Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
10.04.2014

БЎЛАЖАК ОЛИМПИЯЧИЛАР ТОШКЕНТДА БЕЛЛАШМОҚДА

Тошкент шаҳридаги бадиий гимнастика бўйича болалар-ўсмирлар республика ихтисослашган олимпия захиралари спорт мактабида ўсмирлар ва қизлар ўртасида спорт гимнастикаси бўйича Осиё чемпионати бошланди.

Халқаро гимнастика федерацияси кўмагида Осиё гимнастика иттифоқи, Ўзбекистон гимнастика федерацияси, Маданият ва спорт ишлари вазирлиги томонидан ташкил этилган ушбу нуфузли мусобақа қитъа гимнастикачилари учун жорий йил 16-28 август кунлари Хитойнинг Нанкин шаҳрида ўсмирлар ўртасида бўладиган II Олимпия ўйинларига йўлланма берадиган саралаш турниридир.

Мазкур нуфузли мусобақага мезбонлик қилиш ҳуқуқи Осиё гимнастика уюшмаси Ижроия қўмитасининг 2012 йили Қатарда ўтказилган йиғилишида Ўзбекистонга берилди. Осиё гимнастика уюшмаси мам­лакатимизда Президент Ислом ­Каримов раҳбарлигида спортни, жумладан, гимнастика турларини ривожлантиришга доимий эътибор қаратилаётгани, юртимизнинг нуфузли спорт анжуманларини юқори савияда ўтказишда бой тажрибаси ва имкониятлари борлиги, экспертлар, мутахассислар, мураббийлар ва спортчиларнинг ижобий фикрини инобатга олиб, мазкур чемпионатни Тошкент шаҳрида ўтказишга қарор қилди.

9 апрель куни пойтахтимизда спорт гимнастикаси бўйича Осиё чемпионатининг тантанали очилиш маросими бўлди.

Чорлов садолари остида майдонга Осиё чемпионати иштирокчилари — 22 мамлакат терма жамоалари вакиллари кириб келади.

Ўзбекистон Республикаси маданият ва спорт ишлари вазири ­М.Ҳожиматов ва бошқалар Президентимиз Ислом Каримов раҳнамолигида кўплаб соҳалар сингари спортни ривожлантириш борасида амалга оширилаётган изчил ислоҳотлар улкан самаралар бераётганини таъкидлади.

— Ўзбекистон дунёнинг спорт марказларидан биридир, — дейди Халқаро гимнастика федерацияси (FIG) спорт гимнастикаси бўйича техник қўмита раиси Нелли Ким. — Мамлакатингизда ҳар қандай йирик тадбирни юксак савияда ташкил этиш учун барча шарт-шароит яратилган. Спорт гимнастикаси бўйича Осиё қитъасининг нуфузли чемпионати ҳам Тошкентда ўтаётгани бунга ёрқин мисолдир.

Мамлакатимизда мустақилликнинг илк йилларидан ёш авлодни маънан ва жисмонан соғлом этиб тарбиялаш, уларни замонавий услублар асосида чуқур таълим олиши, қизиққан соҳалар бўйича касб-ҳунар эгаллаши, жисмоний тарбия ва спорт билан мунтазам шуғулланиши учун қулай шароит яратиш давлат сиёсатнинг энг муҳим йўналишларидан бирига айланган.

Ўзбекистонда кашф этилган «Умид ниҳоллари», «Баркамол авлод», Универсиада спорт ўйинларидан таркиб топган уч босқичли узлуксиз тизим ёш авлодни ҳар жиҳатдан баркамол вояга етишида муҳим аҳамият касб этаётир. Бу тизим катта спортда юқори натижаларга эришишга қодир моҳир спортчиларни тайёрлашда тажриба ва маҳорат мактаби бўлиб хизмат қилаётганини ҳаётнинг ўзи кўрсатиб турибди.

Бу саъй-ҳаракатлар самарасида мамлакатимизда ватанпарвар, иродаси кучли, ўз мақсади сари дадил интилувчи навқирон авлод вояга етди. Ана шундай баркамол авлод вакилларидан бўлган спортчилар энг нуфузли халқаро мусобақаларда ўз маҳоратини кўп бор намойиш этиб, Олимпия ва Осиё ўйинлари, қитъа ва жаҳон чемпионатларида Ватанимиз шарафини муносиб ҳимоя қилаётир.

Халқаро майдонда дунёнинг энг кучли спортчилари сифатида тан олинган спорт гимнастикаси бўйича жаҳон чемпионати ва Олимпия ўйинлари совриндори Антон Фокин, Пекин Олимпиадасида бронза медални қўлга киритган трамполинчи Екатерина Хилько, 2012 йили Лондонда ўтган Олимпиадада қатнашган биринчи бадиий гимнастикачимиз Ульяна Трофимова бугун гимнастика билан шуғулланаётган ёш авлод вакилларига ўрнак бўлмоқда.

Уларнинг ортидан етишиб келаётган умидли спортчиларимиздан ­Азиза Мамажонова бадиий гимнастика бўйича Осиё чемпионатида мутлақ ғолиб бўлди. Спорт гимнастикаси ­билан шуғулланаётган Дилноза ­Абдусалимова қитъа биринчилигида бронза медални қўлга киритди, ­Эдуард Шаулов эса қатор халқаро турнирларда ғолиб ва совриндор бўлди. Бу ёш спортчиларимизнинг барчаси 2010 йили Сингапурда илк маротаба ўтказилган ўсмирлар ўртасидаги I Олимпия ўйинларида муносиб қатнашиб, мухлису мутахассислар эътиборига тушди.

Пойтахтимизда бошланган спорт гимнастикаси бўйича Осиё чемпионатида қитъамизнинг энг истеъдодли гимнастикачилари совринли ўринлар ва Нанкинда бўладиган ўсмирлар ўртасидаги II Олимпия ўйинлари йўлланмалари учун ўзаро куч синашади.

Осиё чемпионатида ўғил болалар ўнта, қизлар тўққизта олимпия йўлланмаси учун рақобатлашади. Белгиланган қоидаларга биноан бир мамлакат вакилларига кўпи билан иккита йўлланма берилади.

Мусобақаларда мамлакатимиз шарафини ўн нафар спортчимиз ҳимоя қилади.

Осиё чемпионатининг тантанали очилиш маросимида катта концерт дастури намойиш этилди.

Зоҳир ТОШХЎЖАЕВ,

Байрам АЙТМУРОДОВ,

ЎзА мухбирлари.



DB query error.
Please try later.