13.02.2014

МУҚИМ ИШ ЎРНИ, СИФАТЛИ МАҲСУЛОТ

иқтисодий тараққиётга хизмат қилади

Навоий вилоятининг мамлакатимиз иқтисодиёти­даги салоҳияти тобора юксалиб бормоқда. Вилоятда мустақилликнинг дастлабки йилларида саноат корхоналари 110 та эди, бугунга келиб улар сони 13 баробарга ошди.

Шунга мос равишда иш ўрин­лари ҳам яратилди. Корхоналар томонидан ишлаб чиқарилаётган маҳсулотлар тури 46 та эди, ҳозир эса 1385 та саноат корхонасида 300дан зиёд маҳсулот тайёрланмоқда. Улардан ҳар учдан бири тайёр маҳ­сулот ҳисобланади. Биргина 2013 йилда ялпи ҳудудий маҳсулот ҳажми 6438.1 миллиард сўмни ёки 2012 йилга нисбатан ўсиш суръати 104.5 фоизни ташкил этди. Ялпи ҳудудий маҳсулот ҳажмида саноатнинг улуши 47.1 фоизга етди.

Ҳақиқатан ҳам истиқлол йилларида Навоий том маънода саноатлашган, иқтисодий бақувват ҳудудга айланди. Айни пайтда мамлакатимизда тайёрланаётган рангли ва қимматбаҳо металларнинг 73 фоизи, уран ва фосфоритнинг 100 фои­зи ушбу ҳудуд ҳиссасига тўғри келади. «Навоий кон-металлургия комбина­ти» давлат кор­хона­си, «Қизилқум-цемент», «Навоий иссиқлик энергия­ станцияси», «Навоийазот» ОАЖ, «Электрокимё заводи» ЁАЖ сингари йирик истиқболли корхоналар нафақат мамлакатимизда, қолаверса, чет элларда ҳам машҳур. Мурунтов кончилик комплекси эса олтин иш­лаб чиқариш бў­йича дунёда етакчи ўринлардан бирида туради.

Бундан ташқари, вилоят кумуш, вольфрам, уран каби қимматбаҳо қазилмаларга эга. Нитрон толаси, цемент ва бошқа қурилиш материаллари, минерал ўғитлар ва ўсимлик зараркунандаларига қарши кимёвий воситалар сингари камёб ва жаҳон бозо­рида харидоргир маҳсулотлар ҳам шу ерда ишлаб чиқарилмоқда ва улар ҳам вилоятнинг саноат салоҳияти юксалишига катта таъсир кўр­сатмоқда.

Президентимизнинг мазкур минтақада эркин индустриал-иқтисодий зонани ташкил этиш тўғрисидаги фармонининг эълон қилиниши вилоят ижтимоий-иқтисодий ривожида, айниқса, саноат тараққиётида янги сифат босқичини бошлаб берди. Жумладан, ушбу фармонда кўз­да тутилган алоҳида солиқ ва божхона имтиёз ва қулай­ликлари қадим Кармана, кўҳна Маликчўл тараққиёти учун катта имкониятлар яратди.

Бугунги кунда юқоридаги фар­монга кўра, умумий қиймати 100 миллион доллардан зиёд бўлган 19 та инвестиция лойиҳаси бўйича ишлаб чиқариш корхоналари барпо этилди. Чунончи, автомобиллар учун бутловчи қисмлар, автомашиналар учун спидометр ва ручкалар, диодли лампалар, полиэтилен ва полипропилен қувурлар, тўл­қин қабул қилгичлар, косметика маҳсулотлари, гигие­ник воситалари, автомашиналар учун газ баллонлар, фарма­цевтика маҳсулотлари, энергия тежовчи чироқлар, юқори кучланишга чидамли электр кабеллар, мобиль ва стационар те­лефон аппаратлари, иссиқлик ва сув иситиш қозонлари, модем ва телевизорлар учун пристав­калар каби юксак технологияларга асосланган маҳсулотлар маҳаллий ёш мутахассислар томонидан тайёрланмоқда. Улар сифатли, рақобатбардош, халқаро стандарт талабларига тўлиқ жавоб беради. Бундай йирик ва кў­ламли лойиҳалар­ни амалга оши­риш учун Хитой, Корея, Сингапур, Бирлашган Араб Амирликлари ва Ҳиндистон каби давлат­лар томонидан тўғридан-тўғри инвестициялар киритилди. Ҳо­зирда ушбу ҳу­дудда ишлаб чиқарилаётган 10 га яқин маҳсулот МДҲ давлатларига экспорт қи­линмоқда.

Маълумотларга қараганда, 2013 йилда махсус зона ҳудудида жойлашган корхоналар томонидан қиймати 100 миллиард сўмдан зиёд маҳсулот ишлаб чиқарилди.

Жорий йилда эса 5 янги ло­йиҳа — қуёш панеллари, қўл те­лефонлари, планшетлар, телевизор ва компьютерлар ҳамда дори-дармон воситалари ишлаб чиқариш кўзда тутилган. Шу билан бирга, маҳсулотларни экспортга чиқариш географияси ҳам кенгаяди. Муҳими, шулар ҳисобидан 300га яқин янги иш ўрни яратилади.

— Юртбошимиз ташаббуси билан ташкил этилган ушбу эркин иқтисодий ҳудудда йил са­йин янги корхоналар фаолия­ти йўлга қўйилмоқда, — дейди ЎзХДП Навбаҳор туман кен­гаши раиси Умрзоқ Хўжаев. — Айни пайтда мингдан зиёд янги иш ўринлари яратилган мазкур зонада нафақат Кармана, балки Навоий шаҳри, Нав­баҳор ва Қизилтепа тумани ёш­лари ҳам меҳнат қилмоқда. Уларнинг аксарияти — коллеж бити­рувчиларидир. Партиямиз сайловолди Дастурида муқим иш ўринлари турмуш фаровонлигининг муҳим асосларидан би­ри, деб таъкидланган.

— Мен 2013 йилда ўз фаолиятини бошлаган «Hayat power cable systems» қўшма корхо­насига ишга қабул қилиндим, — дейди Ҳаётжон Нуруллаев. — Биз бу ерда юқори кучланиш­га чидамли электр кабеллар ишлаб чиқарамиз. Барча линия­лар компьютерлаштирилган ти­зим орқали бажарилади. Ви­лоя­тимизда замонавий техно­логия­лар билан жиҳозланган истиқболли корхоналар сонининг кўпайиши шунга мос равишда мутахассислар тайёрлашни талаб этмоқда. Корхона­мизда ишлаётган ёшлар икки-учтадан замонавий мутахассисликни билишади.

Бугун Навоий вилоятининг иқтисодий ва саноат салоҳияти нафақат мамлакатимизда, балки халқаро экспертлар томонидан ҳам эътироф этилмоқда. Мазкур ҳудуднинг саноат салоҳияти кун, ой, йил сайин юксалиб бормоқда. Бунинг замирида, энг аввало, янги иш ўринлари яратиш, аҳоли турмуш фаровонлигини таъминлашдек улуғ ният мужассамдир.

Илҳом САТТОРОВ,

«Ўзбекистон овози» мухбири.



DB query error.
Please try later.