01.04.2014

МАКТАБГАЧА ТАЪЛИМ ТИЗИМИ РИВОЖЛАНАДИ

таълим масканлари фаолиятини янада кучайтириш, моддий-техника базасини мустаҳкамлаш таълим тизимида муҳим масала ҳисобланади. Чунки мактабгача таълим соғлом авлодни тарбиялашда пойдевор вазифасини ўтайди. Шунинг учун «Соғлом бола йили» Давлат дастурида бу соҳадаги ишларни чуқурлаштиришга алоҳида эътибор қаратилди.

Айтиш керакки, таълим соҳасига ажратилаётган Давлат бюджети маблағларининг ўрта ҳисобда 10 фоизи болалар боғчалари таъминотига йўналтирилмоқда. Ҳозирда юртимиздаги 5000 га яқин боғчада 600 мингдан кўпроқ бола 52 минг нафардан ортиқ педагог-тарбиячи қўлида тарбияланмоқда. Давлат муассасалари билан бирга, нодавлат мактабгача таълим муассасалари ривожланишига шароит яратиб берилмоқда. Шунингдек, болаларни мактабга тайёрлашнинг қисқа муд­датли гуруҳлари ташкил этиб келинмоқда.

«Соғлом бола йили» Давлат дастури асосида мактабгача таълим тизимини такомиллаштиришга қаратилган ишлар янада ривожланади. Давлат дастурида болалар боғчаларини илмий-методик қуроллантириш, мактабгача таълимнинг замонавий стандартини ишлаб чиқиш, тизимга янги мазмун ва технологияларни татбиқ этиш, болалар соғлиги ва ҳаётини муҳофаза қилиш, жисмоний ва руҳий ривожланишини таъминлаш масалалари эътиборга олинган.

Хусусан, Давлат дастурининг 4-бўлимида бола шахсини соғлом шакллантиришда таълим тизими ролини янада ошириш, мактабгача таълим тармоғини кенгайтириш, юқори малакали кадрлар билан таъминлаш масалаларига алоҳида эътибор қаратилган.

Мактабгача таълим тизимини янада ривожлантиришнинг 2015-2020 йилларга мўлжалланган тегишли дастур лойиҳасини ишлаб чиқиш, болаларни мактабга тайёрлаш ишларини қишлоқ жойларда изчил амалга ошириш белгиланаётгани ­муҳимдир. Дастур асосида мамлакатимиздаги болаларнинг ўрта ҳисобда 45 фоизини мактабгача таълим муассасаларига қамраб олиш кутилмоқда.

«Соғлом бола йили» Давлат дастурига мувофиқ энг замонавий технологиялар асосида боланинг интеллектини эрта аниқлашга қаратилган тарбиявий, миллий урф-одатларимизга хос ўйинлар мажмуаси ишлаб чиқилади. Бир сўз билан айтганда, Давлат дастурида болаларни мактабга тайёрлаш тизимини такомиллаштириш, бола интеллектини ривожлантириш масалалари кенг қамраб олинган.

Ўзбекистон Халқ демократик партияси халқ таълими соҳасидаги ислоҳотларни изчил қўллаб-қувватлаб келмоқда. Таълим тизими ходимларининг ижтимоий ҳимоясини мустаҳкамлаш тарафдори сифатида ўз таклифларини илгари сурмоқда. Шу боис «Соғлом бола йили» Давлат дастурида белгиланган вазифалар ижроси таъминланишида фаол иштирок этишимиз талаб этилади. Бунинг учун халқ депутатлари маҳаллий Кенгашлардаги партия гуруҳларидан тортиб, фракциямизгача ўз вазифасини аниқ белгилаб олиши ва улар ижроси бўйича қатъиятлик билан фаолият юритиши керак бўлади.

Шуҳрат ТУРСУНБОЕВ,

Олий Мажлис Қонунчилик палатаси депутати, Фан, таълим, маданият ва спорт масалалари қўмитаси аъзоси.



DB query error.
Please try later.