22.02.2014

ШЕРЗОД ТОШМАТОВ: «ҒАЛАБА УЧУН ФАҚАТ ИСТЕЪДОДНИНГ ЎЗИ КАМЛИК ҚИЛАДИ»

Мамлакатимизда нафақат Олимпия ўйинлари, балки миллий ва Шарқ яккакурашлари ­туркумидаги спорт турларининг ҳам оммавийлигини ошириш, янада ривожлантиришга катта эътибор қаратилмоқда. Натижада янги-янги истеъдодли ёшлар кашф этиляпти. Уларнинг халқаро миқёсда эришаётган ютуқлари тобора ортиб бормоқда. Жумладан, Шарқ яккакураш турларидан бири — муайтай бўйича ҳамюртларимиз қўлга киритаётган ғалабалар ҳам фикримиз тасдиғидир.

Юртимизда ушбу спорт турини янада юксалтириш йўлида амалга оширилаётган ишлар, келгуси режалар хусусида Ўзбекистон Ҳаваскор ва профессионал муайтай ассоциацияси раиси Шерзод Тошматов билан суҳбатлашдик.

— 1995 йилнинг 1 майида Ўзбекистон муайтай федера­ция­си ташкил этилганди, — дейди Шерзод Тошматов. — Ташкилот мавқеи ва аҳамиятини яна­да кучайтириш мақсадида ке­йинчалик у Ўзбекистон Ҳаваскор ва профессионал муайтай ассо­циациясига айлантирилди. Айни чоғда ассоциациямизнинг Тошкент шаҳри, Қорақалпоғистон Республикаси ва барча вилоятларда бўлимлари фаолият кўр­сатмоқда. Муайтайга бўлган қи­зиқиш тобора ортиб боряпти. Мамлакатимизда бу спорт тури билан шуғулланаётганлар сони қарийб ўттиз минг кишини ташкил этади. Айниқса, ассоциа­циямиз қошида мураббийлар, ҳакамлар малакаси ва маҳо­ратини оширишга алоҳида аҳа­мият берилаётганлиги муайтайни ривожлантиришга катта ҳис­са қўшмоқда.

— Бугунги кунда Ўзбекистон муайтайчилари қўлга киритаётган муваффақиятлар халқаро майдонда ҳам юксак эътироф этилмоқда. Бу ютуқлар ўз-ўзидан қўлга киритилмаётган бўлса керак, албатта.

— Юксак марраларни забт этиш учун спортчидаги истеъдод ва иштиёқнинг ўзи камлик қилади. Эришилаётган ютуқларни, аввало, мамлакатимизда жисмоний тарбия ва спортни ривожлантиришга давлат сиёсатининг устувор йўналишларидан бири сифатида қаралаётганлиги билан изоҳлаган бўлардим. Ўзбекистонлик ёшлар турли нуфузли халқаро мусобақаларда мунтазам ғолиб ва совриндорлар қаторидан жой олиб келишмоқда. Шу кунгача ҳамюртларимиздан ўттиз уч нафар жаҳон, ўн етти нафар Осиё чемпионла­ри, юздан зиёд турли халқаро турнирлар ғолибларининг етишиб чиққанлиги ҳам сўзимнинг исботи бўла олади.

Мамлакатимизда жисмоний тарбия ва спортни янада ривожлантириш учун яратилган шарт-шароитлар йирик халқаро спорт ташкилотлари томонидан алоҳида эътироф этиб келиняпти. Жум­ладан, Халқаро муайтай федерациялари ассоциацияси (IFMA) бугунги ўзбек спорти, жумладан, муайтайга юксак баҳо бераётгани бизнинг ўз ишимизга бўл­ган қизиқиш, меҳр-муҳаббатни янада оширмоқда. Ҳозирда ўз таркибига дунёнинг бир юз олт­мишдан зиёд давлатини бирлаштирган IFMAнинг йирик мусобақалар мезбонлигини мамлакатимизга ишониб топшираётганлиги ҳам бежиз эмас. Мисол учун, Тошкент 2010 йили Осиё, 2011 йилда эса жаҳон чемпиона­тига юксак савияда мезбонлик қилди. 2012 йилдан бошлаб юртимизда профессионал муайтай бўйича «Буюк ипак йўли» халқ­аро турнири мунтазам ўтказиб ке­линмоқда. Бу мусобақа дастлаб Тошкентда уюштирилган бўлса, ўтган йили кўҳна ва ҳамиша нав­қирон Самарқанд шаҳрида дунё­нинг энг кучли спортчилари ўз маҳоратларини намойиш этди.

— Маълумки, ўтган йил Ўзбекистон муайтайчилари учун ёрқин ғалабаларга бой бўлди. Бу йил спортчиларимизнинг қандай мусобақаларда иштирок эти­ши режалаштирилган?

— Ўтган йилда моҳир спортчимиз Саидаҳмад Орипов ўз вазн тоифасида Инчеон (Жанубий Корея)да ёпиқ иншоот­ларда ўтказилган Осиё ўйинларидан бронза медали билан қайтган бўлса, Шуҳрат Ботиров, Фирдавсий Хол­муродов, Илҳом Сотиболдиев, Юсуф Ибрагимов сингари муай­тайчиларимизнинг халқаро турнирларда қўлга киритган ғалабалари шарафига Ватанимиз байроғи баланд кў­тарилиб, мад­ҳиямиз янгради. Шунингдек, Ўзбекистон ёш­лар терма жа­моа­си Таиландда ўтган Осиё чем­пионатидан медаллар шодаси билан юртимизга қайтган эди.

Амалдаги йилда ҳам спортчиларимиз кўплаб йирик мусобақаларда қатнашади. Жумладан, май ойида Малайзияда жаҳон, сентябрда эса Таиландда навбатдаги қитъа чемпионатлари ўтказилади. Шунингдек, юртимизда анъанага кирган «Буюк ипак йўли» халқ­аро турнири уюштирилади. Мақ­садимиз — ана шу мусобақаларда муносиб иштирок этиб, Ватанимиз шуҳратини янада дунё­га таратишдир.

Эркин ХОЛБОБО,

«Ўзбекистон овози» мухбири.



DB query error.
Please try later.