўлади, албатта. Сеферович урган голда Гонсалес ва Беҳрамининг ҳиссаси катта бўлганини таъкидлаш зарур. Бразилиядаги жаҳон чемпионати бошлангандан бери биз бунақа юқори савиядаги ҳакамликни кўрмаган эдик. Айнан шу жиҳат Швейцарияга ўз ўйинини кўрсатиш ва ғалаба қозониш имконини берди.

Охирги дақиқаларда майдон марказида Беҳрамига нисбатан рақиблар қўпол ўйнади. Ўзбекистонлик Равшан Эрматов ҳуштагини чалишдан олдин швейцариялик футболчига қаради. Беҳрами ўрнидан турган эди. Бу устунлик қоидасининг энг яхши намуналаридан бири бўлди.

Мабодо ҳакам шу вазиятда жарима зарбаси белгилаганида эквадорлик футболчилар ортга қайтиб ҳимояни мустаҳкамлаган бўлар эди. Катта эҳтимоллар билан ўйин дуранг билан тугарди.

Беҳрами ҳаракатда давом этаётганини кўрган рефери ҳуштак чалмади. Швейцариялик футболчилар эса тезкор қарши ҳужум натижасида гол уриб, ғалаба қозонди. Беҳрами йиқилиб жарима зарбаси ишлаши мумкин эди. Шу боис Эрматов қарор чиқаришдан олдин унинг ўйинни давом эттира олиш-олмаслигини кутди. Ўзбекистонлик ҳакам ақлли ва савияси баланд экани ўз тасдиғини топди. Равшан Эрматов жаҳон чемпионатининг энг ёрқин воқеаларидан бирига гувоҳ бўлишимизни таъминлади.

Мусобақанинг биринчи учрашувида ҳакамдан кўпчилик норози бўлди. Эндиликда биз Равшан Эрматов тимсолида ўйинни янада гўзал бўлишини таъминлайдиган ҳакамни кўряпмиз.

Тўғри, Швейцария ғалабага лойиқ эди. Бироқ тан олишимиз керак, бу ғалабага Равшан Эрматовнинг тезкор ва аниқ фикрлаши эвазига эришилди. У қандай ҳакам дейсизми? Равшан Эрматов жаҳон чемпионатининг энг яхши ҳаками!»

Темур ХУДОЙБЕРДИЕВ

тайёрлади.



DB query error.
Please try later.