12.06.2014

БИЗ ЎЗБЕКИСТОН ХАЛҚ ДЕМОКРАТИК ПАРТИЯСИНИ ТАНЛАДИК!

Исроил АЪЛОХЎЖАЕВ, Наманган вилояти, НамДУ иккинчи академик лицейи ўқувчиси:

— Мактабда ўқиб юрганимда хабарлар ёзиб туман газетасига юборардим. Бир куни улардан бири эълон қилинди. Шундан сўнг газета ўқишга қизиқишим янада ортди. Айниқса, газеталардаги сиёсий партиялар фаолияти билан боғлиқ мақолалар кўпроқ эътиборимни тортди. Шу тариқа сиёсий партиялар ҳақидаги тасаввурларим шакллана бошлади.

Шу тариқа менда ҳам сиёсий партиялардан бирига аъзо бўлиш истаги туғилди. Юртимиздаги барча сиёсий партияларнинг сайловолди дастурини, ғоясини, мақсадини ўрганиб чиққач, Ўзбекистон Халқ демократик партиясини танладим.

Ҳозирда «Истиқбол» ёшлар қаноти вилоят бўлими билан яқин алоқа ўрнатганман. Унинг сафларида мамлакатимиз ва халқаро майдонда рўй бераётган воқеалар, янгиликларни теран таҳлил эта оладиган, мустақил фикрга эга, турли ижтимоий масалаларни ҳал этиш бўйича ўз таклиф ва ташаббусларини билдирадиган, юксак интеллектуал салоҳиятли ёшлар кўпчиликни ташкил қилар экан.

Барча сиёсий партияларда ёшлар қаноти бор. Аммо ЎзХДП ёшлар масаласига алоҳида эътибор қаратмоқда. Биргина «Ёш сиёсатчи» кўрик-танлови бугун минглаб тенгдошларимиз ҳаётида алоҳида ўрин тутмоқда. Улар мазкур танловда қатнашиш орқали мамлакатимизда кечаётган сиёсий жараёнлар мазмун-моҳиятини чуқур тушунмоқда, миллий қонунчилигимизга киритилаётган янгиликлардан хабардор бўлишмоқда, долзарб ижтимоий масалаларни ҳал этиш юзасидан ўз таклифларини бермоқда.

Келажакда улар мамлакатимизнинг янада тараққий этишига муносиб ҳисса қўшади, деб ўйлайман.

Мафтуна ЭРГАШЕВА, Сирдарё вилояти, Мирзаобод ижтимоий-иқтисодий касб-ҳунар коллежи битирувчиси:

— Яқинда ЎзХДП «Истиқбол» ёшлар қаноти томонидан Сирдарё вилоятида ўтказилган ёшлар форумида иштирок этиб, партия аъзоси бўлган ёшларни сиёсий-ҳуқуқий билими, дунёқараши, муҳим масалалардаги баҳс-мунозараларининг гувоҳи бўлдим. Менда улар орасида бўлиш, ўзимнинг фикр-мулоҳазаларим, таклифларимни айтиш истаги туғилди. Шундан сўнг ЎзХДПга аъзо бўлишга қарор қилдим.

Мазкур партия олиб бораётган энг муҳим ишлардан бири — бу касб-ҳунар коллежлари битирувчилари бандлигини таъминлашга қаратилган ташаббусдир. «Коллеждан — корхонага» лойиҳаси доирасида ўтказилаётган меҳнат ярмаркаларида кўплаб битирувчилар доимий иш ўрнига эга бўлмоқда.

Шунингдек, халқ депутатлари маҳаллий Кенгашлардаги партия гуруҳлари томонидан касб-ҳунар коллежи битирувчилари бандлиги масаласи доимий мониторинг қилиб борилади. Тузилган уч томонлама шартномалар ижроси депутатлик назоратига олинган.

Мен ҳам партия кўмагида банкдан имтиёзли кредит олиб, ўз фаолиятимни йўлга қўймоқчиман. Тузилган бизнес-режага кўра, олинадиган кредит эвазига кичик тикувчилик цехи ташкил этаман. Унда 5 нафар тенгдошим ҳам иш билан таъминланади.

Лола ОРИПОВА, Тошкент вилояти, иқтисодчи:

— Тўғрисини айтсам, ногиронлар, кекса кишилар, ота-онасидан эрта ажраган болалар, беморларни кўрсам, уларга ёрдам бергим, оғирини енгил қилгим келади.

Бир куни тасодифан ЎзХДП томонидан ногирон болалар учун ўтказилган тадбирда иштирок этиб қолдим. Шундан кейин мазкур сиёсий кучни айнан аҳолининг ижтимоий ҳимояга муҳтож қатлами манфаатларини муҳофаза қилишини билиб олдим. Сиёсий партияга аъзо бўлиш ҳақидаги қарорим қатъийлашди. Менинг ўрним Ўзбекистон Халқ демократик партиясида экан.

Партия давлат томонидан аҳолининг ижтимоий ҳимояси учун ажратилаётган маблағларнинг аниқ етиб боришига алоҳида эътибор қаратмоқда. Хусусан, «Маҳалла — аҳолини манзилли ижтимоий қўллаб-қувватлаш маркази» лойиҳаси доирасида ўтказилган тадбирлар ана шу мақсадларга хизмат қилаяпти.

Фаррух АЛИЕВ, Тошкент шаҳри, телевидение ва радио режиссёри:

— Инсон қайси касбда ишлашидан қатъи назар мамлакатда кечаётган сиёсий жараёнларда иштирок этади. Бу унинг фуқаролик бурчи. Мен ҳам ўз сиёсий қарашларимни Ўзбекистон Халқ демократик партияси орқали ифода этишга қарор қилдим.

Чунки партия сайловолди дастурида аҳоли бандлигини таъминлаш, бу борада давлат ва ҳудудий дастурлар ижроси самарадорлигини ошириш ва шу орқали иш ўринларини кўпайтириш масаласига алоҳида эътибор қаратилган. Бу ғоятда муҳим масала. Зеро, ишли одамнинг ҳаётга интилиши, келажакка бўлган ишончи кучли бўлади.

Партиянинг Олий Мажлис Қонунчилик палатасидаги фракцияси ҳамда халқ депутатлари маҳаллий Кенгашлардаги партия гуруҳлари Иш ўринлари ташкил этиш ва аҳоли бандлигини таъминлаш дастури ижросини доимий назорат қилиб бораяпти.

«Ўзбекистон овози» мухбири

Нурали ОРИПОВ тайёрлади.



DB query error.
Please try later.