13.05.2014

ЭЛЕКТОРАТ МАНФААТИНИ ҲИМОЯ ҚИЛИШ УЧУН

мавжуд имкониятларни ишга солиб, ташаббус кўрсатиб ишлаш керак

Ўзбекистон Халқ демократик партияси Миробод туман кенгашининг пленуми бўлиб ўтди. Унда партия дастурий мақсадларини амалга ошириш ҳамда электорат манфаатини ҳимоя қилишни янада кучайтириш масаласи муҳокама этилди.

Туман партия кенгаши етакчиси Василий Воргудяев таъкидлашича, ўтган йилда «Билимдон», «Сарикўл», Ойбек номли ва «Янги замон» маҳаллаларида аҳолини иш билан таъминлаш, ижтимоий нафақалар тайинланишининг манзиллилиги, тиббий хизмат кўрсатишнинг сифати масалаларида мониторинг ўтказилган. Аниқланган камчиликларни бартараф этиш бўйича депутатлик назоратини олиб бориш юзасидан таклифлар тайёрланиб, халқ депутатлари Тошкент шаҳар Кенгашидаги ЎзХДП гуруҳига юборилган. Шунингдек, тегишли ташкилотлар билан ҳамкорликда олиб борилган ишлар натижасида электорат вакилларини ташвишга солаётган қатор ижтимоий масалалар ҳал этилган.

— Жорий йилда аҳолининг ижтимоий ҳимояга эҳтиёжманд қатлами манфаати билан боғлиқ масалаларда мониторинг ўтказиш амалиётини такомиллаштириш зарур, — деди В.Воргудяев. — Бунда, албатта, бошланғич партия ташкилотларимиз ва туманимиз ҳудудидан халқ депутатлари Тошкент шаҳар Кенгашига сайланган депутатларнинг куч ва имкониятларига таянамиз.

— Партиямизнинг дастурий мақсадларини амалга оширишда биз ҳам фаол иштирок этамиз, — деди «Истиқбол» ёшлар қаноти туман бўлими етакчиси Фарҳод Илҳомов. — Бугун туманда ЎзХДПнинг 3600 нафардан ортиқ аъзоси бўлса, шундан 1700 нафарга яқини 30 ёшгача бўлган тенгдошларимиздир. Улар орасида партия фаолиятида бевосита иштирок этишга қизиқиши баланд ёш фаоллар жуда кўп. Партиянинг ижтимоий-сиёсий тадбирлари, депутатларнинг ўз сайлов округида олиб бораётган фаолиятига уларни кенг жалб этсак, партия етакчилиги ва депутатликка муносиб ёшларни танлаш имконияти кенгаяди.

— 170 та бошланғич партия ташкилоти, бу ҳақиқатан ҳам жуда катта куч, — деди «Ўзбекистон темир йўллари» ДАТК «Ўзтемирйўлҳисоб» маркази Тошкент филиали бошлиғи ўринбосари, БПТ етакчиси Улуғбек Каримов. — Агар барча етакчилар бирлашиб ҳаракат қилсак, турли ижтимоий муаммоларни чуқур ўрганишимиз, уларнинг ечимлари бўйича асосли, ҳаётий таклифлар ишлаб чиқишимиз мумкин. Ахир орамизда ҳар хил соҳанинг мутахассислари бор. Фақатгина туман партия кенгаши турли йўналишлар бўйича гуруҳлар тузиб, фаолиятимизни тўғри ташкил этса, ҳақиқатан ҳам амалий жиҳатдан катта кучга айланамиз.

— Бугун нафақат ижтимоий-иқтисодий, балки, ёшларимиз ҳаётига таҳдид солаётган мафкуравий масалалар юзасидан ҳам фаолиятимизни янги босқичга олиб чиқиш талаб этилмоқда, — деди Академик рус драма театри режиссёри, БПТ етакчиси Юрий Фисан. — Сиёсий куч сифатида бугун мамлакат ёшларини ғоявий-мафкуравий жиҳатдан соғлом қилиб тарбиялашга биз ҳам масъулмиз. Шунинг учун мен юқорида билдирилган барча таклифларни қўллаб-қувватлаб, ёшлар сиёсати масаласида ҳам ишларимизни такомиллаштириш зарур, деб ҳисоблайман.

— Мамлакатимизда сиёсий партиялар, уларнинг депутатлик корпусига йилдан-йилга янги ҳуқуқлар, ваколатлар бериляпти, — деди ЎзХДП Тошкент шаҳар кенгаши раиси ўринбосари Маргарита Аҳмедбекова. — Демак, партиямизга ишонган, қўллаб-қувватлаган кишилар биздан шунга муносиб амалий ҳаракат, ҳаётий ташаббусларни кутади. Ўтган йилги фаолиятимизни танқидий баҳолаб, ўзимизда мавжуд куч ва имкониятлардан тўғри фойдаланиб ҳаракат қилсак, дастурий мақсадларимиз тўлиқ рўёбга чиқишига, албатта, эришамиз.

Пленумда партия фаолиятини кучайтириш, бошланғич ташкилотлар имкониятларидан самарали фойдаланиш, халқ депутатлари Тошкент шаҳар Кенгашидаги ЎзХДП гуруҳига муҳокама этиш, доимий комиссиялар йиғилишлари ва сессиялар кун тартибига олиб чиқиш учун турли масалаларда таклифлар бериб туришни изчил йўлга қўйиш борасида кўплаб фикрлар билдирилди. Уларнинг барчаси ҳисобга олиниб, тегишли қарорлар қабул қилинди.

Бекзод ШУКУРОВ 


DB query error.
Please try later.