04.02.2014

КЎЧМА ЖАМОАТЧИЛИК ҚАБУЛХОНАЛАРИ

одамлар ва партияни ўзаро боғловчи кўприк вазифасини бажармоқда

Ҳар бир сиёсий партия ўз электорати вакиллари манфаатини самарали ҳимоя этиши учун, аввало, уларни ташвишга солаётган масалаларни чуқур билиши керак. Сиёсий партиянинг электорат билан алоқалари, унинг муаммоларини ўрганиш йўллари турлича бўлиши мумкин. Бу борада ЎзХДП ўзига хос тажрибага эга. 2005 йилда ЎзХДП Марказий Кенгаши Ижроия қўмитаси Ҳайъатининг қарори билан вилоят, шаҳар ва туман партия кенгашлари қошида Жамоатчилик қабулхоналари ташкил этилган эди. Ўтган давр мобайнида улар ор­қали электоратни ташвишга солаётган муаммоларни ўрганиш ҳамда ҳал этиш бўйича катта тажриба тўплади.

Маълумки, ҳеч ким қабулхонага сабабсиз келмайди. Ҳар бир мурожаат ортида кимнингдир ёки кўпчиликнинг муаммоси ётади. Баъзида эса одамлар эътиборсиз ва расмиятчиликка дуч келиб, бизнинг Жамоатчилик қабулхоналаримизга мурожаат қилади. Демак, тушаётган ҳеч бир мурожаат эътибордан четда қол­маслиги керак.

Жамоатчилик қабулхоналаримиз асосан вилоят, туман марказларида жойлашган. Шу сабабли электорат вакилларига қулайлик яратиш мақсадида ЎзХДП Фарғона вилоят кенгаши чекка ҳудудларда кўчма жамоатчилик қабулхоналарини ташкил этишга алоҳида эътибор қаратаяпти. Ҳафтанинг ҳар жума куни маҳаллий партия кенгашлари режали тартибда маҳаллалар, қишлоқларда кўчма қабуллар ташкил этмоқда.

Таҳлилларга эътибор берадиган бўлсак, кўчма жамоатчилик қабулхоналарининг изчил ташкил этилиши натижасида мурожаатлар сони сезиларли даражада кўпайди. Мисол учун, 2012 йилда партия маҳаллий кенгашларига мурожаат қилган фуқаролар сони 305 нафарни ташкил этган бўлса, кўчма жамоатчилик қабулхоналари ор­қали 300 та мурожаат рўйхатга олинган. 2013 йил давомида фуқаролардан Жамоатчилик қабулхоналарига жами 1376 та мурожаат бўлди. Бунинг 993 таси айнан кўчма қабуллар вақтида тушган.

Мурожаатларнинг 100 таси иш билан таъминлаш, 350 таси уй-жой-коммунал хизмат кўрсатиш, 123 таси соғ­лиқни сақлаш, 10 таси халқ таълими соҳасида дуч келинаётган муаммолар, шу­нинг­дек, 170 дан ортиғи моддий ёрдам тўғрисида, 336 таси кредит олиш масалалари билан боғлиқ бўлиб, уларнинг 50 фоиздан ортиғи ўз ижобий ечимини топган. Айримларига юридик маслаҳатлар берилган бўлса, қолганлари назоратга олинган, улардан бирортаси ҳам эътиборсиз қолмаган.

Ўзбекистон ХДП Марғилон шаҳар, Ёзёвон, Учкўприк, Тошлоқ, Ўзбекистон, Бувайда, Риштон туман кенгашларида Жамоатчилик қабулхоналарига тушаётган мурожаатларга масъулият билан ёндашилаяпти. Сўх, Олтиариқ, Қўштепа туманлари ва Қувасой, Қўқон шаҳар пар­тия кенгашлари эса фуқаролар томонидан кўтарилган муаммоларни ўз вақтида ҳал қилишда сусткашликка йўл қўймоқда. Бу ҳудудлардаги Жамоатчилик қабулхоналарига баъзан бир ой мобайнида атиги 3-4 та мурожаат бўлаётгани, партия фаоллари ва депутатлар аҳоли, хусусан, электорат орасига чуқур кириб бормаётганини англатади. Айрим маҳаллий партия кенгашларида Жамоатчилик қабулхоналари фаолияти тўғрисида партия электоратининг кўпчилик вакиллари хабардор эмас. Демак, амалга оширилаётган ижобий ишлар билан бирга, бу соҳада ҳали бартараф этилиши лозим бўлган камчиликлар ҳам талайгина.

Таъкидлаш керакки, электоратимиз вакиллари кўтараётган масалалар ечимини топишда партиядан сайланган турли даражадаги депутатларга суяниш, депутатлик сўрови институтидан фойдаланиш, шунингдек, жамоат ташкилотлари ва фуқаролик жамияти институтлари билан ҳамкорлик қилиш ижобий натижаларини бермоқда.

Яқинда Ўзбекистон ХДП Фар­ғона вилоят кенгаши ижроия қўмитасининг «Жамоатчилик қабулхоналари фаолиятини янада такомиллаштириш, уларнинг самарадорлигини ошириш, жойларда кўчма жамоатчилик қабулхоналарини ташкил этиш тўғрисида»ги қарори қабул қилинди. Бундан ташқари, «Маҳалла» хайрия жамоат фонди вилоят бўлими билан биргаликда маҳаллаларда кўчма жамоатчилик қабулхоналари ташкил этиш, уларда фуқароларни қабул қилиш ва кўтарилган масалаларни кўриб чиқиш бўйича қўшма чора-тадбирлар режаси тасдиқланди. Унга кўра, вилоятдаги ҳар бир партия кенгаши «Маҳалла» хайрия жамоат фонди бўлимлари билан биргаликда ойида камида икки марта кўчма жамоатчилик қабулхонаси ташкил этиши белгилаб қўйилди.

Ижтимоий ҳамкорлик имко­ният­ларидан кенг фойдаланиш Жамоатчилик қабулхоналари фаолиятини такомиллаштириш, самарадорлигини оширишда муҳим аҳамиятга эга бўлади, деб ҳисоблаймиз. Тажриба кўрсатаяптики, бу йўналишдаги ишларни қанча такомиллаштирсак, электорат манфаатини ҳимоя қилиш ишлари шунчалик самарали бўлади.

Сардор АБДУЛЛАЕВ,

Ўзбекистон ХДП Фарғона вилоят кенгаши бўлим мудири.



DB query error.
Please try later.