18.01.2014

АЪЗОЛАРИ ФАОЛ ВА ТАЛАБЧАН

бошланғич ташкилот кучли бўлади

Партиянинг асосий таянчи бошланғич ташкилотлар дейишимиз бежиз эмас. Агар аъзолар партия ғояларини қўллаб-қувватламаса, етакчилар ва депутатларни фаолликка, амалий ишларга ундамаса, партиянинг дастурий мақсадлари ижроси қийин кечади.

Шу боис бошланғич бў­ғин фаолиятини кучайтириш­га доимий эътибор талаб қи­линмоқда. Юртимиздаги ҳар бир сиёсий партия аъзо­лари ва тарафдорларини кў­пайтиришга интилаётган, ислоҳотларни чуқурлаштиришда уларнинг иштироки кескин ошиб бораётган бир шароитда бу муҳим аҳа­мият касб этади.

— Бошланғич ташкилотлар фаолиятидаги устувор вазифалардан бири — аъзолар, тарафдорлар, электоратнинг ижтимоий-сиёсий фаоллигини оширишдан иборат, — дейди Тошкент шаҳрининг Олмазор туман тиббиёт бирлашмасига қарашли Марказий кўп тармоқли ши­фохонадаги ЎзХДП бошланғич ташкилоти етакчиси Сабоҳат Шорасулова. — Сиёсий ва фуқаролик маърифати тизимида олиб борилаётган ишларда биринчи галда шунга эътибор бераяпмиз. Муассасамизда 30 дан ортиқ партиямиз аъзоси бор. Ўтган йили «Оилаларда соғлом турмуш тарзини қарор топти­риш омиллари», «Демократик ислоҳотларни янада чуқурлаштириш ва фуқаролик жамиятини ривожлантиришда ЎзХДП ташкилотларининг ўрни», «Аъзолар сиёсий-ҳуқуқий билимдон, ижтимоий фаол бўлса, партия дастурий мақсадлари самарали амалга ошади» ҳамда «ЎзХДП: кеча ва бугун» каби мавзуларда сиёсий семинарлар ташкил этдик. Уларда ўзаро эркин мулоқот, фикр алмашувга алоҳида эътибор қа­ратаётганимиз аъзоларнинг ўз мулоҳазасини билдириш, таклиф айтиш иштиёқи кўпайишига олиб келмоқда. Энг муҳими, бу уларда ислоҳотлар тақдирига дахлдорлик туйғуси мустаҳкамланишига хизмат қилмоқда.

Дарҳақиқат, бошланғич ташкилотсиз сиёсий партияни тасаввур этиб бўлмайди. Қолаверса, БПТ одамларнинг кундалик муаммоларини яхши билади. Кучли қуйи бўғинга эга бўлган партия, шубҳасиз, кучли партиядир.

Хўш, Олмазор туманида бошланғич партия ташкилотлари фаолиятини кучайтириш учун нималар қилинаяпти? Бу борада фаоллар қандай таклиф беради?

Камолиддин АКРАМОВ, ЎзХДП Олмазор туман кенгаши раиси:

— Сиёсий ўқувларни кўпроқ қуйи бўғинда ташкил этиш ҳам­да уларга керакли услубий қўл­ланмаларни, партия фаолиятидаги янгиликларни ўз вақтида етказиб туришга ҳаракат қилаяпмиз. Шунингдек, ҳар йили тасдиқланадиган иш режада бошланғич ташкилотларга ҳам аниқ вазифалар белгилаймиз ва шу асосида уларнинг фаолиятини таҳлил этиб борамиз.

Олмазор туманида ЎзХДП­нинг 3748 нафар аъзоси 122 та бош­ланғич ташкилотга бирлашган. Бошланғич ташкилот ўз зиммасидаги вазифани қандай бажариши етакчи давр талабини чуқур англаган ҳолда ишни таш­кил этишига боғлиқ. Бундай етак­чиларни тарбиялаб бориш учун ишни тизимли йўлга қўйиш керак. Биринчи навбатда бошлан­ғич ташкилотларда сиёсий ўқув­лар сифатини ошириш, хусусан, уларда долзарб ҳаётий ва партиявий мавзулар муҳокама қилинишига эътибор қаратиш талаб қилинади. Бу етакчиликка қобилияти ва иштиёқи бор ёшларнинг дунёқараши кенгайиши, сиёсий-ҳуқуқий би­лими юксалишида муҳим аҳа­миятга эга.

Аъзолар нима дейди?

Муқаддас АҲМЕДОВА, Олмазор туман тиббиёт бирлашмасига қарашли Марказий кўп тармоқли шифохонанинг кундузги шифохона бўлим бошлиғи:

— Партиямиз Дастури, унинг олдида турган вазифалар қай даражада бажарилиши кўп жиҳатдан бошланғич ташкилотлар фаоллигига боғлиқ экани кўп такрорланади. БПТ қандай ишлаши эса биринчи навбатда, аъзолар масъулиятига боғлиқ. Менимча, ҳар бир аъзо изланув­чан бўлиб, сиёсий-ҳуқуқий били­мини оширишга доимий эъти­бор қаратиши керак. Бундан ташқари, аъзолар билан партия кенгаши, депутатлар ўр­тасида фикр алмашиш муҳити юзага келиши партиянинг турли масалалар бўйича позиция­си шаклланишида муҳим аҳа­миятга эга, назаримда. Бу, шунингдек, ЎзХДП электорати манфаати би­лан боғлиқ масалаларни ҳал этиш, ҳудудларни янада ривожлантириш бўйича таклифлар кў­пайишига ҳам кенг йўл очади.

Лазиза ШЕРОВА,

«Ўзбекистон овози» мухбири.



DB query error.
Please try later.