16.01.2014

ХАЙРИХОҲЛАР САФИ КЕНГАЙМОҚДА

Аёл қачон жамиятда ўзининг муносиб ўрнини топади? Бу кўп масалаларга боғлиқ, албатта. Лекин энг асосий омиллардан бири шундаки, аёл ўз қобилиятини юзага чиқариши, орзу-ҳавасларига етишиши учун имкониятлар яратилса, аёл ўз ҳақ-ҳуқуқини яхши билса, кўп ишларга қодир бўлади.

Бухоро вилоятида «Фаол аёллар» қанотининг 12 мингдан ортиқ аъзоси бор. Қувонарлиси, йилдан-йилга бизга хайрихоҳ бўлган хотин-қизлар сафи кенгайиб бораяпти. Ўтган йили 1565 нафар хотин-қиз сафимизга қўшилди. Бу эса зиммамизга катта масъулият юклайди. Биз хотин-қизларнинг ижтимоий-сиё­сий фаоллигини ошириш, иқтисодий-ҳуқуқий билимларини мустаҳкамлаш, уларни оилавий тадбиркорлик ва касаначиликка жалб этиш ҳамда ижтимоий-маиший шароитларини янада яхшилаш мақсадида қатор тадбирлар ташкил этаяпмиз.

Масалан, «Мустаҳкам оила — жамият таянчи» лойиҳаси доирасида ўтган йили 5 та маҳаллада амалий тадбир ўтказдик. Депутатлар, қанот фаоллари ҳамда ҳамкор ташкилотлар вакилларидан иборат ишчи гуруҳи ҳудудларда хотин-қизлар муаммоларини ўрганиб, уларни бартараф этиш бўйича таклифларини ишлаб чиқди. Натижада 16 нафар хотин-қизнинг ишга жойлашишига кўмаклашилди. Шунингдек, мазкур лойиҳа доирасида ўтказилган тадбирларда норасмий тарзда уй меҳнати билан шуғулланаётган аёллар учун меҳнат дафтарчалари очиш, улар меҳнатини расмийлаштириш бўйича зарур тушунтириш ишлари олиб борилди.

Қанотимиз ташаббуси билан Шофиркон туманида «Аёллар бандлиги — обод турмуш гарови» мавзусида ўтказилган амалий анжуманда хотин-қизлар саломатлигини мустаҳкамлаш, ижтимоий-сиёсий фаоллиги, ҳуқуқий саводхонлигини юксалтириш масалаларига алоҳида эътибор қаратилди. Тадбир давомида хотин-қизлар ўртасида тиббий кўрик акцияси ташкил этилди ва бир гуруҳ хотин-қизга вилоят марказий шифохоналарида даволаниш учун йўлланма берилди.

2014 йил Соғлом бола йилида, аввало, она ва бола саломатлигини муҳофаза қи­лиш, оилаларда соғлом турмуш тарзини тарғиб қилиш, шу­нинг­дек, аёлларнинг бандлик даражасини ошириш бўйича пухта ва ҳаётий лойиҳалар устида ишлашимиз зарур. Тадбирларни режалаштиришда ундан аниқ мақсадни кўзлаш, шунга мувофиқ тарз­да мутасадди ташкилотлар, фуқаролик жамияти институтлари билан ҳамкорликни кучайтиришимиз талаб этилади.

Хотин-қизлар манфаатини ҳимоя қилиш бўйича белгиланган ишлар доирасида муқобил таклифларни кўпайтиришга алоҳида эътибор қаратишимиз лозим.

Шоҳиста НАБИЕВА,

ЎзХДП Бухоро вилоят кенгаши «Фаол аёллар» қаноти етакчиси.



DB query error.
Please try later.