08.02.2014

Ўзбекистон Президенти XXII қишки Олимпиаданинг очилиш маросимида иштирок этди

Ўзбекистон Республикаси Президенти Ислом Каримов 7 февраль куни Сочи шаҳрида ўтаётган XXII қишки Олимпия ўйинларининг очилиш маросимида иштирок этди.

Ушбу Олимпия ўйинларида саралаш босқичидан муваффақиятли ўтган спортчиларимиз Ксения Григорьева ва Артём Воронов тоғ чанғиси, Миша Ге фигурали учиш мусобақаларида иштирок этади. 5 февраль куни Олимпия шаҳарчасида терма жамоамиз шарафига Ўзбекистон Давлат байроғи тантанали равишда кўтарилди.

XXII қишки Олимпиада мустақил Ўзбекистон терма жамоаси қатнашаётган олтинчи шундай мусобақадир. Мамлакатимиз спортчилари мустақил жамоа сифатида иштирок этган илк Олимпиада – 1994 йилда Норвегиянинг Лиллехаммер шаҳрида ўтган XVII қишки Олимпия ўйинларида фристайл бўйича олтин медални қўлга киритиб, улкан муваффақиятга эришган эди.

Ўтган йиллар мобайнида Ўзбекистон спортчилари Олимпия ўйинларида 6 олтин, 5 кумуш ва 11 бронза, Осиё ўйинларида 54 олтин, 76 кумуш ва 93 бронза медалига сазовор бўлди. Бундай натижалар Ўзбекистон спортга давлат томонидан алоҳида эътибор қаратилаётган ва жадал ривожланаётган мамлакатлар орасида тобора мустаҳкам ўрин эгаллаётганидан далолат беради.

Бугунги кунда спорт ёшларимиз ҳаётида тобора муҳим ўрин эгаллаб бормоқда. Давлатимиз раҳбари, Ўзбекистон Болалар спортини ривожлантириш жамғармаси Ҳомийлик кенгаши Раиси Ислом Каримов таъкидлаганидек, мамлакатимизда 2 миллионга яқин бола спортнинг 30 дан зиёд тури билан мунтазам шуғулланмоқда. Олимпия спорт турлари бўйича терма жамоаларимиз 2 мингга яқин спортчи шуғулланаётган олий спорт маҳорати мактабларида шакллантирилмоқда.

Сочи шаҳрида ўтаётган XXII қишки Олимпия ўйинларида 90 га яқин мамлакатдан 5 минг 500 дан зиёд спортчи иштирок этмоқда.

Ушбу Олимпия ўйинлари учун махсус қурилган «Фишт» стадионида 7 февраль куни жаҳоннинг етакчи мамлакатлари раҳбарлари иштирокида мусобақанинг тантанали очилиш маросими бўлиб ўтди. Олимпиада машъаласининг ёқилиши маросимнинг энг ҳаяжонли дамлари бўлди.

* * *

Ўзбекистон Республикаси Президенти Ислом Каримов Сочига сафари доирасида Туркманистон Президенти Гурбангули Бердимуҳамедов билан учрашди. Музокарада Ўзбекистон – Туркманистон муносабатларига доир ва томонларни қизиқтирган бошқа масалалар юзасидан фикр алмашилди.

ЎзА



DB query error.
Please try later.