11.03.2014

НУҚТАИ НАЗАР

Акрам ҲОШИМОВ, халқ депутатлари Тошкент шаҳар Кенгашидаги ЎзХДП гуруҳи аъзоси:

— Сиёсий партия қонунлар лойиҳаларини ишлаб чиқиш ва қабул қилишда, қонунлар ҳамда муҳим давлат дастурларининг бажарилиши устидан парламент назоратини ўрнатишда парламентдаги фракцияси орқали иштирок этади. Демак, фракция партиянинг ғояларини рўёбга чиқариш, сайловолди дастурий мақсадларини қонунларда акс эттиришда асосий куч ҳисобланади.

Жаҳоннинг ривожланган мамлакатлари тажрибаси кўрсатмоқдаки, ўз электорати билан мустаҳкам алоқа ўрнатган, унинг хоҳиш-иродаси, кайфиятини доимий равишда ўрганиб бориш тизимини яратган ҳамда қонун ижодкорлиги жараёнида шу таҳлиллардан самарали фойдалана олган сиёсий партия сайловчиларга берган ваъдаларини амалда бажара олади. Чунки ҳаётий фикр-мулоҳаза, таклифлар асосида шаклланган позиция электорат манфаати ҳимоя­сига кўпроқ хизмат қилади.

Шуларнинг барчасини ҳисобга олиб, партиямизнинг Олий Мажлис Қонунчилик палатасидаги фракцияси мажлислари кун тартибига киритилаётган ҳар бир масалани, аввало, партия тизимида муҳокамадан ўтказиш тажрибасини янада кенгроқ қўллаш, такомиллаштириш зарур, деб ҳисоблайман.

Бунда, биринчи навбатда, халқ депутатлари маҳаллий Кенгашларидаги партиямиз гуруҳлари фаол иштирок этиши керак. Бунинг учун албатта фракция аъзолари иштирокида мажлис, давра суҳбатлари ўтказиш шарт эмас. Мулоқотни замонавий ахборот-коммуникация технологиялари асосида тезкор равишда ташкил этиш мумкин ва бу кўпроқ самара беради, назаримда.

Бундан ташқари, партия ташкилотлари ҳамда маҳаллий Кенгашлардаги депутатларимиз аҳолининг ижтимоий муҳофазага эҳтиёж­манд қатлами манфаатлари билан боғлиқ турли масалаларни жойларда мустақил равишда ўрганиб, таҳлил этиб бориши, унинг натижаларини фракцияга етказиб туриши даркор. Фракция аъзолари эса бу маълумотларга асосланиб, қонунлар лойиҳасига таклиф тайёрласа, мақсадга мувофиқ бўлади.

Умуман олганда, фракция фаолиятини ташкилий, услубий жиҳатдан қўллаб-қувватлаб, мамлакат ижтимоий-сиёсий ҳаётига оид таҳлиллар билан уни таъминлаб турсак, биринчидан, ўз бурчимизни бажарган бўламиз, иккинчидан, Сайловолди дастуримизни ҳаётга татбиқ этиш кафолати янада мустаҳкамланади.



DB query error.
Please try later.