06.05.2014

МУАММОГА ЕЧИМ ТОПИЛЯПТИ

фуқароларнинг сиёсий-ҳуқуқий билими ошяпти

ЎзХДП Бувайда туман кенгаши электорат вакиллари билан алоқани мустаҳкамлаш, ҳудудий муаммоларни ўрганиш ва ижобий ҳал этиш, аҳолини ижтимоий қўллаб-қувватлаш масалаларида Жамоатчилик қабулхоналари имкониятидан самарали фойдаланмоқда.

Айниқса, чекка қишлоқларда ташкил этилаётган кўчма Жамоатчилик қабулхоналари ижтимоий ҳимояга эҳтиёжманд кишилар муаммоларини аниқлаш, муайян ҳудуддаги ижтимоий масалаларни ўрганиш ҳамда ҳал этишда муҳим аҳамиятга эга бўлмоқда. Бундай тадбирлар ойда икки марта туманнинг турли ҳудудларида, айнан марказдан олис бўлган маҳаллаларда ўтказилмоқда.

Таҳлиллар аҳолининг Жамоатчилик қабулхонасига ишончи ортиб бораётганини кўрсатмоқда. Мурожаатларнинг мазмунидан келиб чиқиб, ҳуқуқий маслаҳат берилаяпти, йўл-йўриқ кўрсатилмоқда, айрим масалалар эса депутатлик сўровлари орқали ижобий ҳал этилмоқда.

Ана шундай кўчма Жамоатчилик қабулхонаси яқинда Алқор қишлоқ фуқаролар йиғинида ташкил этилди. Депутатлар, партия фаоллари ва ҳамкор ташкилотлар иштирок этган тадбирда фуқаролар кўпгина масалаларни ўртага қўйишди.

Масалан, Василахон Рустамова қишлоқ инфратузилмасини ривожлантириш, коммунал хизматлар кўрсатишдаги камчиликларни бартараф этиш, Маърифатхон Азимова касб-ҳунар коллежлари битирувчиларини иш билан таъминлашда қандай имтиёзлар борлиги, меҳнат фахрийси Баҳодир Туропов эса аҳолини иш билан таъминлаш масалаларида мурожаат қилишди.

Тадбирда иштирок этган қишлоқ фуқаролар йиғини мутасаддиларининг коммунал хизматлардаги камчиликлар юзасидан фикрлари тингланди, тегишли ташкилотларга депутатлик сўрови юбориладиган бўлди.

Шунингдек, касб-ҳунар коллежлари битирувчилари учун яратилган шарт-шароит, берилаётган имтиёзлар фуқароларга кенг тушунтирилди. Хусусан, яқинда қонунчилигимизга битирувчилар корхона ёки ташкилотга синов муддатисиз ишга қабул қилиниши билан боғлиқ меъёр киритилгани, унинг афзалликлари шарҳланди.

Бундан ташқари, аҳолини иш билан таъминлаш, жумладан, оилавий тадбиркорликка жалб этиш бўйича мавжуд имкониятлар ҳақида фикр алмашилди. «Оилавий тадбиркорлик тўғрисида»ги Қонун мазмун-моҳияти мисоллар ёрдамида очиб берилди. Айнан уй шароитида тадбиркорликнинг бу тури билан шуғулланиш афзалликлари, солиқ имтиёзлари, коммунал тўловлардаги енгилликлар чуқур тушунтирилди. Оилавий тадбиркорлик билан шуғулланиш, банкдан кредит олиш билан боғлиқ таклифлар айтилди.

Албатта, бундай тадбирлар олис ҳудудлардаги фуқароларнинг ижтимоий-сиёсий фаоллигини ошириш, мамлакатимизда кечаётган ўзгаришлар, қонунчиликнинг ривожланиши ҳақида хабардор қилиш, ҳуқуқий билимларини мустаҳкамлашга хизмат қилади.

Раҳима ҚЎРўОНОВА,

халқ депутатлари Бувайда туман Кенгаши депутати, ЎзХДП гуруҳи аъзоси.



DB query error.
Please try later.