12.04.2014

ЧЕТ ТИЛЛАРИНИ ЎРГАНИШ

ҳарбий соҳада ҳам муҳим эканлигини даврнинг ўзи кўрсатиб турибди

Ўзбекистон Республикаси ИИВ Тошкент олий ҳарбий-техника билим юртида «Олий ҳарбий таълим муассасаларида чет тилларини ўқитиш самарадорлигини ошириш йўллари» мавзусида илмий-амалий семинар бўлиб ўтди.

Анжуманда мамлакатимизнинг турли олий ўқув юртлари етакчи мутахассислари, ҳарбий билим юрти курсантлари иштирок этди. Маълумки, чет тилларни ўрганиш мамлакатимизда муҳим вазифалардан бири сифатида белгиланди. Ҳарбий билим юртларида ҳам бу масалага алоҳида эътибор қаратилмоқда.

Зеро, бугунги кунда чет тилларини ўрганиш табиий эҳтиёжга айланиб улгурди. Дунёда кечаётган глобаллашув жараёнлари ҳар кишидан илм-фан, ижтимоий ҳаётдаги олам янгиликлари билан доимий танишиб боришни талаб қилмоқда. Бу эса ўз она тилини қадрлаган ҳолда чет тилларини ҳам чуқур ўрганишни талаб этади.

Тадбирда чет тилини ўқитишдаги назарий-услубий муаммолар ва уларни ҳал қилиш йўллари, таълимда замонавий педагогик технологияларни қўллаш, ҳарбий олий таълим муассасаларида чет тилини ўқитишнинг долзарб муаммолари каби масалаларга оид маърузалар тингланди.

— Ҳозирги кунда кўпчилик олий таълим муассасаларида чет тили фани бўйича машғулот мавзуларини белгилашда анъанавий ёндашув устунлик қилиб келмоқда, — дейди ИИВ Академияси «Тиллар ва адабиёт» кафедраси бошлиғи Муҳиббек Рустамов. — Яъни, машғулот учун бош мавзу сифатида грамматика олиниб, дарс давомида бажариладиган барча амаллар шу мавзуни тушунтириш ва уни мустаҳкамлашга қаратилади. Бунинг натижасида талабалар чет тили грамматикасини назарий жиҳатдан пухта эгаллаган бўлишига қарамай, мулоқотни амалга оширишда жиддий қийинчиликларга учрайди. Бу муаммони ҳал этиш учун машғулотнинг бош мавзуси сифатида мулоқот жараёни олиниши тавсия этилади.

Ўзбекистон давлат статистика қўмитаси кадрларни қайта тайёрлаш ва статистика тадқиқотлари маркази «Ахборот-коммуникация технологиялари» кафедраси доценти Фарҳод Акбаров ўзининг «Ҳарбий таълим муассасаларида чет тилларини тезкор ўрганиш усуллари» номли маърузасида чет тилини ўқитишни икки босқичда амалга ошириш мақсадга мувофиқлигини таъкидлади. Биринчи босқичда кундалик ижтимоий ва маиший турмушда юзага келадиган вазиятларда мулоқотни амалга ошириш кўникмалари шакл­лантирилади ва ривожлантирилади. Иккинчи босқичда касбий ва илмий фаолиятда юзага келган вазиятларда мулоқотни амалга ошириш ўргатилади.

— Фикримизча, инглиз тилини самарали ўрганишда қуйидагиларга амал қилиш яхши самара беради, — деди у. — Хорижий тилдаги ҳарбий соҳага тааллуқли бўлган атамаларни самарали ўргатиш методикасини ишлаб чиқиш, қабул қилиш имтиҳонларида ёзиш ва гапириш талабларини киритиш, дарсларда камроқ вақтни қоидаларни ўргатишга ва кўпроқ вақтни амалий жараёнларга сарфлаш. Бундан ташқари, компьютерда чет тилини ўргатадиган дастурлардан оқилона фойдаланиш ҳам яхши натижа беради.

Иштирокчиларнинг фикрича, ўтказилган семинар келгусида курсант, тингловчи ва талабаларнинг дунёқарашини кенгайтиришга ва чет тилларини ўрганишга қизиқишини ривожлантиришга ва Ватан ҳимоячиларини ҳар томонлама пухта тайёрлашга ижобий таъсир кўрсатади.

Ўз мухбиримиз.


Фикр ва мулохазалар

Защита от автоматических сообщений

Сўнгги янгиликлар: