05.04.2014

ХОТИН-ҚИЗЛАР ТАШАББУСЛАРИ ҚЎЛЛАБ-ҚУВВАТЛАНСА

яратилган имтиёзлар уларга тушунтирилса, бандлик билан боғлиқ кўп масалаларга ечим топилади, янги-янги иш ўринлари очилади

Оила тинчлиги, турмуш фаровонлиги, жамият тараққиёти кўп жиҳатдан хотин-қизларнинг ижтимоий-сиёсий фаоллигига боғлиқ. Шу боис ҳам уларни қўллаб-қувватлаш, бандлигини таъминлаш, оғирини енгил қилиш ишларига давлат даражасида тобора катта эътибор қаратилмоқда. ЎзХДПнинг Сайловолди ҳамда 2011-2014 йилларга мўлжалланган Ҳаракат дастурларида ҳам бу борада устувор вазифалар белгиланган. Ушбу дастурлар ижросини таъминлашда партиянинг «Фаол аёллар» қаноти Сурхондарё вилоят бўлими муносиб ҳисса қўшишга ҳаракат қилмоқда.

Бунинг бир мисолини ЎзХДП «Фаол аёллар» қаноти Сурхондарё вилоят бўлими мисолида ҳам кўриш мумкин.

Нилуфар ШАЙМАНОВА, ЎзХДП Сурхондарё вилоят кенгашининг хотин-қизлар ижтимоий-сиёсий фаоллигини ошириш сектори мудири:

— Биз хотин-қизлар ижтимоий-сиёсий фаоллигини ошириш бўйича маълум тажрибага эгамиз. Аввало, хотин-қизлар иштирокида турли мавзуларда учрашув, семинар ва давра суҳбатлари ташкил этяпмиз. Шу жараёнда кам даромадли оилаларни қийнаётган масалаларни, вақтинча ишсизларни аниқлаб, чо­ра-тадбирлар кўряпмиз.

ЎзХДП Сурхондарё вилоят кенгаши «Фаол аёллар» қаноти ташаббуси билан маҳаллаларда ўтказилган учрашувларда билдирилган таклифлардан келиб чиқиб, уйда маҳсулот ишлаб чиқараётган ҳамда турли хизматлар кўрсатаётган фуқаролар билан корхоналар ўртасида ко­операция алоқалари ўрнатилиб, кўплаб кишига касаначи сифатида меҳнат дафтарчалари очилди. Бундай амалий ишлар натижасида партиямизга қизиқувчи, сафимизга кириш истагини билдираётган хотин-қизлар тобора кўпайиб бормоқда.

Лутфия ЗОКИРОВА, Олтинсой туманидаги «Халқобод» маҳалла фуқаролар йиғини маслаҳатчиси, ЎзХДП аъзоси:

— Ҳудудимиз туман марказидан 20 километр олисда. Маҳалламизда 5 минг нафарга яқин аҳоли истиқомат қилади. Уларнинг, айниқса, хотин-қизларнинг бандлигини таъминлаш биз учун устувор вазифа ҳисобланади. ЎзХДП туман кенгаши «Фаол аёллар» қаноти ва бошланғич ташкилотлар билан бирга оилаларнинг шарт-шароити, ички имкониятларини ўрганиб чиқдик. Тарғибот-тушунтириш ишларини олиб бордик. Хусусан, иссиқхона хўжалиги, чорвачилик, паррандачилик, боғдорчиликни ривожлантириш имкониятлари ҳақида суҳбатлар ўтказдик. Натижада биргина ўтган йил давомида 30 дан ортиқ хонадонда иссиқхона ташкил этилди. Бундан ташқари, жойларда касаначиликни ривожлантириш, сервис хизматини яхшилаш борасида ҳам кўплаб ташаббуслар туғиляпти. Хотин-қизлар бандлигини таъминлашда бу муҳим аҳамият касб этмоқда.

 

Дилноза ТОШМУРОДОВА, Олтинсой тумани, «Миршоди» маҳалласи:

— Касаначилик асосида иш бошлаганимга уч йилдан ошди. 200 нафарга яқин шогирд тайёрладим. Устоз-шогирд анъанасини давом эттириш учун алоҳида хонага эҳтиёжимиз бор эди. «Фаол аёллар» қаноти Сурхондарё вилоят бўлими ташаббуси билан туманимизда ташкил этилган тадбирдан кейин бу масала ижобий ҳал этилди. Натижада ҳунар ўрганган қишлоқ аёлларидан яна 10 нафари яқинда янги иш ўрни билан таъминланди.

Ишга жойлашиш истагида юрган хотин-қизлар кўп. Уларни иш билан таъминлаш имкониятлари ҳам етарли. Фақат буни тўғри тушунтириш, дастлабки даврда уларни қўллаб-қувватлаш керак. Буни биз ўз тажрибамиз мисолида кўряпмиз.

Олмахон БЕРДИМУРОДОВА, ЎзХДП «Фаол аёллар» қаноти Термиз туман бўлими етакчиси:

— Айни кунда туманимизда 94 минг нафарга яқин аҳоли истиқомат қилса, уларнинг аксарият қисмини ёшлар ва хотин-қизлар ташкил этади. Тар­ғибот-тушунтириш ишлари, ҳамкор ташкилотлар билан бирга кўрсатилган амалий ёрдам туфайли оилавий тадбиркорлик, касаначилик, томорқалардан унумли фойдаланиш эвазига ўтган йили 250 дан ортиқ хотин-қиз учун янги иш ўринлари яратилишига эришилди.

«Дўст­лик» маҳалласида истиқомат қилувчи фаол пар­тия­дошимиз Малоҳат ­Муроталиева 2009 йилда болажонлар учун турли ўйинчоқ ва сумкалар ишлаб чиқаришни йўлга қўйди. Бу ерда ўн нафардан ортиқ хотин-қиз меҳнат қилмоқда. Биз эса кўп жойларда унинг бошлаган иши, бугун эришаётган натижаларини мисол қилиб келтирамиз. Бу каби эзгу ишларнинг кўпайиши дастурий мақсадларимиз амалга ошишида муҳим омил бўлади, албатта.

Ҳаётни кузатиб, қилинаётган ишлар натижаларини кўриб, шунга иқрор бўляпмизки, агар хотин-қизлар ташаббуслари, истаклари қўллаб-қувватланса, яратилган шароит ва имтиёзлар уларга тушунтирилса, бандлик билан боғлиқ кўп масалаларга ечим топилади, янги-янги иш ўринлари яратилади.

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.