Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2019   
Du Se Cho Pa Ju Sha Ya
25 26 27 28 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
03.04.2014

ЖИЗЗАХДА ЦЕМЕНТ ЗАВОДИ ИШ БОШЛАДИ

Президентимиз раҳнамолигида корхоналарни техник ва технологик қайта жиҳозлаш, маҳаллий хомашё­дан сифатли ва рақобатбардош замонавий қурилиш материаллари ишлаб чиқаришни йўлга қўйиш, экспорт салоҳиятини янада кенгайтириш, аҳоли банд­лигини таъминлаш бўйича Жиззах вилоятида ҳам кенг кўламли ишлар амалга оширилмоқда.

Наврўз байрами нишонланаётган шу кунларда вилоятда яна бир хушхабар тарқалди. Қиймати 116 миллион АҚШ доллари миқдоридаги маблағ эвазига ­Зафаробод тумани ҳудудидаги  ­Пистали тоғ бағрида Олмалиқ кон-металлургия комбинати таркибидаги портландцемент ва оқ цемент ишлаб чиқаришга мўл­жалланган «Жиззах цемент» заводи ишга тушди.

 2012 йил 6 июлда Жиззах вилоятида портландцемент ва оқ цемент ишлаб чиқаришни ташкил этиш инвестицион лойиҳасини амалга ошириш тўғрисидаги Вазирлар Маҳкамасининг қарорига асосан ўтган йилнинг апрель ойида цемент заводини қуриш ишлари бошлаб юборилган эди. Қисқа муддатда замонавий асбоб-ускуналар келтирилди, қурилиш-монтаж ишлари жадал олиб борилди. Бу борада «Элементқурилиш» шуъба корхонаси, «Ўзэлектроаппарат» қўшма корхонаси ҳамда Олмалиқ кон-металлургия комбинати жамоаси меҳнат аҳлининг муносиб ҳиссаси борлигини айтиб ўтиш ўринли. Шунингдек, қурилиш ишларида Туркиянинг «Dal teknik makina ticaret ve sanayi a.s» компанияси жамоаси ҳам иштирок этди.

Корхонадан 1,5 километр узоқликда бўлган Балиқли тоғ ва Кўтармо тоғ бағридан топилган оҳактош захиралари завод учун 150 йилга етиши тахмин қилинмоқда. Портландцемент ва оқ цемент ишлаб чиқариш учун хомашё ҳамда компонентлар республикамизда мавжуд бўлиб, гипс — Бухородан, лёс — Жиззахдан, кварц қуми — Навоийдан, каолин — ­Ангрендан, таркибида темир моддаси бўлган қўшимчалар  — ­Олмалиқдан келтирилади.

Қувонарлиси, ушбу корхона  республикамиздаги бешинчи цемент заводи бўлиши билан бирга, оқ цемент ишлаб чиқаришга ихтисослашган ягона корхонадир. Бу корхонани бунёд этишдан асосий мақсад юртимизда бўладиган қурилишларни сифатли ва арзон хомашё билан таъминлаш, саноат сало­­­ҳ­иятини юксалтириш, аҳоли банд­лигини таъминлаш, халқимизнинг турмуш даражасини янада яхшилашдан иборатдир. 

— Тенгдошларим қатори мен ҳам ушбу янги корхонада ўз мутахассислигим бўйича ишга жойлашдим, — дейди энергия таъминоти бўлинмаси оператори Жамшид Самиев. — Бундай йирик ва муҳим корхонада ишлаётганимдан ва юртимиз тараққиётига ўз ҳиссамни қўшаётганимдан фахрланаман.    

Ҳозирда корхонанинг тўла қувват билан ишлаши учун 8 та 40 тонналик автосамосвал, 2 та 5 кубли экскаватор, 2 та «Дресста» юкловчи кон техникалари харид қилинди. Энг сўнгги русумдаги техник жиҳозлар ўрнатилди. 430 нафар мутахассис иш билан таъминланди. Корхона бир йилда 350 минг тонна оқ цемент ёки 760 минг тонна портландцемент ишлаб чиқаради. Оқ цементнинг 70 фоизидан ортиғи экспортга йўналтирилиши кўзда тутилган. Келгусида  корхонанинг иккинчи навбатини қуриш ва иш ўринларини кўпайтириш режалаштирилмоқда.

Корхонанинг очилиш маросимида Ўзбекистон Республикаси Бош вазирининг ўринбосари Ғуломжон Ибрагимов, вилоят ҳокими Сайфуддин Исмаилов, Туркиянинг «Dal teknik makina ticaret ve sanayi a.s» компанияси раҳбари Жавдад Дал, Олмалиқ кон-металлургия комбинати бош директори, Ўзбекистон Қаҳрамони Александр Фармоновлар сўзга чиқиб, корхона халқимизнинг турмуш даражасини яхшилашга хизмат қилишини алоҳида таъкидлашди. Шундан сўнг корхона қурилишида фаол меҳнат қилган бир гуруҳ қурувчиларга вилоят ҳокимлиги ҳамда Олмалиқ кон-металлургия комбинати томонидан совғалар тақдим этилди. Тадбир Наврўз шодиёналарига бағишланган куй-қўшиқларга уланиб кетди.  

Иброҳим ЖОНУЗОҚОВ,

«Ўзбекистон овози» мухбири.


DB query error.
Please try later.