11.03.2014

ҚИНҒИР ЙЎЛНИНГ ОХИРИ

афсус ва надомат бўлади

Жиззахлик Элнора Илҳомова Тошкент шаҳрига дўстлари билан учрашишга келди. У кафелардан бирида Олимхон Боқиев билан танишди. Биринчи учрашувдаёқ бир-бирини ёқтириб қолишдими, ҳар ҳолда Юнусобод туманидаги кўп қаватли уйлардан бирида яшай бошлашди. Турган гапки, ҳар ойда ижара пулини тўлаш ҳеч қаерда ишламайдиган икки бекорчига оғирлик қилади.

Олимхон ижара учун пул зарурлигини айтди.

— Мен қаердан пул топаман? — зарда қилди Элнора.

Олимхон бироз ўйланиб тургач, тегишли альбомни қўлига олиб, ундаги бир суратга ишора қилганча Элнорага деди:

— Менга қара, мана бу суратдаги амманг бой яшайдиганга ўхшайди. Уйини ўмармаймизми?

— Қандай қилиб? — сўради Элнора.

— Сенга айтсам, менда газли тўппонча бор. Уларни қўрқитамиз.

Элнора эътироз билдирди:

— Аммамнинг ёш болалари бор-ку, ахир.

— Бўлмаса, квартиранинг ижара ҳақини сен тўлайсан, — бақирди Олимхон.

Улар анча тортишишди. Охири Элнора унинг шартига кўнди.

Ҳеч жойда ишламайдиган Латифжон Муқимов, Сардор Саидазов ва Элнора Илҳомовалар автомашинага ўтириб, Қибрай туманида яшовчи амманинг уйига йўл олди. Олимхон пневматик тўппонча ва йиғиладиган пичоқни чўнтагига солди. Манзилга етиб борганда Олимхон Сардорга тўппончани берди.

— Латиф, сен сигнални кутиб тур. Элнора, сен биз билан юр, аммангнинг уйини кўрсатасан.

Шум ниятли кимсалар қуролланган ҳолда уйнинг бешинчи қаватига кўтарилишди. Элнора ишора қилиб, мана шу уй, дея ўзи пастга тушиб кетди.

Сардор эшикни тақиллатиб, «Дилшод аканинг уйими?» деб сўради. Ичкаридан ёш бола «Бу ерда Дилшод ака турмайди» деди. Иложсиз қолган икки йигит нима қиларини билмай, пастга тушди.

— Нима бўлди? — хавотирга тушиб сўради Элнора.

— Эшикни очишмади.

— Бўлмаса, яна қайтиб чиқиб, Зулфия опага хат келди, дейсанлар.

Бу гал Сардор машинада қолиб, тўппончани Латифжонга берди. Олим­хон шериги Латифжон билан яна тепага чиқди.

— Почтальонмиз, Зулфия опага хат бор. Очинглар.

Эшик очилиши заҳотиёқ Латифжон ва Олимхон ичкарига бостириб кирди.

— Пул қаерда? — деди Латифжон тўппончани ўқталиб.

Бу пайтда Олимхон ётоқхонага кириб, пул ва тилла тақинчоқларни қидира бошлади. Аммо ҳеч нарса тополмади. Кўзи сейфга тушди. Бироқ очолмади. Олимхон хонадон эгаларини қўрқитиш мақсадида Латифжоннинг қўлидаги тўппончани олиб, ойнага қараб отди. Хонадон эгасининг кичик ўғли зир титраб, тортмадан сейф калитини олиб берди. Бос­қинчилар сейфдан 350 минг сўм пул ва 8 хил тилла тақинчоқни олиб чиқиб кетишди.

Шовқин-суронни эшитган қўшнилар уларни ушлашга ҳаракат қилди. Қўшниларга ҳам ўқ узилди ва талончилар автомашинага ўтириб, воқеа жойидан қочишди. Аммо узоққа кета олишмади. Йўлда автомашина ағдарилиб кетди... Шу куннинг ўзида тўрт бос­қинчи Қибрай туман ИИБ хо­димла­ри томонидан қўлга олинди.

Олимхон Боқиев, Элнора Илҳомова, Латифжон Муқимов ва Сардор Саидазовлар қилмишларига яраша жазоланди.

Шу ўринда ўйга толасан киши. Эндигина 20 ёшга тўлган бу ёшлар ўқийман, касб эгаллайман, ҳалол ишлаб, ҳалол яшайман, деса ҳамма имконият бор. Афсуски, улар қинғир йўлни танлашди. Бу йўлнинг охири эса ҳамиша афсус, надоматли бўлган.

Равшан ШОДИЕВ,

«Ўзбекистон овози» мухбири.



DB query error.
Please try later.